ठीक ओर गल़त बअरत
1 यहोवे भविष्यबक्ते ते बोलेया, "गल़ा खोली की आका पा, कुछ नि राख, रड़सिंगे जेड़ी ऊच्ची आवाज कर; मेरे लोका इस्राएलिया रा बरोद, मतलब याकूबो रे कराने खे तिना रे पाप बताई दे। 2 सेयो हर रोज मेरे मन्दरो दे मेरी पूजा करने आओए ओर मेरी चाल जाणने री इच्छा एड़ी राखोए मानो सेयो तर्मी लोक ए जिने आपणे परमेशरो रे नियम नि टाल़े; सेयो मांते तर्मो रे नियम पूछोए ओर परमेशरो रे नेड़े आऊणे ते खुश ओए।" 3 एबे सेयो लोक यहोवे ते पूछोए, "क्या बजा ए कि आसे बअरत राखी राखेया, पर तैं एतेरी सुधि नि लई? आसे दु:ख उठाया, पर तैं कोई त्यान नि दित्तेया?" यहोवा तिना ते बोलोआ, "सुणो, बअरतो रे दिने तुसे आपणी ई इच्छा पूरी करोए ओर आपणे नौकरा ते कठण काम कराओए। 4 जेबे तुसे बअरत करोए तेबे पूखा रिया बजा ते लड़ाई-चगड़ा करोए ओर दुष्टता साथे मुक्केया साथे आपू बीचे मारा-मारी करोए। जे तुसे चाओए कि तुसा री प्रार्थना ऊबे स्वर्गो दे परमेशर सुणो तेबे तुसा खे बअरत ईंयाँ नि राखणा चाईए जिया तुसे आजकाल राखोए। 5 जेस बअरतो ते आऊँ खुश ओऊँआ, मतलब जिदे माणूं आपू खे दीन करो, क्या तुसे एड़ा करोए? क्या सिरो खे नंगल़ो जेड़ा नपाणा, आपू निठे टाट बछाणा ओर स्वा बिखरने खे ई तुसे बअरत ओर परमेशरो खे खुश करने रा दिन बोलोए?58:5 मत्ती 6:16, जक. 7:5 6 जेस बअरतो ते आऊँ खुश ओऊँआ, से क्या ये नि ए कि अन्याय साथे बणाए रे दास ओर अन्देर सयीन करने वाल़ेया रा जूँगड़ा तोड़ी की सेयो छुड़ाई लणे ओर सबी जूँगड़ेया रे टुकड़े-टुकड़े करी देणे?58:6 लूक. 4:18,19, नसी. 21:3, याकू. 1:27 7 आऊँ चाऊँआ कि तुसे पूखे लोका साथे रोटी बाँडो, आऊँ चाऊँआ कि तुसे एड़े अनाथ ओर जो बिना कअरो रे ए, तिना खे आपणे कअरे ल्याओ, केसी खे नांगा देखी की तेसखे टाल्ले पन्याणे ओर आपणे रिश्तेदारा री मताद करने ते नि मुकरना।"58:7 इब्रा. 13:2-3, नसी. 25:21; 28:27, मत्ती 25:35,36 8 तेबे तेरा तेज तड़के रे प्रयासे जेड़ा चमकणा ओर तूँ फटाफट ठीक ऊई जाणा; तेरा तर्म तांते आगे-आगे चलणा, यहोवे री तागतबर उपस्थिती तां पीछे रक्षा करदी चलणी।58:8 पज. 37:6, यिर्म. 33:6, लूक. 1:78,79 9 तेबे तां मांते प्रार्थना करनी ओर यहोवे ज्वाब देणा, तां दुहाई देणी ओर तेस बोलणा, "आऊँ एती ए।" जे तूँ अन्देर करना, ओर दोष लगाणा ओर दुष्ट गल्ला बोलणा छाडी दे, 10 पूखेया खे रोटी दे ओर शरीफ-दु:खिया खे सन्तुष्ट करे, तेबे न्हेरे दे तेरा प्रयासा चमकणा ओर तेरा अन्दकूप न्हेरा त्याड़िया रे प्रयासे जेड़ा ऊई जाणा। 11 यहोवे तूँ लगातार आपू साथे चलाणा ओर जेबे अकाल़ पड़ना तेबे ताखे खाणे खे रोटी देणी ओर तेरिया आड्डिया पक्किया करनिया ओर तूँ सींजे रे बगीचे ओर एड़ी सूबल़ा जेड़ा ऊणा जेतेरा पाणी कदी नि सूकदा।58:11 यूह. 7:38 12 तेरे कराने रे लोका बऊत बखतो ते बेबीलोनो दे ऊजड़ी रिया जगा दे पड़ी रा फेर बसाणियां; तां कई पीढ़िया ते पड़ी रिया निऊँआ पाँदे कअर बनाणा; तेरा नाओं टूटे रे बाड़ो रा सुदारने वाल़ा ओर बाटा खे ठीक करने वाल़ा पड़ना।
रामो रे दिनो रा पाल़न करना
13 यहोवा बोलोआ, "जे तूँ रामो रे दिनो खे अपवित्र नि करे, मतलब मेरे तेस पवित्र दिनो रे आपणी इच्छा पूरी करने री कोशिश नि करे ओर रामो रे दिनो खे खुशिया रा दिन ओर यहोवे रा पवित्र कित्तेया रा दिन करी की माने; जे तूँ तेतेरी इज्जत करी की तेस दिने आपणी बाटा रे नि चले, आपणी इच्छा पूरी नि करे ओर आपणियां ई गल्ला नि बोले, 14 तो तूँ यहोवे रिया बजा ते सुखी ऊणा ओर मां ताखे सबी ते ऊच्चे पाह्ड़ो ते राज करने देणा; मां ताखे तेरे मूलमर्द याकूबो रे इस्से री उपजा बीचा ते खुलाणा, कऊँकि यहोवे रेई मुंए ते ये वचन निकल़ी रा।"