यशायाह 37

राजा हिजकिय्याह रा यशायाह ते सला लणा

1 जेबे हिजकिय्याह राजे सेनापतिये रिया यो गल्ला सुणिया, तेबे से दु:खो दे आपणे टाल्ले फाड़ी की ओर दु:ख बताणे खे टाट टखी की यहोवे रे मन्दरो दे गया। 2 ओर तिने एल्याकीम जो राजकराने रे कामो पाँदे नियुक्त था ओर शेबना मंत्री ओर पुरोईता रे बुजुर्ग जिने सबी जणेया टाट टखी राखी थी, आमोसो रे पाऊ यशायाह नबीए गे पेजी ते। 3 राजा हिजकिय्याह रे अधिकारिए यशायाह खे बोलेया, "राजा हिजकिय्याह ईंयाँ बोलोआ कि आजका दिन शोक ओर दु:खो रा एक खास दिन ऊणा, ए दिन एक एड़ा दिन ऊणा जिंयाँ एक बच्चा जन्म लओआ पर बच्चे खे जन्म देणे वाल़ी माया दे जितणी तागत ऊणी चाईए तेसा दे तितणी तागत नि ऊँदी। 4 पर क्या पता तेरे परमेशर यहोवा रबशाके रिया गल्ला सुणिया ओ, जो तेसरे मालके अश्शूरो रे राजे जिऊँदे परमेशरो री बेज्जती करने खे पेजी राखेया था ओर जो गल्ला तेरे परमेशर यहोवा सुणी राखिया तिना रे बदले परमेशर तिना खे सजा देयो, कृपा करी की इस्राएलो रे तिना थोड़े जे लोका रिया तँईं प्रार्थना कर जो बची गे रे।"

5 जेबे हिजकिय्याह राजे रे सेयो अधिकारी नबी यशायाह गे आये। 6 तेबे यशायाहे तिना खे बोलेया, "आपणे मालको खे बोलो कि यहोवा ईंयाँ बोलोआ कि जो गल्ला तैं सुणी राखिया जिना रे जरीये अश्शूरो रे राजे रे माणूंए मेरी बेज्जती करी राखी, तिना रिया बजा ते नि डर। 7 सुण, मां तेसरे मनो दे एड़ी आत्मा पाणी कि जेते कि से कोई सन्देश सुणी की आपणे देशो खे वापस ऊई जाओ ओर मां से तेसरे देशो देई से तलवारी साथे मरवाई देणा।"

अश्शूरो री सेना रा यरूशलेम शईरो खे छाडणा

8 तेबे रबशाके वापस ऊई की अश्शूरो रा राजा लिब्ना शईरो साथे युद्ध करदा ऊआ देखेया, कऊँकि तिने सुणेया था कि से लाकीश शईरो ते उठी गा रा। 9 तिने कूशो रे राजा तिर्हाका रे बारे दे ये सुणेया कि से तेस साथे लड़ने खे आऊणे लगी रा। तेबे अश्शूरो रे राजे हिजकिय्याह रे नेड़े दूत ये बोलणे खे पेजे, 10 "तुसे यहूदा रे राजा हिजकिय्याह खे ईंयाँ बोलणा कि तेरा परमेशर जेस पाँदे तूँ परोसा राखेया, ये बोली की ताखे तोखा नि देयो कि यरूशलेम अश्शूरो रे राजे रे वशो दे नि पड़ना। 11 देख, तैं अश्शूरो रे राजे रे बारे दे सुणी राखेया कि तिने सबी देशा साथे क्या करी राखेया कि सेयो सत्यानाश ई करीते। 12 तेबे क्या तूँ बची सकणा? गोजान, हारान ओर रेसेप शईरा दे रणे वाल़िया जो जातिया ओर तलस्सार शईरो दे रणे वाल़े एदेनी लोक मेरे बुजुर्गे नाश कित्ते, क्या तिना रे देवते तिना खे बचाई सके? 13 हमात ओर अर्पाद शईरो रा राजा, सपवैंम शईरो रा राजा ओर हेना ओर इव्वा शईरा रे राजा, यो सारे केयी गे?"

राजा हिजकिय्याह री परमेशरो ते प्रार्थना

14 ये पर्ची राजा हिजकिय्याहे दूता रे आथो ते लई की पढ़ी, तेबे तिने ये पर्ची यहोवे रे मन्दरो दे जाई की यहोवे सामणे बखेरी तिया। 15 फेर हिजकिय्याह राजे यहोवे ते ये प्रार्थना कित्ती, 16 "ओ सेना रे यहोवा, तू राजे जेड़ा करूबा पाँदे विराजमान इस्राएलो रे परमेशर, तरतिया रे सबी राजेया पाँदे बस तूँ ई परमेशर ए, सर्ग ओर तरती तैंई बणाई राखी। 17 ओ यहोवा, कान लगाई की सुण, ओ यहोवा आखी खोली की देख, ओर सन्हेरीबो रे सारे वचन सुण, जिने जिऊँदे परमेशरो री बेज्जती करने खे लिखी की पेजी राखे। 18 ओ यहोवा, अश्शूरो रे राजेया सच्चो खे ई कई देश नाश करी ते, तिना री जमीन उजाड़ पाईती। 19 अश्शूरो रे राजे तिना देशा रे देवते आगी दे फूके, कऊँकि सेयो परमेशर नि थे, सेयो बस माणूंआ री कारीगरी, लक्कड़ ओर पात्थर ई थे, इजी बजा ते सेयो तिना खे नाश करी सके।*37:19 पज. 115:4-8, गला. 4:8 20 एबे ओ म्हारे परमेशर यहोवा, तूँ आसा खे तेसरे आथो ते बचा, जेते कि तरतिया रे राज-राज रे लोक जाणी लो कि बस तूँ ई यहोवा ए।"

राजा हिजकिय्याह खे परमेशरो रा जबाव

21 तेबे आमोसो रे पाऊ यशायाहे हिजकिय्याह गे ये सन्देसा पेजेया, इस्राएलो रा परमेशर यहोवा ये बोलोआ, तैं जो अश्शूरो रे राजा सन्हेरीबो रे बारे दे मांते प्रार्थना करी राखी, 22 तेसरे बारे दे यहोवे ये बोली राखेया, "सिय्योनो री कुँवारी बेटी*37:22 सिय्योनो री कुँवारी बेटी यरूशलेमो रे जवान लोक ताखे तुच्छ जाणोई ओर तेरा मजाक करोई, यरूशलेम शईरो री बेटी तेरा मजाक उड़ाओई। 23 तैं जेसरी बेज्जती ओर निन्दा करी राखी, ओर जेसरे खलाफ कमण्ड करी की बोलेया, से इस्राएलो रा पवित्र परमेशर ए। 24 आपणे नौकरा रे जरीये तैं जो परमेशरो री बेज्जती करी की बोली राखेया कि आऊँ बऊत सारे रथ लई की पाह्ड़ो री चूँडिया पाँदे, बल्कि लबानोनो रे बणो तक चढ़ी की आई गा रा, मां तेथो रे ऊच्चे-ऊच्चे देवदार ओर अच्छे-अच्छे सनौबरो रे डाल़ बाडी देणे ओर मां तेथो री ऊच्ची जगा रे ओर तेसरे बणो दे फल़ देणे वाल़े बगिचेया दे जाणा।"

25 मैं खाता खणी की पाणी पिया ओर मिस्रो री खाड्डा दे पैर राखदे ई सेयो सुकाईते। 26 क्या तैं नि सुणी राखेया कि पईले तेई मैं ये ठाणी राखेया था ओर एतेरी त्यारी कित्ती थी? इजी री खातर एबे मैं ये पूरा बी कित्तेया ताकि तूँ गढ़वाल़े शईरा खे खण्डहर ई खण्डहर करी दे। 27 इजी बजा ते तेती रणे वाल़ेया दे शक्ति कम ऊईगी ओर सेयो बेज्जत ओर शर्मिंदा ऊए, सेयो मैदानो रे नीके-नीके डाल़, ओर अरा काआ, ओर छतो पाँदला काआ ओर एड़े नज्जो जेड़े ऊईगे जो बढ़ने ते पईले ई सूकी जाओआ। 28 आऊँ तो तेरा बैठणा, जाणा ओर वापस आऊणा जाणूंआ ओर ये बी कि तूँ मां पाँदे आपणा रोष करेया। 29 इजी बजा ते कि तूँ मां पाँदे आपणा रोष करेया ओर तेरे कमण्डो रिया गल्ला मैं सुणी राखिया, मां तेरे नाको दे नकेल पायी की ओर तेरे मुंए दे आपणी लगाम लगाई की जेते बाटा रिये तूँ आई रा, तेसा ई बाटा रिये तूँ वापस करी देणा। 30 तेबे यशायाहे रा हिजकियाह खे बोलेया, "ताखे ये नशाण ऊणा कि एते साले तो तां से खाणा, जो आपणे आप जमणा ओर दूजे साले से जो तिजी ते पैदा ऊणा ओर तीजे साले बेजा बायी की से बाडणा ओर अंगूरा रे बगीचे लगाणे ओर तिना रा फल़ खाई सकणा। 31 ओर यहूदा रे कराने रे कुछ लोक बची जाणे। सेओ ई लोक बढ़दे ऊए एक बऊत बड़ी जातिया रा रूप लई लणा। सेओ लोक तिना डाल़ा जेड़े ऊणे जिना रिया जड़ा तरतिया दे बऊत डूगिया जाओईया ओर सेओ बऊत तगड़े ऊई जाओए ओर बऊत ज्यादा फल देओए। 32 कऊँकि यरूशलेम शईरो रे बचे रे ओर सिय्योन पाह्ड़ो ते नठे रे लोक निकल़ने।" सेना रे यहोवे आपणे रोषो रिया बजा ते ये काम करना। 33 इजी री खातर यहोवा अश्शूरो रे राजे रे बारे दे ईंयाँ बोलोआ, "से एस शईरो दे नि आई सकणा, बल्कि से एस शईरो पाँदे एक बी तीर नि बायी सकणा ओर ना से ढाल लई की एस सामणे आऊणे या एसरे खलाफ दम बानी सकणा। 34 जेते बाटा रिये से आई रा, तेसा ई बाटा रिये से वापस बी ऊई जाणा ओर एस शईरो दे नि आई सकणा, यहोवे री येई बाणी ए।" 35 कऊँकि मां आपणे शईरो रिया तँईं ओर आपणे दास दाऊदो रिया तँईं, एस शईरो री रक्षा करी की ये बचाणा।

सन्हेरीबो री आर ओर मौत

36 तेसा ई राती यहोवे रे दूते निकल़ी की अश्शूरिया रे डेरे दे 185,000 सिपाई काये ओर जेबे लोक दूजे दिने प्यागा उठे तो तिने देखेया कि तिना रे चारो तरफा खे मरे रे सैनिका रिया लाशा ई लाशा पड़ी रिया। 37 तेबे अश्शूरो रा राजा सन्हेरीब चली गा ओर वापस ऊई की नीनवे शईरो दे रणे लगेया। 38 एक दिन से आपणे देवता निस्रोको रे मन्दरो दे माथा टेकणे लगी रा था कि तदुओ खे तेसरे पाऊ अद्रम्मेलेक ओर शरेसेरे से तलवारी साथे काया ओर अरारात देशो खे नठीगे। तेबे सन्हेरीबो रा एक ओर पाऊ एसर्हद्दोन तेसरी जगा पाँदे राज करने लगेया।