यशायाह 14

याकूबो पाँदे दया

1 यहोवे आपणे लोका इस्राएलो पाँदे दया करनी ओर इस्राएल फेर अपनाई की, तिना रे ई देशो दे बसाणा ओर कई परदेशी लोक तिदे मिली जाणे ओर तिना आपणे आपू खे याकूबो रे वंशो साथे मिलाई लणा। 2 कई देशा रे लोका इस्राएलो रे लोका री तेस देशो दे वापस आऊणे दे मताद करनी जो यहोवे तिना खे देई राखेया था। ओर इस्राएलो रा कराना परमेशरो री जमीना दे तिना रा अधिकारी ऊई जाणा ओर तिना सेयो दास-दासिया बनाणे, कऊँकि इस्राएली लोका सेयो बन्दी बनाणे जो तिना खे गुलामिया दे लईगे थे ओर जो तिना पाँदे अत्याचार करो थे, तिना पाँदे तिना राज करना।

बाबेलो रे राजे रा नाश ऊणा

3 जेस दिने यहोवा ताखे तेरे कष्टा ते ओर कबराणे ते ओर तेसा कठण मईणता ते जो तांते लई, राम देयोगा, 4 तेबे तुसा ये गाणा गायी की बेबीलोनो रे राजे रा मजाक उडाणा, "मईणत कराणे वाल़ा केड़ा नाश ऊईगा, सुनहरे मईलो वाल़ा शईर केड़ा नाश ऊईगा रा। 5 यहोवे दुष्टा रे सोठे ओर अन्याय साथे शासन करने वाल़ेया रे डण्डे तोड़ी ते दे, 6 जिना ते सेयो माणूंआ खे लगातार रोषो रे मारे बांदे रओ थे ओर जातिया-जातिया पाँदे रोषो साथे राज करी की ओर लगातार तिना पीछे पड़े रे रओ थे। 7 एबे सारी तरतिया रे लोका खे राम मिली रा, से चैनो साथे ए, लोक जोरे की गाओए।" 8 सनौबर ओर लबानोनो रे देवदार बी तां पाँदे खुशिया रे गाणे गाओ, "जदुओ ते तूँ थाले सेटेया, तदुओ ते कोई बी आसा खे बाडणे नि आया।" 9 पताल़ो निठे अधलोक मतलब मरेया री जगा दे तां साथे मिलणे खे अलचल ऊणे लगी री, से तेरिया तँईं मुड़देया खे, मतलब तरतिया रे सबी सरदारा खे जगाओआ ओर से जातिया-जातिया ते सबी राजेया खे तिना रे सिंहासनो ते चकी की खड़ा करोआ। 10 सेयो सारे बेबीलोनो रे पईलके राजे खे बुलाओए, "क्या तूँ बी आसा जेड़ा कमजोर ऊईगा रा? क्या तूँ आसा जेड़ा ई बणी गा रा? 11 तेरा वैभव ओर तेरी सारंगिया री आवाज अधलोको दे उतारी राखी, कीड़े तेरा बछौणा ओर कंसल़ोई तेरा टखण ए।"

लूसिफरो रा नाश ऊणा

12 ओ प्यागा रे चमकणे वाल़े तारे*14:12 ओ प्यागा रे चमकणे वाल़े तारे बेबीलोनो रा राजा , तूँ किंयाँ सर्गो ते थाले पड़ेया? तूँ जो जातिया-जातिया खे अराई देयो था, तूँ एबे केड़ा बाडी की जमीना दे सेटी राखेया?*14:12 लूक. 10:18, यहे. 28:13-17 13 तूँ मनो दे बोले तो था, "मां स्वर्गो दे चढ़ना, मां आपणा सिंहासन परमेशरो रे तारेया ते जादा ऊच्चा करना ओर उत्तर दिशा रे कूणे पाँदे सभा रे पाह्ड़ो पाँदे बैठणा;*14:13 मत्ती 11:23, लूक. 10:15 14 मां बादल़ो ते बी ऊच्ची-ऊच्ची जगा ते पाँदे चढ़ना, आऊँ परमपरदान परमेशरो जेड़ा ऊई जाणा।" 15 पर तूँ अधलोको रे गड्डे रिया थालिया दे सेटेया।*14:15 मत्ती 11:23 लूक. 10:15 16 जिना तूँ देखणा, तिना ताखे देखी की तेरे बारे दे सोच-बिचार करी की बोलणा, "क्या ये सेई मर्द ए जो तरतिया खे चैना साथे रणे नि देयो था ओर राज-राज खे डराई देयो था, 17 जो दुनिया खे जंगल़ बणाओआ ओर तिना रे शईर टाल़ी देयो था ओर आपणे गुलामा खे कअरे नि जाणे देयो था।" 18 जातिया-जातिया रे सब राजा आपणे-आपणे कअरो दे महिमा साथे रामो दे पड़ी रे। 19 पर तूँ नकम्मी पाँगटिया जेड़ा आपणी कब्रा बीचा ते बारे सेटेया गया, तेरे चऊँ कनारे काये रे मुड़दे पड़ी रे, जो तलवारी साथे काई की गड्डेया दे पात्थरा बीचे सेटी री लाशा जेड़े पड़ी रे। 20 तूँ ओरी राजेया जेड़ा कब्रा दे नि दबाणा, कऊँकि तैं आपणा देश उजाड़ी ता ओर आपणी प्रजा काई राखी। कुकर्मिया रे कुलो रा नाओं बी कदी नि लया जाणा। 21 लोक ईंयाँ बोलोए, तिना रे बुजुर्गा रे पापो रिया बजा ते राजे रे पाऊआ खे काणे री त्यारी करो, एड़ा नि ओ कि सेयो फेर उठी की तरतिया रे अधिकारी ऊई जाओ ओर दुनिया दे बऊत सारे शईर बसाओ।

परमेशरो रा बाबेलो खे नाश करना

22 सेना रे यहोवे री ये बाणी ए, "मां तिना रे खलाफ उठणा ओर बाबेलो रा नाओं-नशाण मिटाई देणा ओर माठे-पोते बाडी देणे।" यहोवे री येई बाणी ए। 23 "मां बेबीलोन उल्लूआ रे कअर ओर पाणिए री नदी करी देणी ओर मां से सत्यानाशो रे जुड़े साथे चाड़ी देणा।" सेना रे यहोवे री ये बाणी ए।

अश्शूरिया रा नाश ऊणा

24 सेना रे यहोवे ये कसम खाई राखी, "पक्का जेड़ा मैं ठाणी राखेया, तेड़ा ई ऊई जाणा ओर जेड़ी मैं योजना करी राखी, तेड़ी ई पूरी ऊणी। 25 मां अश्शूर आपणे ई इस्राएल देशो दे तोड़ी देणा ओर आपणे पाह्ड़ा पाँदे से माँडी देणा; तेबे तेसरा जूँगड़ा तिना री क्याड़िया पाँदा ते ओर तेसरा बोजा तिना री कांदा पाँदा ते उतरी जाणा।" 26 येई योजना सारी तरतिया खे ठराई राखी ओर ये सेई आथ ए, जो सबी जातिया पाँदे बढ़ी रा। 27 कऊँकि सेना रे यहोवे योजना करी राखी ओर तिजी खे कुण टाल़ी सकोआ? तेसरा आथ सजा देणे खे आगे बढ़ायी राखेया, तिजी खे कुण रोकी सकोआ?

पलिश्तीन देशो रा नाश

28 जेस साले यहूदा रा राजा आहाज मरेया, तेस साले ई ये पारी भविष्यबाणी मांगे आई थी, 29 "ओ सारे पलिश्तीन तूँ इजी री खातर खुशी नि मना कि ताखे मारने वाल़े राजा मरीगा। पर तेसरे एकी पाऊए आई की राज करना। से तुसा खे एकी एड़े सापो जेड़ा ऊणा जेस जईरीले नाग पैदा करने। से नवां राजा तुसा खे एक खतरनाक नागो जेड़ा ऊणा। 30 पर मेरे गरीब लोका रे बच्चेया बिना डरे खाणा ओर जरूरतमंद लोक बिना डरे रणे, पर ओ पलिश्तीन मां तेरा कुल अकाल़ पाई की काई देणा ओर तेरे बचे रे लोक काये जाणे।" 31 ओ शईरो रे बड़े द्वार, तूँ हाय, हाय कर; ओ शईर, तूँ मतादा रिया तँईं रोओ, ओ पलिश्तीन, तूँ सारा का सारा गल़ी जा! कऊँकि उत्तरा रिया तरफा ते एक तुआँ उठणा ओर तेसरी सेना बीचा ते कोई पीछे नि रणा। 32 तेबे पलिश्ती देशो रे दूता खे क्या ज्वाब देया जाणा? ये कि यहोवे सिय्योनो री निऊँ पायी राखी ओर तेसरी प्रजा रे दीन लोका तिदे शरण लणी।