सदा रिया शान्तिया री वाचा
1 ओ बेऔलाद जवाणस,54:1 यरूशलेम शईर तू जो पाऊआ ते बिना ए जयजयकार कर; तू, जेसा खे जो जमणे रिया पीड़ा नि ऊईया, गल़ा खोली की जयजयकार कर ओर बोल! कऊँकि छाडी रिया रे बच्चे सवागणी रे बच्चेया ते जादा ऊणे, यहोवे रा येई वचन ए।54:1 पज. 113:9, गला. 4:27 2 जेते तम्बूए दे तुसे रओए तिजी री जगा चौड़ी कर ओर तेरे डेरे रे फल़़े लाम्बे करे जाओ; आथ नि रोक, रस्सिया खे लाम्बा ओर खूँडिया खे मजबूत कर। 3 कऊँकि तू दाँणे-खूँजे बऊत बढ़नी ओर तूँ ओर तेरे कुलो दूजे देशा दे कब्जे वाल़ी जमीन वापस लई लणी ओर तेथो रे लोक नठाणे ओर जो शईर उजड़े दे ए सेयो फेर बसाणे। 4 डर नि, कऊँकि तेरी उम्मीद फेर नि टूटणी; कबरा नि, कऊँकि तू फेर शर्मिंदा नि ऊणी ओर तू उदास नि ऊणी; कऊँकि तू एक जवान लाड़िया जेड़ी आपणी बेशर्मी पूली जाणी ओर आपणी बिदुआ री बदनामी फेर याद नि करनी। 5 कऊँकि ताखे बनाणे वाल़ा परमेशर तेरा लाड़ा ए, तेसरा नाओं सेना रा यहोवा ए; ओर इस्राएलो रा पवित्र परमेशर तेरा छुड़ाणे वाल़ा ए, तेसखे सारी तरतिया रा परमेशर बी बोलेया जाणा। 6 कऊँकि यहोवे तूँ एड़ी बुलाई राखी, मानो तूँ छाडी री, दु:खिया ओर जवानिया दे छाडी री जवाणस ए, तेरे परमेशरो रा येई वचन ए।
7 दूई कड़िया खे ई मैं तू छाडी ती थी, पर एबे बड़ी दया करी की मां तुँ फेर राखी लणी। 8 रोषो दे आई की मैं थोड़ी देरा खे तांते आपणा मूँ लकोया था, पर एबे अनन्त करूणा करी की मां तां पाँदे दया करनी, तेरे छुड़ाणे वाल़े यहोवे रा येई वादे रा वचन ए। 9 ये मेरी नजरा रे नूह रे बखतो रे जलप्रलय जेड़ा ए; कऊँकि जिंयाँ मैं कसम खाई थी कि नूह रे बखतो रे जलप्रलय ते तरती फेर नि डूबणी, तेड़ी ई मैं ये कसम बी खाई कि फेर कदी तां पाँदे रोष नि करना ओर ना ताखे तमकी देणी। 10 चाए पाह्ड़ अटी जाओ ओर पाह्ड़िया टल़ी जाओ, तेबे बी मेरी दया तां पाँदे ते कदी नि आटणी ओर मेरी शान्ति देणे वाल़ी वाचा नि टल़नी, यहोवा, जो तां पाँदे दया करोआ, तेसरा येई वचन ए।
नवां यरूशलेम शईर
11 यहोवा बोलोआ, "ओ यरूशलेम शईरो रे लोको, तुसे जो दुश्मणा रे सताए रे ए ओर जिना खे शान्ति नि मिली, सुणो, मां तुसा रे शईरो रे पात्थर कड़ी की बठयाल़ने ओर तुसा रे शईरो री निऊँ नीलमणिया साथे पाणी। 12 तेरे कल़श मां माणिको साथे, तेरे शईरो रिया सारिया दवाला लालड़िया साथे ओर तेरे सारे बन्ने सुन्दर रत्नो साथे बनाणे।54:12 प्रका. 21:18-21 13 तेरे सारे बच्चे यहोवे रे सिखाए रे ऊणे ओर तिना खे बऊत शान्ति मिलणी।54:13 पज. 119:165, यूह. 6:45 14 तू तार्मिकता रे जरीये पक्की ऊणी; तू अन्देरो ते बचणी, कऊँकि ताखे डरना नि पड़ना ओर तू डरने ते बचणी, कऊँकि डरो री बजा तांगे गे नि आऊणी। 15 सुण, लोका पीड़ लगाणी, पर मेरी तरफा ते नि; जितणेया लोका तुसा पाँदे अमला करना, सेयो तुसा बन्दी बणाई लणे। 16 सुण, एक ल्वार कोईले री आग बाल़ी की आपणे कामो खे जरूरी अथियार बणाओआ, से मेरा ई बणाया राए। उजाड़ने खे बी मेरी तरफा ते एक नाश करने वाल़ा बणाई राखेया।54:16 नसी. 16:4, निर्ग. 9:16, रोम. 9:22 17 जितणे अथियार तेरे नुकशाणो खे बणाए जाओगे, तिना बीचा ते कोई सफल नि ऊणा ओर जितणे लोक दुश्मण ऊई की ताखे दोषी ठराओगे, तिना सबी ते तूँ जीती जाणा। यहोवे रे दासो रा येई इस्सा ऊणा ओर सेयो मेरी बजा ते ई जीतणे। यहोवे री येई बाणी ए।"