1 एबे मां आपणे प्यारे दोस्त परमेशरो खे

ओर तेसरे अंगूरा रे बगीचे रे बारे दे गीत गाणा,

एक बऊत उपजाऊ टीले पाँदे मेरे परमेशरो रा एक अंगूरा रा बगीचा था।

2 तिने तेथो री माट्टी खणी ओर तेतेरे पात्थर कट्ठे करी की तिदे अच्छे अंगूरा रा एक बगीचा लगाया,

तेते बीचे तिने एक गुम्मट बणाया ओर अंगूरा रे रसो खे एक कुण्ड बी खणेया,

तेबे तिने अंगूरा री उम्मीद कित्ती, पर तिदे नकम्मे अंगूर ई निकल़े।

3 एबे मेरा दोस्त यहोवा ये बोलोआ, ओ यरूशलेम शईरो रे रणे वाल़ेयो ओर ओ यहूदा रे माणूंओ,

मां ओर मेरे अंगूरा रे बगीचे बीचे न्याय करो।

4 मेरे अंगूरा रे बगीचे खे ओर क्या करना रयी गा जो मैं तेसरिया तँईं नि कित्तेया ऊगा?

तेबे क्या बजा ए कि जेबे मैं अंगूरा री उम्मीद कित्ती, तेबे तिदे नकम्मे अंगूर लगे?

5 एबे आऊँ ताखे बताऊँआ कि मां आपणे अंगूरा रे बगीचे साथे क्या करना।

मां तिजी रा कांडेया वाल़ा बाड़ पट्टी देणा, ताकि पशु तिजी खे खाई सको,

मां तेतेरी रक्षा करने वाल़ी दवाल टाल़ी देणी, ताकि पशु तिजी खे केसी सको।

6 मां अंगूरा रा बगीचा उजाड़ी देणा, से ना तो फेर छाँटणी और ना खणनी और तिदे कई प्रकारा रे कांडेवाल़े डाल़ जमणे,

मां बादल़ा खे बी आज्ञा देणी कि तेती पाँदे नि बरसणा।

7 कऊँकि सेना रे यहोवे रा अंगूरा रा बगीचा इस्राएलो रा कराना और तेसरा अच्छा पौधा यहूदा रे लोक ए

और तिना बीचे तिने न्याय री उम्मीद कित्ती, पर अन्याय दिशेया,

तिना बीचे तर्मो री उम्मीद कित्ती, पर तेथा ते चींगणा ई सुणेया!*

8 लाणत ए तिना पाँदे जो कअरो ते कअर और डोरूए ते डोरू एथो तक मिलांदे जाओए कि कोई जगा नि बचदी, ताकि तुसे देशो बीचे कल्ले रयी जाओ। 9 सेना रे यहोवे मेरी सुणी की बोली राखेया, "पक्का बऊत सारे कअर सुनसाण ऊई जाणे ओर बड़े-बड़े ओर सुन्दर कअर ऊजड़ पड़ी जाणे।* 10 कऊँकि ऊँताल़ी बीघे दे जम्मणे वाल़ी अंगूरा री बेला ते सिर्फ बाई लीटर शराब मिलणी ओर 100 किलो बीजो बीचा ते सिर्फ 10 किलो नज्ज ई मिलणा।" 11 लाणत ए तिना पाँदे जो प्यागा तड़के उठी की शराब पीणे लगोए ओर बड़ी रात तक शराब पींदे रओए, जदुओ तक तिना खे गर्मी नि चढ़ी जाओ! 12 तिना री पाट्टिया रे बीणा, सारंगी, डफ, बँसरी ओर शराब, यो सब मिलोए, पर सेयो यहोवे रे कामो रिया तरफा खे नि देखदे ओर तेसरे आथो रे कामो खे नि देखदे। 13 इजी री खातर मेरे लोक मेरे बारे दे ज्ञान ना ऊणे रिया बजा ते गुलामिया दे जाणे। तेसरे इज्जतदार मर्द पूखे मरोए ओर आम लोक त्यायी साथे बेचैन ओए। 14 इजी री खातर अधलोके बऊत लाल़च करी की आपणा मूँ अदो ते जादा खोलेया ओर तिना रा वैभव ओर पीड़-पड़ाका ओर खुशी करने वाल़े सारे के सारे तेसरे मुंए रे जाई की पड़ोए।

15 आम माणूं दबाए जाओए ओर बड़े माणूं नीच करे जाओए ओर कमण्डिया री आखी निठिया करिया जाओईया। 16 पर सेना रा यहोवा न्याय करने रिया बजा ते महान ठईरोआ पवित्र परमेशर तर्मी ऊणे रिया बजा ते पवित्र ठईरोआ। 17 तेबे पेडा रे बच्चे मानो आपणे डोरूए दे चरने, पर तगड़ेया री ऊजड़ जगा परदेशिया खे चराणे खे मिलणी। 18 लाणत ए तिना पाँदे जो पापो खे बुराईया री रस्सिया साथे ओर बुरे कामो खे मानो गडिया रे रस्सेया ते खींजी की लई जाओए। 19 ओर तुसे बोलोए, "इस्राएलो रे पवित्र परमेशरो खे तेसरी योजना फटाफट पूरी करने देयो, ओर जो तिने बोली राखेया तिजी खे पूरा करो, ताकि आसे तिना खे आपू देखूँ!" 20 लाणत ए तिना पाँदे जो बुरे खे खरा ओर खरे खे बुरा बोलोए, जो न्हेरे खे प्रयासा ओर प्रयासे खे न्हेरा बोलोए ओर कड़ुए खे मीठा ओर मीठे खे कड़ुआ करी की मानोए! 21 लाणत ए तिना पाँदे जो आपणी नजरा रे ज्ञानी ओर अक्लमंद ए!* 22 लाणत ए तिना पाँदे जो शराब पीणे रे वीर ओर शराबो खे तेज बनाणे रे बहादूर ए, 23 जो न्यायी रिश्वत लई की दुष्टा खे निर्दोष ओर निर्दोषा खे दोषी ठराओए! 24 इजी बजा ते जिंयाँ आगी री लूपी ठूँठो खे फूकी देओई ओर सूका काआ फूखी की स्वा बणी जाओआ, तिंयाँ ई तिना री जड़ सड़ी जाणी ओर तिना रे फूल तूड़ बणी की उडी जाणे, कऊँकि तिने सेना रे परमेशर यहोवे रे बिधि-बिधानो खे नकम्मा जाणेया ओर इस्राएलो रे पवित्र परमेशरो रा वचन तुच्छ जाणेया। 25 इजी बजा ते यहोवे रा रोष आपणी प्रजा पाँदे पड़की रा ओर तिने तिना रे खलाफ आथ बढ़ाई की सेयो काई राखे ओर पाह्ड़ थरथराईगे ओर लोका री लाशा सड़का बीचे कूड़े जेड़िया पड़ी रिया। इतणा ऊणे ते बी तेसरा रोष शान्त नि ऊआ ओर तिने सजा देणे खे आपणा आथ आगे बढ़ेया राए। 26 यहोवे दूरो-दूरो रिया जातिया रिया तँईं चण्डा खड़ा करना ओर सिटी बजाई की सेयो तरतिया रे कूणे ते बुलाणे; देखो, सेयो फटाफट तेज दौड़ी की यरूशलेमो खे आऊणे! 27 तिना दुश्मणा बीचा ते कोई बी थकेया नि, ना कोई ठोकर खाओआ, कोई सऊणे वाल़ा नि ए, केसी रे लको रा बान नि खुली रा ओर केसी रे जोड़ेया रा बान नि टूटेया। 28 तिना रे तीर तेज ओर धनुष चढ़ाए रे ए, तिना रे कोड़ेया रे खुर आथिया जेड़े ओर रथो रे टईर तूफानो जेड़े ए। 29 दुश्मण सिपाई जवान शेरो जेड़े गरजोए, सेयो गुर्राई की शिकार पकड़ी लओए ओर तिजी खे लई की नठी जाओए ओर कोई शिकारो खे तिना ते नि छुड़ांदा। 30 तेस बखते सेयो तिना इस्राएलो पाँदे एड़े गरजणे जिंयाँ समुद्र गरजोआ ओर जे कोई देशो रिया तरफा खे देखोगा, तो तेसखे न्हेरा ओर मुसीबत दिशणी ओर ज्योति बादल़ा की लूकी जाणी।