1 सोर शईरो रे बारे दे पारी वचन। ओ तर्शीशो रे जाह्जो, हाय, हाय, करो, कऊँकि से ऊजड़ी गा, तेती ना तो कोई कअर ओर ना कोई रणे री जगा ए! ये गल्ला तिना खे कित्तिया रे देशो ते बताई राखिया ए। 2 ओ समुद्रो रे नेड़े रणे वाल़े लोको, जो समुद्रो ते पार जाणे वाल़े सिदोनो रे बपारिये तअनो साथे परी ते दे, चुप रओ! 3 सेओ लोक नज्जो रिया टोल़ा दे समुद्रो रिया बाटा रिये यात्रा करो थे। शीहोरो* रे लोक नील नदिया रे नेड़े री जमीना री फसल समुद्रो री बाटा रिये तेसखे मिलो थी, कऊँकि से ओरी जातिया खे बपारो री जगा थी। 4 ओ सिदोन, शर्मिंदा ओ, कऊँकि समुद्रे, मतलब समुद्रो री मजबूत जगे ये बोली राखेया, "माखे ना तो बच्चा पैदा करने री पीड़ा रा पता ए ओर ना मैं कोई बाल़क पैदा करी राखेया ओर ना मैं कदी पाऊ-मुन्निया पाल़ी राखे।" 5 जेबे सोरो रा सन्देश मिस्रो दे पऊँचो, तेबे सेयो सुणी की मुसीबता दे पड़ने।

6 ओ समुद्रो रे नेड़े रणे वाल़ेयो, हाय। हाय, करो! पार ऊई की तर्शीशो खे जाओ। 7 क्या तुसे एस सोर शईरो दे खुश ए, जो पुराणे बखतो ते बसी रा था, जेस रे पैर तेसखे बसणे खे दूर लई जाओ थे? 8 सोर शईर जो राजेया खे गद्दिया पाँदे बठयाल़ो था, जेसरे बपारी परदान थे ओर जेसरे महाजन पूरी तरतिया दे इज्जतदार थे, तेसरे खलाफ एड़ी योजना किने करी राखी?* 9 सेना रे यहोवे ई तो एड़ी योजना करी राखी कि सारे कमण्डो खे तुच्छ करी देयो ओर पूरी तरतिया रे इज्जतदार लोका री बेज्जती कराओ।

10 ओ तर्शीश शईरो रे रणे वाल़ेयो, नील नदिया जेड़े आपणे देशो दे फैली जाओ, एबे कुछ बन्दन नि रया। 11 यहोवे आपणा आथ समुद्रो पाँदे बढ़ाई की राज ईलाई ते रे, यहोवे कनानो रे मजबूत बजारो खे नाश करने री आज्ञा देई राखी। 12 यहोवा बोलोआ ओ सिदोन शईरो रे लोका री प्रष्ट कित्ती री कुआँरी बेटी, तूँ फेर खुश नि ऊई सकदी, उठ, पार ऊई की कित्तिया रे देशो दे जा, पर तेती बी ताखे चैन नि मिलणा।

13 बेबीलोनो रे देशो खे देखो, से जाति एबे नि रयी, अश्शूरे से देश जंगल़ी जानवरा री जगा बणाई ती, तिने मोर्चा बन्दिया रे आपणे गुम्मट बणाए ओर राजमईल टाल़ी ते ओर सेयो खण्डहर करीते। 14 ओ तर्शीशो रे जाह्जो, हाय, हाय, करो, कऊँकि तुसा री मजबूत जगा ऊजड़ी गी री। 15 तेस बखते एक राजे रे दिनो रे मुताबिक सत्तर साल तक सोर पूलेया रा रणा। सत्तर साल बीतणे ते बाद सोर वेश्या जेड़ा गाणा गाणे लगणा। 16 ओ पूली री वेश्या, बीणा लई की शईरो दे कूम, तू आपणे गीत ठीक-टंगो रे बजा, तू आपणे गीत गाया कर। तेबे तू लोका फेर याद करना।* 17 सत्तर साल बीतणे ते बाद यहोवे फेर सोर शईरो री सम्बाल़ लणी ओर तेसा फेर व्याभिचारो री कमाईया पाँदे मन लगाई की पूरी तरतिया रे सबी राजेया साथे व्याभिचार करना।* 18 जे सोरो रे बपार ओर व्याभिचारो री कमाई, यहोवे खे पवित्र करनी, से ना तो पण्डारो दे राखी जाणी ओर ना कट्ठी करी जाणी, कऊँकि जो कुछ तेसा रे बपारो ते मिली रा, से तिना रेई कामो दे आऊणा, जो यहोवे सामणे रया करने, ताकि तिना खे पेट परी की रोटी ओर अच्छे टाल्ले मिलो।