1 पईरेदारो रे रूपो दे नबी पूछोआ, "ये कुण ए जो एदोम देशो रे बोस्रा शईरो ते लाल टाल्ले पईनी की आऊणे लगी रा, जो बऊत तागतबर ओर सुन्दर टाल्ले पईनी की मजे दे आऊणे लगी रा?" यहोवे ज्वाब दित्तेया, "ये आऊँ ईए यहोवा, जो तर्मो साथे बोलोआ ओर उद्धार करने री शक्ति राखोआ।" 2 भविष्यबक्ता यहोवे ते पूछोआ, "तेरे टाल्ले लाल कऊँ ए? क्या बजा ए कि तेरे टाल्ले अऊदो रे अंगूर केसणे वाल़ेया जेड़े ए?" 3 यहोवे ज्वाब दित्तेया, "मैं तो कल्ले ई अऊदो रे अंगूर केसी राखे ओर देशो रे लोका बीचा ते किने बी मेरा साथ नि दित्तेया; आ, मैं रोषो दे आई की सेयो केसी ते ओर जल़ी-फूखी की सेयो फड़ाके; तिना रे खूनो रे छीटे मेरे टाल्लेया पाँदे पड़ी रे, जेते कि मेरे सारे टाल्लेया दे तब्बे लगी गे रे।* 4 कऊँकि मेरे मनो दे सई न्याय करी की सजा देणे रा बखत था ओर यहूदा रे आपणे लोका खे बचाणे रा साल आई गा रा। 5 मैं ओर-पोरे टोल़ेया, पर कोई मेरी मताद करने वाल़ा नि दिशेया; माखे हैरानी बी ऊई कि कोई सम्बाल़ने वाल़ा नि था; तेबे मैं आपणी ई सामर्था साथे उद्धार कित्तेया ओर मेरी जल़ने ई आऊँ सम्बाल़ेया। 6 आ, मैं रोषो रे आई की देश-देशो रे लोको खे सजा दित्ती आपणी जल़ना ते मैं सेयो मतवाल़े करीते ओर तिना रा खून जमीना दे बाह्यी ता।"

7 मां ए बताणा कि यहोवा दया करने वाल़ा ए ओर मां यहोवे री स्तुति करनी याद राखणी, मतलब इस्राएलो रे कराने पाँदे दया ओर बऊत करूणा करी की तिने आसा साथे जितणी पलायी करी राखी, तिना सबी रे मुताबिक मां यहोवे रिया करूणा रे कामो रा ओर तेसरा गुणगाण करना। 8 यहोवे बोलेया था, "इस्राएली मेरी प्रजा रे लोक ए, एड़े बाल़क ए इना कदी बी तोखा नि देणा; ओर से तिना रा उद्धार करने वाल़ा ऊईगा। 9 तिना री सारी मुसीबता रे तेसखे बी कष्ट ऊआ ओर तेस सामणे रणे वाल़े दूते तिना रा उद्धार कित्तेया; प्यार ओर नरमाईया साथे तिने आपू ई सेयो छुड़ाए; तिने सेयो चके ओर बऊत बखतो ते सदा तिना खे लई की चलेया। 10 तेबे बी इस्राएलिये बगावत कित्ती ओर यहोवे री पवित्र आत्मा दु:खी कित्ती; इजी बजा ते से बदली की तिना रा दुश्मण ऊईगा ओर आपू ई तिना साथे लड़ने लगेया।"* 11 तेबे परमेशरो रे लोका खे तिना रे पुराणे दिन, मतलब मूसे रे दिन याद आए, सेयो बोलणे लगे, "जो आपणी पेडा खे तिना रे ग्वाल़ेया समेत समुद्रो ते निकयाल़ी की ल्याया से केयी ए? जिने तिना बीचे आपणा पवित्र आत्मा पाया, से केयी ए? 12 यहोवे आपणी प्रतापी सामर्थ मूसे रे दाँणे आथो साथे करी ती, यहोवे तिना सामणे लाल समुद्रो रे पाणिए रे पार जाणे खे दो इस्से करी की आपणा सदा रा नाओं करी ता, 13 जो तिना खे डूगे समुद्रो ते लई चलेया; जिंयाँ कोड़ेया खे उजाड़ जगा दे, तिंयाँ ई तिना खे बी ठोकर नि लगी, से केयी ए? 14 जिंयाँ करेलू डांगर तराईया रे उतरी जाओआ, तिंयाँ ई यहोवे री आत्मे तिना खे राम दित्तेया। इजी बजा ते तैं आपणी प्रजा री अगुवाई कित्ती ताकि आपणा नाओ महिमा साथे फरेया रा बणाओ।"

15 ओ यहोवा तू स्वर्गो ते, जो तेरी पवित्र ओर महिमा साथे परी री रणे री जगा ए, देख। तेरी जल़न ओर पराक्रम केई रये? तेरी दया ओर करूणा मां पाँदा ते अटी गी री। 16 देख, तूँ ई म्हारा बाओ ए, तेबे बी म्हारा पुर्वज अब्राहम आसा खे नि पछयाणदा ओर म्हारा पुर्वज इस्राएल आसा खे नि मानदा; तेबे बी ओ यहोवा, तूँ म्हारा बाओ ओर म्हारा छुड़ाणे वाल़ा ए; पुराणे बखतो ते येई तेरा नाओं ए।* 17 ओ यहोवा, तूँ आसा खे म्हारी बाटा ते पटकाई देया ओर म्हारे मन एड़े काठे करेया कि आसे तेरा डर नि मानदे? आपणे दास, आपणे इस्से रे गोत्रो रिया खातर वापस आओ। 18 तेरी पवित्र प्रजा तो थोड़े ई बखतो तक तेरी पवित्र जगा री अधिकारी रयी, एबे म्हारे दुश्मणे तुसा री पवित्र जगा केसी ती दी ए। से उजाड़ी ती री।* 19 कदी-कदी आसे लोक तो एड़े ऊईगे रे, मानो तैं आसा पाँदे कदी राज नि कित्तेया ओर तिना जेड़े जिना खे तेरे नि बोलेया गया।