यशायाह 21

बाबेलो रे नाशो रा दर्शण

1 समुद्रो*21:1 समुद्रो ये फरात नदी ओर तेतेरे पाणिये की टकी री दलदला रे सारे इलाके खे बताओआ रे नेड़े री उजाड़ जगा रे बारे दे परमेशरो री पारी भविष्यबाणी, जिंयाँ यहूदा रे दक्खणा*21:1 यहूदा रे दक्खणा बेबीलोन ते प्रचण्ड तूफान आओआ, से जंगल़ो ते मतलब, डराऊणे देशो ते नेड़े आऊणे लगी रा। 2 परमेशरे माखे कष्टो रिया गल्ला रा दर्शण दखाया, विश्वासघाती विश्वासघात करोआ ओर नाश करने वाल़ा नाश करोआ। ओ एलामो रे लोको, अमला कर, ओ मादै रे लोको, केरी लो, तेसरा सारा कणना आऊँ बन्द करी देऊँआ। 3 इजी बजा ते मेरे लको दे बऊत पीड़ ए; माखे मानो बच्चा पैदा करने री जी पीड़ा ऊणे लगी रिया, आऊँ एड़ी मुसीबता दे पड़ीगा रा कि कुछ सुणदा नि, आऊँ एड़ा कबराईगा रा कि कुछ दिशदा नि। 4 मेरा दिल धड़कोआ, आऊँ बऊत डरीगा रा, जेसा साँजा खे आऊँ न्याल़ूँ था, से तिने मेरे डरने री बजा बणाई ती री। 5 दर्शणो दे बेबीलोनो रे लोक पाट्टिया री त्यारी करने लगी रे, चादरी बछाणे लगी रे, खाणे-पीणे लगी रे। अचाणक एक आवाज सुणने लगी; ओ सेना रे परदानो, आपणियां ढाला दे तेल लगाओ! 6 कऊँकि प्रभुए माखे ईंयाँ बोली राखेया, "जाई की एक पईरेदार खड़ा करी दे ओर से जो कुछ देखो से बताओ। 7 जेबे से चौकीदार देखो, जो दो-दो करी की आओए ओर गह्दे ओर ऊँटा रे सवार, तेबे बऊत ई त्यान देई की सुणो।" 8 तेबे पईरेदारे शेरो री आवाजा जेड़ी आक पायी, "ओ स्वामी, आऊँ पूरा दिन खड़े ऊई की पईरा देंदा रया ओर मैं पूरी रात बी पईरा दित्तेया। 9 तेबे मैं क्या देखेया कि माणूंआ रा दल ओर दो-दो करी की कोड़ेया रे सवार आऊणे लगी रे!" तेबे तिने ज्वाब दित्तेया, "टल़ी गा, बाबेल टल़ी गा ओर तेथो रे सबी देवतेया रिया कअड़ी रिया मूर्तिया जमीना दे चकनाचूर करी ती रिया।"*21:9 प्रका. 14:8, प्रका. 18:2 10 तेबे यशायाहे बोलेया, "ओ मेरे फड़ाके रे ओर मेरे खल्याणो रे नज्ज, जो गल्ला मैं इस्राएलो रे परमेशर सेना रे यहोवे ते सुणी राखिया, सेयो मैं तुसा गे बताई ती रिया।"

एदोम देशो खे परमेशरो रा सन्देश

11 परमेशर एदोमो रे बारे दे ईंयाँ बोलोआ। सेईर पाह्ड़ो ते कोई माखे आका पाणे लगी रा, "ओ पईरेदार, रात कितणी बची री? ओ पईरेदार रात एबु कितणी देर ओर रणी?"*21:11 उत्प. 32:3 12 पईरेदारे ज्वाब दित्तेया, "प्याग ऊणे वाल़ी ए ओर रात फेर आऊणी। जे तूँ मांते कुछ पूछणा चाएया तो वापस आओ ओर मांते पूछी लो।"

अरबो रिया तँईं परमेशरो रा सन्देश

13 अरब देशो रे बारे दे परमेशरो रा पारी वचन: ओ ददानी शईरो रे यात्रियो*21:13 ओ ददानी शईरो रे यात्रियो ये ऊँटा या गह्देया रा एक चूण्ड ओआ जो समान टोणे रा काम करो थे। , तुसा खे अरबो रे जंगल़ो दे रात बिताणी पड़नी। 14 ओ तेमा देशो रे रणे वाल़ेयो, जो त्याये ए तिना खे पाणी देयो ओर जो आपणे दुश्मणा ते बची की नठणे लगी रे तिना खे मिली की रोटी खाणे खे देयो। 15 कऊँकि सेयो लोक तलवारी रे सामणे ते, बल्कि नांगी तलवारी सामणे ते ओर ताणे रे धनुष ओर घोर युद्धो ते नठी रे। 16 प्रभुए माखे बोलेया, "मजदूरो रे साला रे मुताबिक एकी सालो दे केदारो*21:16 केदारो केदारो रे गोत्रो रे सारे वैभवो रा अन्त ऊई जाणा। 17 ओर केदारो रे धनुर्धारी शूरवीरा बीचा ते थोड़े ई रयी जाणे, कऊँकि इस्राएलो रे परमेशर यहोवा एड़ा बोली राखेया।"