यशायाह 20

नांगे नबीए रा नशाण

1 जेस बखते अश्शूरो रे राजा सर्गोनो री आज्ञा ते तर्त्ताने पलिश्तिया रे शईर अशदोदो दे आई की तेस साथे युद्ध कित्तेया ओर तेस पाँदे आपणा कब्जा करी ला। 2 तेस बखते यहोवे आमोसो रे पाऊ यशायाह खे बोलेया, "जाई की आपणे लको री शोगो री टाट खोल ओर आपणे बूट खोल।" यशायाहे यहोवे री आज्ञा मानी ओर से बगैर टाल्लेया ते नांगा ओर पताणे पैरे कूमणे फिरने लगेया। 3 तेबे यहोवे बोलेया, "जिंयाँ मेरा दास यशायाह तीऊँ साला ते बगैर टाल्लेया ते नांगा ओर बगैर बूटा ते पताणे पैरे चलदा आई रा, ताकि मिस्र ओर कूश देशो खे नशाण ओर उदारण ओ, 4 तिंयाँ ई अश्शूरो रे राजे मिस्र ओर कूश देशो रे लोका खे बन्दी बणाई की देश निकाल़ा देणा, क्या बच्चे, क्या स्याणे, सारे बन्दी बणाई की नांगे ओर पताणे पैरे ओर पूरे नांगे लई जाणे, ताकि मिस्र शर्मिंदा ओ। 5 जो लोक मतादा रिया तँईं कूश देशो रिया तरफा खे देखेया करो थे, ओर मिस्र, जेसरी बजा ते पलिश्ती कमण्ड करो थे, बेचैन ओर शर्मिंदा ऊई जाणा।" 6 तेस दिने तेबे भूमध्य समुद्रो रे कनारे रणे वाल़े पलिश्ती ओर यहूदा रे लोका बोलणा, "देखो, जिना पाँदे मिस्रो रे लोक उम्मीद राखो थे ओर जिना गे आसे अश्शूरो रे राजे ते बचणे खे नठणे वाल़े थे, तिना री एड़ी दशा ऊई गी री, तो तेबे आसे लोक किंयाँ बची सकूँ थे?"