1 ए बुरा सन्देस मोआब देशो रे बारे दे ए। एकी राती मोआब देशो रे आर ओर कीर शईर सिपाईए लूटिते तेसा ई राती से शईर नाश बी करीते। ओर मोआब दुश्मणा रे जरीये नाश करिता दा ए। 2 बैत ओर दीबोन शईरो रे लोक मन्दरो पाँदे रोणे खे ऊबे पाह्ड़ो चढ़ीगे, नबो ओर मेदबा शईरो रिया तँईं मोआब हाय, हाय करोआ। तिना सबी रे सिर गँजे ओर सबी री दाढ़िया बी गँजिया ए। 3 मोआबो रे लोके सड़का दे ये दखाणे खे कि सेयो दु:खी ए शोगो रिया टाटा पईनी राखिया, छता पाँदे* ओर शईरो रे चौका दे हर कोई आसू बाह्ंदे ऊए हाय, हाय करोए। 4 हेशबोन ओर एलाले शईरो रे लोक चींगणे लगी रे, ओर तिना री आवाज यहस शईरो तक सुणोई, इजी बजा ते मोआबो रे सिपाई चींगणे लगी रे, तिना रा जियू बऊत उदास ए। 5 मेरा मन मोआबो खे दुहाई देयोआ, तेसरे अमीर लोक सोअर ओर एग्लतशलीशिया शईरो खे नठणे लगी रे। देखो, लूहीत शईरो री पाह्ड़िया री क्वाल़िया दे सेयो रोंदे ऊए चढ़ने लगी रे; सुणो, होरोनैम शईरो री बाटा दे सेयो नाश ऊणे खे चींगणे लगी रे। 6 निम्रीम नदिया रा पाणी सूकीगा, काआ बी सूकीगा ओर अरीयाली मुरझाई गी ओर कोई सीन्नक नि रयी। 7 इजी री खातर जो तअन तिने बचाई की राखेया ओर जो कुछ तिने कट्ठा कित्तेया था, तेस सबी खे सेयो तेसा काट्टिया ते पार निणे लगी रे, जिदे बियूँसो रे डाल़ ए। 8 इजी बजा ते मोआब देशो दे हर केथी मुसीबता दे चींगणा ई सुणने लगी रा। तेथो रा हाहाकार दक्खणा दे एग्लैम शईर ओर उत्तरा दे बेरेलीम शईरो दे बी सुणोआ। 9 कऊँकि दीमोन शईरो री नदी खूनो साथे परी री ए, तेबे बी मां दीमोनो खे ओर दु:ख देणे, मां बचे रे मोआबिया खे ओर तिना रे देशो ते नठे रे लोका रे खलाफ शेर पेजणे।