1 यहोवा आपणे लोका ते ईंयाँ बोलोआ, "न्याय रा पालण करो ओर तर्मो रे काम करो, कऊँकि मां चट ई तुसा रा उद्धार करना ओर मेरा तर्मी ऊणा सामणे आऊणा। 2 से माणूं बऊत ई तन्य ए, जो एड़ा ई करोआ ओर से माणूं जो एते पाँदे स्थिर रओआ, जो रामो रे दिनो खे पवित्र मानोआ ओर अपवित्र करने ते बचेया रा रओआ ओर आपणे आथो खे सब तरआ री बुराई करने ते रोकी राखोआ।" 3 जो परदेशी यहोवे साथे मिली गे रे, सेयो ये नि बोलो, "यहोवे आसे आपणी प्रजा ते पक्का लग करने" ओर खुसरे पनि बोलो, "आसे तो सूके रे डाल़ा ए, जेसरे कोई बच्चे नि ए ओर ना ई कोई भविष्य ए।" 4 कऊँकि जो खुसरे मेरे रामो रे दिनो खे मानोए ओर जेसा गल्ला ते आऊँ खुश रऊँआ, तेतेखे ई मानोए ओर मेरी आज्ञा रा पालण करोए, तिना रे बारे दे यहोवा ईंयाँ बोलोआ, 5 "मां आपणे पवित्र मन्दर ओर आपणी दवाला रे पीतरे तिना खुसरेया खे जो मेरी आज्ञा मानोए एड़ा नाओं देणा जो माठे-बेटिया ते केथी अच्छा ऊणा, मां तिना रा नाओं सदा बणाया रा राखणा ओर से कदी नि मिटाया जाणा। 6 परदेशी बी जो यहोवे साथे एसा इच्छा ते मिले रे ए कि तेसरी सेवा करो ओर यहोवे रे नाओं ते प्यार राखो ओर तेसरे दास ऊई जाओ, जितणे रामो रे दिनो खे अपवित्र करने ते बचे रे रओए ओर मेरी वाचा रा पालण करोए, 7 सेयो मां आपणे पवित्र पाह्ड़ो पाँदे ल्याई की आपणे प्रार्थना रे मन्दरो रे खुश करने, तिना रे होमबलि ओर मेलबलि मेरी बेदिया पाँदे ग्रहण करे जाणे, कऊँकि मेरे मन्दरो खे सब देशो रे लोका खे प्रार्थना रा कअर बोलेया जाणा।"*

8 परमेशर यहोवा, जिने आपणे लोक इस्राएलो दे गुलामिया ते वापस ल्याये, तिने वादा करी राखेया कि तेस ओर बी लोक तिना साथे जोड़ने।*

9 यहोवा बोलोआ, "ओ इस्राएलो रे दुश्मणो, तुसा री सेना जो जानवरा जेड़ी ए, आओ ओर इस्राएलो खे नाश करो, खास करी की तिना रे परदाना खे। 10 इस्राएलो रे परदान अन्दे ए, सेयो सारे के सारे मूर्ख ए, सेयो सारे के सारे गूँगे कुत्ते ए जो पूकी नि सकदे, सेयो सुफने देखणे वाल़े ओर लेटी की रणा ओर सऊणा पसन्द करोए।" 11 सेयो लोक एड़े ए जेड़े पूखे कुत्ते ए जो कदी नि रज्जदे। सेयो गवाल़े ए, जिना रे समज नि ए, तिने सबी आपणे-आपणे फायदे खे आपणी-आपणी बाट लई राखी। 12 सेयो एकी दूजे खे बोलोए, "आओ, आसे शराब ल्याऊँए, आओ शराब पी की रज्जी जाऊँए, काल का दिन बी आजके दिनो जेड़ा ई बऊत अच्छा ऊणा।"*