राजा हिजकिय्याह री मूर्खता
1 तिना दिना दे जेबे हिजकिय्याह ठीक ऊईगा तेस बखते बलदानो रे पाऊए मरोदक बलदाने, जो बाबेलो रा राजा था, तिने हिजकिय्याह रे बमार ऊणे रे बारे दे ओर फेर ठीक ऊणे रे बारे दे सुणी की तेसगे मुबारक देणे खे चिट्ठी ओर पेंट दूता गे पेजी। 2 इना ते हिजकिय्याह राजे खुश ऊई की आपणे कीमती पदार्थो रा पण्डार ओर चाँदी, सूईना, खुशबूदार द्रव्य, खरा तेल ओर आपणे कीमती पण्डारो दे जो-जो चीजा थिया, सेयो सब तिना खे दखाईया। हिजकिय्याह रे मईलो दे ओर पूरे राज दे एड़ी कोई चीज नि रयी जो तिने तिना खे नि दखाई। 3 तेबे यशायाह नबीए हिजकिय्याह राजे गे जाई की पूछेया, "सेयो दूत क्या बोली गे ओर सेयो तांगे केथा ते आई रे थे?" राजा हिजकिय्याहे बोलेया, "सेयो तो दूर देशो ते, मतलब बाबेलो ते आई रे थे।" 4 तेबे यशायाहे तेसते पूछेया, "तिने तेरे मईलो दे क्या-क्या देखेया?" हिजकिय्याहे बोलेया, "जो कुछ मेरे मईलो दे ए, से सब तिने देखेया; मेरे पण्डारो दे एड़ी कोई चीज नि ए, जो मैं तिना खे नि दखाई।" 5 तेबे यशायाह नबीए राजा हिजकिय्याह खे बोलेया, "सेना रे यहोवे रा ये वचन सुणी लो: 6 एड़े दिन आऊणे वाल़े ए, जिना दे जो कुछ तेरे मईलो दे ए ओर जो कुछ आजो तक तेरे बुजुर्गा रा राखेया रा तेरे पण्डारो दे ए, से सारा बाबेलो खे उठी जाणा, यहोवा ईंयाँ बोलोआ कि कोई चीज नि बचणी। 7 जो पाऊ तेरे कुलो दे पैदा ऊणे, तिना बीचा ते बी कई तिना गुलाम बणाई की लई जाणे ओर सेयो खुसरे बणाई की बाबेलो रे राजे रे मईलो दे राजे री सेवा करने खे रणे।" 8 राजा हिजकिय्याहे यशायाह खे बोलेया, "यहोवे रा जो वचन तैं बोली राखेया से खरा ई ए।" तेबे तिने बोलेया, "मेरे जिऊँदे जिऊए तो माखे ओर मेरे लोका खे शान्ति ओर रक्षा बणी दी रणी।"