1 आगे यशायाह भविष्यबाणी करोआ, आसा रा परमेशर ईंयाँ बोलोआ, मेरी प्रजा खे शान्ति देयो, शान्ति!* 2 यरूशलेम शईरो रे लोका साथे शान्तिया री गल्ला बोलो ओर तेसखे आका पाई की बोलो कि तेरी कठण सेवा पूरी ऊई री, तेरे पापो री सजा मानी ती री, यहोवे रे आथो साथे तूँ दुगणी सजा पाई मुकी रा।* 3 केसी री आक सुणने लगी री, "बणो दे यहोवे री बाट सुदारो, म्हारे परमेशरो खे अराबा दे एक राजे री बाट चौरस करो।* 4 हर एक तराई परी देयो ओर हर एक पाह्ड़ ओर पाह्ड़ी तोड़ी देयो, जो टेडा ए से सीदा ओर जो ऊच्चा-निठा ए तीजी खे चौरस करो। 5 तेबे यहोवे री महिमा प्रगट ऊणी ओर तेसखे सारे माणूं एक साथे दिशणे, कऊँकि यहोवे आपू ई एड़ा बोली राखेया।"* 6 बोलणे वाल़े रा वचन सुणेया, "प्रचार कर!" मैं पूछेया, "आऊँ क्या प्रचार करुँ?" तेबे आवाजे ज्वाब दित्तेया ये प्रचार कर कि सारे माणूं रेगिस्तानो रे काओ जेड़े ए, तिना री सजावट मैदानो रे फूला जेड़ी ए। 7 जेबे यहोवे रा आत्मा तिजी पाँदे चलोआ, तेबे काआ सूकी जाओआ ओर फूल मुरझाई जाओए, इदे कोई शक नि ए कि प्रजा काआ ए।* 8 काआ तो सूकी जाओआ ओर फूल मुरझाई जाओए, पर म्हारे परमेशरो रा वचन सदा अटल़ रणा।* 9 किने माखे बोलेया सिय्योनो खे एक शुभ सन्देश बोल, ऊच्चे पाह्ड़ो पाँदे चढ़ी जाओ, ओ यरूशलेम शईरो खे शुभ सन्देश सुनाणे वाल़ेयो, बऊत जोरे की बोल, जोरे की बोल, डर नि, यहूदा शईरो रे लोका खे बोल कि आपणे परमेशरो खे देखो!* 10 देखो, परमेशर यहोवा सामर्थ दखांदा ऊआ यरूशलेमो खे आऊणे लगी रा, तेस आपणी बाई रिया तागती ते राज करना; देखो, जो मजदूरी देणे री ए, से तेसगे ए ओर जो बदला देणे राए, से तेसरे आथो दे ए।* 11 परमेशरो गवाल़े जेड़ा आपणा चूण्ड चराणा, तेस पेडा रे बच्चे आपणी बांयी पाँदे लणे ओर दूद पल्याणे वाल़िया पेडा आऊल़े-आऊल़े निणियां।*

12 किने माणूंए समुद्रो रा पाणी आपणे मुठुए दे परी की नापेया ओर सर्गो रा नाप किने फिथे साथे लया, किने माणूंए तरतिया री माट्टी आपणे कटोरे दे परी ओर पाह्ड़ ताकड़िया दे ओर पाह्ड़िया कांडे दे तोली राखिया? 13 यहोवे रे दमाको खे किने आदमिए ये नि दसेया कि तेसखे क्या करना था यहोवे खे किने ये सला नि दित्ती की तेसखे जो तिने करी राखेया किंयाँ करना था?* 14 तिने केसते सला लई ओर तेसखे समजयाई की किने न्याय री बाट दसी ओर ज्ञान सिखाई की अक्ला री बाट दसी राखी?*

15 देखो, संसारो रे सारे देश कड़े दे एक छोटे टीपे जेड़े या ताकड़िया पाँदली तूड़ा जेड़ी ठईरी, देखो, यहोवा द्वीपा खे तूड़ा जेड़ा चकोआ। 16 लबानोनो रे सारे डाल़ परमेशरो खे पेंट चढ़ाणे रिया तँईं बाल़ने खे काफी नि ए। ओर लबानोनो रे जीव-जन्तु होमबलिया खे कम ऊणे। 17 सारिया जातिया तेस सामणे कुछ नि ए, सेयो तेसरी नजरा दे बेकार ओर शून्य ते बी कम ठईरी रिया। 18 तुसे परमेशरो खे केस जेड़ा बताई सकोए ओर तेसरी उपमा केस साथे देई सकोए? 19 मूर्तिया खे तो कारीगर बणाओआ, सन्यार तिजी खे सूईने साथे मढ़ोआ ओर तिजी खे चाँदिए रे साँगल़ कअड़ी की बणाओआ। 20 जो कोई कंगाल़ माणूं इतणा सूईना चाँदी पेंटा दे नि देई सकदा, तो से एड़ा डाल़ चूणी लओआ जो सड़ो नि, से एक निपुण कारीगर टोल़ी की मूर्ति बणवाओआ ओर तेसा मूर्तिया खे एड़ा खड़ा करोआ कि से ईल्ली नि सको।* 21 क्या तुसे नि जाणदे? क्या तुसे नि सुणेया? क्या तुसा गे शुरूओ ते ई नि बताया? क्या तुसे तरतिया री निऊँ पड़ने ते पईले ई नि सोचेया? 22 ये परमेशर ए जो तरतिया रे केरे पाँदे सर्गो दे बैठी रा ओर तरतिया रे रणे वाल़े माणूं टिड्डिया जेड़े ए; जो सर्गो खे मलमलो जेड़ा फैलाओआ ओर एड़ा ताणी देयोआ, जेड़ा रणे खे तम्बू ताणोए। 23 परमेशर बड़े-बड़े परदाना खे तुच्छ करी देयोआ ओर तरतिया रे अधिकारिया खे बेकार करी देयोआ। 24 से परदान ओर अधिकारी एड़े ए, जेड़े सेयो डोरूआ दे पौधेया खे रूमोए, ओर तिना खे बाओए, जदुए खे से डंडल़ जमीना दे जड़ पकड़ने वाल़े ओए, तदुओ खे यहोवा तिना पाँदे अवा चलाओआ ओर सेयो सूकी जाओए ओर तूफान तिना खे पूओ जेड़ा उडाई की लई जाओआ।

25 इजी री खातर तुसे माखे केस जेड़ा बताओए कि आऊँ तेस जेड़ा ठईरूँ? तेस पवित्र परमेशरो रा येई वचन ए। 26 आपणियां आखी ऊबे करो ओर सर्गो रिया तरफा खे देखो, यो सारे तारे किने बणाए? से इना तारेया खे गिणी-गिणी की निकयाल़ोआ ओर इना सबी खे नाओं लई-लई की बुलाओआ। से एड़ा सामर्थी ओर बऊत तागतबर ए कि तिना बीचा ते कोई बिना आए नि रंदा।

27 ओ याकूब, तूँ कऊँ बोलेया, ओ इस्राएल तूँ कऊँ बोलेया, "मेरी बाट यहोवे ते लूकी रिये, मेरा परमेशर मेरे न्याय री कोई फिकर नि करदा?" 28 क्या तुसे नि जाणदे? क्या तुसे नि सुणेया? यहोवा जो सदा रणे वाल़ा परमेशर ओर पूरी तरतिया खे बनाणे वाल़ा ए, से थकदा नि, ना ई कमजोर ऊँदा, तेसरी बुद्धिया रा कोई अन्त नि ए। 29 से थके रेया खे तागत देयोआ ओर कमजोरा खे शक्ति देयोआ। 30 जवान थकी जाओए ओर तिना खे राम करने री जरूरत पड़ी जाओई ओर जवान ठोकर खाई की रूड़ी जाओए, 31 पर जो यहोवे खे मतादा रिया उम्मीदा ते न्याल़ोए, तिना खे नवीं तागत मिलदी रणी, सेयो उकाबो जेड़े उडदे रणे, सेयो दौड़ने ओर बेओश नि ऊणे ओर चलणे पर थकणे नि।