1 ओ मोआब देशो रे लोको, सेला शईरो ते उजाड़ जगा रिये ऊँदे ऊए सिय्योनो* री बेटिया रे पाह्ड़ो पाँदे देशो रे परदाना खे पेडा रे बच्चे पेजो। 2 मोआब देशो री बेटिया अर्नोनो रिया नदिया पाँदे एड़िया दिशोईया जेड़े की पंछिया रे बच्चे उजड़े रे कोअले रिया बजा ते पटकदे रओए।

3 मोआबो रे दूत यहूदा रे लोका खे बोलोए आसा रे बारे दे सलाअ-मशवरा करो, म्हारी मताद करो ओर म्हारेया दुश्मणा ते आसा री रक्षा करो, जेड़ा डाल़ त्याड़िया री तूपा दे जमीना खे छांए देओआ। आसा खे आसा रे दुश्मणा रे आथो दे नि पकड़वाओ। 4 मेरे लोक जो निकयाल़े रे ए सेयो तां बीचे रओ, नाश करने वाल़े ते मोआबो खे बचाओ। पीसणे वाल़ा नि रया, लूट-पाट फेर नि ऊणी, कऊँकि देशो ते अन्देर करने वाल़े नाश ऊईगे रे। 5 तेबे दया साथे परमेशरो एक सिंहासन स्थापित करना ओर तेते पाँदे दाऊदो रे तम्बूए दे सच्चाईया साथे एक बैठणा, जेस सोची-समजी की सच्चा न्याय करना ओर तर्मो रे काम करेया करने। 6 यहूदा रे लोक बोलोए, "आसे मोआबो रे बारे दे सुणी राखेया कि से बऊत कमण्डी था, तेसरे कमण्ड, गर्व ओर रोषो रे बारे दे बी सुणी राखेया पर तेसरा बड़ा बोल सच्चा नि ए।" 7 मोआबो रे लोका आपणे दु:खो रिया बजा ते हाय, हाय करनी, सारे के सारेया मोआबो रिया तँईं हाहाकार करनी। कीरहरासत शईरो री किशमिशा खे तिना बऊत नराज ऊई की लाम्बे-लाम्बे साआ लया करने। 8 कऊँकि हेशबोन शईरो रे डोरू ओर सिबमा शईरो रे अंगूरा रे बगीचे मुरझाई गे रे, जातिया-जातिया रे अधिकारिए तिना री अच्छिया-अच्छिया बेला बाडी-बाडी की सेटी ती रिया, सेयो याजेर शईरो तक पऊँचीया ओर जंगल़ो दे बी फैली गिया ओर बढ़दे-बढ़दे तालो ते पार दूरो तक बढ़ी गी थिया। 9 इजी री खातर मां तिना लोका साथे रोणा जो याजेरो ओर सिबमा शईरो दे रणे वाल़े ए कऊँकि अंगूरा रिया बेला खराब ऊईगिया। मां हेशबोन ओर एलाले शईरो रे लोका साथे शोग करना, कऊँकि तुसा रे गर्मिया रे फल़ो रे ओर फसला री बडाईया रे बखतो री ललकार सुणने लगी री। 10 फल़ वाल़े अंगूरा रे बगीचे ते खुशी ओर मगन रणा चली गा, अंगूरा रे बगीचे दे गाणा नि गाया जाणा, मां बडाईया रे बखतो री सारी खुशी खत्म करी देणी। ओर अंगूरा रे रसो रे कुण्डो दे केसी अंगूर नि केसणे, कऊँकि मां तिना रे खुशिया रे शब्द बन्द करने। 11 इजी री खातर आऊँ मोआब देशो रे लोका रिया तँईं बऊत दु:खी ए। आऊँ कीरहेरेस शईरो रिया तँईं बऊत दु:खी ए। आऊँ तिना शईरा रिया तँईं बऊत दु:खी ए। 12 जेबे मोआबो रे लोक आपणे पाह्ड़ी मन्दरो दे प्रार्थना करने खे जांदे-जांदे थकी जाओए, पर एते ते तिना खे कोई फायदा नि ऊणा। 13 येई से गल्ल ए जो यहोवे इजी ते पईले मोआबो रे बारे दे बोली थी। 14 पर एबे यहोवे ईंयाँ बोली राखेया, "ठीक तीऊँ साला दे, सेयो मजदूरा रे रूपो दे गिणने पाँदे मोआबो रा वैभव ओर तेसरा पीड़-पड़ाका सब बेकार ठईरना ओर बाकी जो थोड़े बचणे सेयो बिना साअरे ते ऊई जाणे।"