1 मिस्र देशो रे बारे दे परमेशरो री पारी भविष्यबाणी। देखो, यहोवा चट ई उडणे वाल़े बादल़ो पाँदे सवार ऊई की मिस्र देशो दे आऊणे लगी रा ओर मिस्रो रिया मूर्तिया तेसरे आऊणे ते थरथराई जाणिया ओर मिस्रिया रा दिल पाणी-पाणी ऊई जाणा।* 2 यहोवा बोलोआ, मां मिस्रो रे लोक एकी-दूजे रे खलाफ पड़काणे ओर सेयो आपू-बीचे लड़ने, हर एक आपणे पाईए साथे ओर हर एक आपणे पड़ोसिये साथे लड़ना। शईर-शईरो रे ओर राज-राज रे खलाफ लड़ने।* 3 जेबे आऊँ तिना री योजना दे गड़बड़ी करी देऊँआ तेबे मिस्रिया री बुद्धि मारी जाणी ओर मां तिना रिया योजना बेकार करी देणियां ओर तिना आपणी मूर्तिया गे ओर जादू ओर मरी री आत्मा साथे गल्ला करने वाल़ेया गे जाई-जाई की पूछणा, 4 पर मां मिस्री एक अत्याचार करने वाल़े राजे रे आथो दे करी देणे ओर एक शक्तिशाली राजे तिना पाँदे राज करना, सेना रे यहोवे री येई बाणी ए।

5 तेबे नील नदिया रा पाणी सूकी जाणा ओर नदी सूकी की खाली ऊई जाणी। 6 नाल़े ते सड़यान आऊणे लगणी, ओर मिस्रो री नदिया बी सूकी जाणिया ओर नंगल़ ओर बियूँसो रे डाल़ मुरझाई जाणे। 7 नील नदिया रा कनारा ऊजड़ी जाणा ओर तेथो री जमीना रा काआ ओर जो कुछ नील नदिया रे नेड़े-तेड़े बाणा, से सूकी की बर्बाद ऊई जाणा ओर तिजी रा कोई पता पनि लगणा। 8 सारे मच्छुआरे, ओर सेओ सारे लोक जितणे नील नदिया दे मछल़ी पकड़ने खे ऊक सेटोए, दु:ख करना ओर लाम्बे-लाम्बे साआ लणे ओर जो पाणिए पाँदे जाल़ सेटोए, सेयो उदास ऊई जाणे। 9 तेबे जो लोक रेशमो रा काम करोए ओर जो सूत बूणोए, तिना री उम्मीद टूटी जाणी। 10 मिस्रो रे अमीर ओर मजदूर उदास ऊई जाणे। 11 पक्का सोअन शईरो रे सारे परदान मूर्ख ए ओर फिरौनो रे अक्लमंद मन्त्रिया री योजना डांगरा जेड़ी ठईरी। तेबे तुसे फिरौनो खे किंयाँ बोली सकोए कि आऊँ अक्लमंदो रा पाऊ ओर पुराणे राजेया री ल्वाद ए? 12 ओ मिस्रो रे राजा तेरे अक्लमंद मर्द केयी ए? तिना अक्लमंद लोका खे ओर मिस्रो रिया तँईं यहोवे जो योजना बणाई राखी, तिजी रा पता ऊणा चाईओ। तिना लोका खे, जो ऊणे वाल़ा ए, तुसा खे बताणा चाईओ।* 13 सोअनो रे परदान मूर्ख बणी गे दे, नोप शईरो रे परदाने तोखा खाई राखेया ओर जिना पाँदे मिस्रो रे गोत्रो रे परदाना रा परोसा था, तिने मिस्र परमाई ता रा। 14 यहोवे मिस्रिया दे बईम पैदा करी राखेया, सेओ पटकी गे ओर मिस्रो खे गल़त बाटा रिये निणे लगी रे। सेओ नशेड़िये जेड़े ऊईगे दे जो बमारिया रिया बजा ते जमीना पाँदे ओरे-पोरे मरेलणे लगी रे। 15 मिस्रो खे कोई एड़ा काम नि रणा जो सिरो ते या पूँछा ते* या परदान या आम माणूंए ते ऊई सको।

16 तेस बखते मिस्री लोक, जवाणसा जेड़े ऊई जाणे ओर सेना रे यहोवे जेस तिना पाँदे आपणा आथ बढ़ाणा, तेसरे डरो रे मारे सेयो काँबी जाणे ओर डरी जाणे। 17 मिस्रो रे सारे लोका रिया तँईं यहूदा रा देश डरो री बजा ऊणा मिस्रो दे कोई बी यहूदा रा नाओ सुणी की डरी जाणा। एड़ा इजी खे ऊणा कऊँकि यहोवे डराऊणी कटणा कटाणे री योजना बनाई राखी। 18 तेस बखते मिस्र देशो रे पाँज शईर ऊणे जेती लोका कनानो री इब्रानी पाषा बोलणी। ओर यहोवे री कसम खाणी। तिना बीचा ते एकी रा नाओं सूर्या शईर राखेया जाणा। 19 तेस बखते मिस्र देशो बीचे यहोवे खे एक बेदी ऊणी। मिस्रो रे बन्ने रे नेड़े यहोवे खे एक खम्बा खड़ा ऊणा। 20 से मिस्र देशो रे सेना रे यहोवे खे नशाण ओर गवाई ठईरना ओर जेबे तिना अन्देर करने वाल़ेया रिया बजा ते यहोवे ते मतादा खे बोलणा, तेबे यहोवे तिना री रक्षा करने खे एक आदमी पेजणा, ओर तेस सेयो आजाद करने। 21 तेबे यहोवे आपू मिस्रिया सामणे आऊणा ओर मिस्रिया तेस बखते यहोवा पछयाणना ओर मेलबलि ओर नज्जो री बलि चढ़ाई की तेसरी आराधना करनी ओर यहोवे खे मान्नता मानी की पूरी बी करनी। 22 यहोवे मिस्रो रे लोका खे सजा देणी। फेर यहोवे सेओ ठीक बी करने ओर सेयो यहोवे रिया तरफा खे फिरने ओर तेस तिना री प्रार्थना सुणी की सेयो ठीक करने। 23 तेस बखते मिस्र देशो ते अश्शूर देशो खे जाणे खे एक मुख्य बाट ऊणी ओर अश्शूरी मिस्रो रे आऊणे ओर मिस्री लोक अश्शूरो खे जाणे ओर मिस्रिया अश्शूरिया साथे मिली की परमेशरो री आराधना करेया करनी। 24 तेस बखते इस्राएल, मिस्र ओर अश्शूर तीनो मिली की आपू बीचे एक ऊई जाणे ओर तरतिया खे आशीषा री बजा ऊणे। 25 कऊँकि सेना रे यहोवे तिना तीऊँ खे ये बोली की आशीष देणी, "तन्य ओ मेरी मिस्री प्रजा ओर मेरे बणाए दे अश्शूरी लोक ओर मेरा आपणा इस्सा इस्राएली लोक।"