यशायाह 3

यहूदा प्रदेश ओर यरूशलेम शईरो रा न्याय

1 सुणो, प्रभु सेना रे यहोवे यरूशलेम ओर यहूदा रा सबी प्रकारा रा साअरा ओर सरयाणा, मतलब नज्जो रे सारे आधार ओर पाणिए रे सारे आधार दूर करी देणे। 2 तेस वीर ओर योद्धा, न्यायी ओर नबी, चूठी भविष्यबाणी करने वाल़े ओर स्याणे, पंजा सिपाईया रे सरदार ओर कुलो रे परदान, 3 पंजा सिपाईया रे सरदार ओर उशयार कारीगर ओर जादू करने रे निपुण माणूं बी दूर करने। 4 यहोवा आगे बोलोआ कि मां छोटे माठे तिना रे परदान करी देणे ओर यहूदा रे लोका रे बच्चेया तिना पाँदे राज करना। 5 प्रजा रे लोका आपू बीचे एकी-दूजे पाँदे ओर हर एकी आपणे पड़ोसिये पाँदे अन्देर करना ओर जवान माणूंआ स्याणेया पाँदे ओर नीच माणूंआ जाणे माणे लोका साथे बुरा बर्ताओ करना। 6 तेस बखते जेबे कोई माणूं आपणे बाओ रे कअरे आपणे पाईए खे पकड़ी की बोलोगा, तांगे तो टाल्ले ए, आओ म्हारा न्यायी ऊई जा ओर एस उजड़े रे देशो खे आपणे वशो दे करी दे। 7 तेबे तेस दिने कसम खाई की बोलणा, "आऊँ ठीक करने वाल़ा नि ऊणा, कऊँकि मेरे कअरे ना तो रोटी ए ओर ना टाल्ले, इजी री खातर तुसे माखे प्रजा रा न्यायी नियुक्त नि करी सकदे।" 8 यरूशलेम तो डगमगाया ओर यहूदा टल़ी गा, कऊँकि तिना रे वचन ओर तिना रे काम यहोवे रे खलाफ ए, जो तेसरी तेजोमय आखी सामणे बगावत करने वाल़े ठईरी रे। 9 तिना री शक्ल बी तिना रे खलाफ गवाई देयो ई; सेयो सदोम शईरो दे रणे वाल़ेया लोका जेड़े आपू ई आपणे पापो रा बखान करोए ओर छुपांदे नि। तिना पाँदे हाय! कऊँकि तिने आपणा नुकशाण आपू ई करी राखेया। 10 तर्मिया खे बोलो कि तिना रा पला ऊणा, कऊँकि तिना खे तिना रे कामो रा फल़़ मिलणा। 11 पर दुष्टो पाँदे हाय! तेसरा बुरा ऊणा, कऊँकि तेसरे कामो रा फल़़ तेसखे मिलणा। 12 एबे मेरी प्रजा पाँदे बच्चेया जेड़े अगुवे अन्देर करोए और जवाणसा तिना पाँदे राज करोईया। ओ मेरी प्रजा, तेरे अगुवे ताखे पटकाओए ओर तेरे चलणे री बाट पुलाई देओए।

अन्याय री निंदा

13 यहोवा देश-देशो रे लोका साथे मुकद्दमा लड़ने ओर तिना रा न्याय करने खे खड़ेया राए। 14 यहोवा आपणी प्रजा रे स्याणेया साथे ओर परदाना साथे ये बईस करना चाओआ, "तुसेई बगीचे रे अंगूर खाए और शरीफ लोका रा तअन लूटी की तुसे आपणे कअरे राखी राखेया।" 15 सेना रे परमेशर यहोवे री ये बाणी ए, "तुसे मेरी प्रजा खे कऊँ दल़ो ए ओर शरीफ लोका खे पीसोए?"

सिय्योनो री कमण्डी जवाणस

16 यहोवा ये बी बोलेया, "कऊँकि सिय्योनो रिया जवाणसा*3:16 सिय्योनो रिया जवाणसा यरूशलेमो री जवाणसा कमण्ड करोईया ओर सिर ऊच्चे करी की आखी मटकाओईया ओर कुँगरूआ खे छमछमांदी ऊईया ठुमक-ठुमक करी की चलोईया। 17 इजी री खातर परमेशर यहोवे तिना रे सिर गँजे करने ओर यरूशलेमो दे रणे वाल़िया जवाणसा रा शरीर नांगा करना।" 18 तेस बखते परमेशरो कुँगरू, जाल़िया, 19 चँद्रआर, झुमके, कड़े, कूँडे, 20 पगड़िया, पैकरिया, लको रा बान, खुशबूदार पांडे, ताबीज, 21 छापा, बाल़ू, 22 सुन्दर टाल्ले, कुर्तिया, चाद्दर, बटुए, 23 शीशा, मलमलो रे टाल्ले, बुन्दिया, चादरु, इना सबी री शोभा दूर करनी। 24 खुशबूआ रे बदले सड़यान, सुन्दर चादरुए रे बदले रस्सी, गूँदे रे बाल़ा रे बदले गँजापन, सुन्दर लको रे बानो रे बदले टाटा री पेटी ओर सुन्दरता रे बदले दाग ऊणे।*3:24 ये सब तेबे पईने जाओ थे जेबे कोई मरो था, या कोई दु:ख बताणा ओ था। उत्प. 37:34, 1 राज. 21:27, यहे. 7:18 25 तेरे शईरो रे मर्द तलवारी साथे ओर शूरवीर युद्धो रे मारे जाणे। 26 ओर सिय्योन शईरो रे बड़े द्वारो दे साआ परना ओर शोग करना ऊणा ओर से जमीना दे कल्ली बैठी दी रणी।