1 यहोवा बोलोआ, "ओ तार्मिकता पाँदे चलणे वाल़े लोको, ओ यहोवे खे टोल़ने वाल़े लोको, कान लगाई की मेरी सुणो; जेसा चट्टानी ते तुसे खणी राखे ओर जेसा खानी ते तुसे निकयाल़ी राखे, तेते पाँदे त्यान करो। 2 आपणे मूलमर्द अब्राहम ओर तेसरी लाड़ी सारा जिना रिया बजा ते तूँ आई रा तिना पाँदे त्यान देयो; जेबे से माणूं बिना बच्चेया ते कल्ला था, तदुओ ते ई मैं से बुलाया ओर आशीष दित्ती ओर बढ़ाया।"

3 यहोवे सिय्योनो खे शान्ति देई राखी, तिने तेथो रे सबी खण्डहरा खे दया करी राखी ए; तेस तेथो रे बण अदनो जेड़े ओर तेथो रे रेगिस्तान यहोवे रे बगीचे जेड़े बनाणे; तिदे खुशी, मगन, तन्यवाद ओर पजन गाणे री आवज सुणनी। 4 यहोवा बोलोआ, "ओ मेरी प्रजा रे लोको, मेरिया तरफा खे त्यान करो; ओ मेरे लोको कान लगाई की सुणो; कऊँकि मां तुसा खे बिधान देणा ओर मां आपणा नियम सबी देशा रे लोका रा प्रयासा ऊणे खे स्थिर करना। 5 मेरा छुटकारा नेड़े ए; मेरा उद्धार सामणे आई रा; मां आपणी सामर्था साथे देश-देशो रे लोका रा न्याय करना। दूरा-दूरा रे देश मेरे आऊणे रा इन्तजार करने लगी रे ओर तिना मेरी तागता पाँदे उम्मीद राखणी।" 6 परमेशर गुलामा खे बुलाओआ, "आपणियां आखी सर्गो रिया तरफा खे चको ओर तरतिया खे देखो; कऊँकि सर्ग तुएँ जेड़ा राची जाणा, तरती टाल्लेया जेड़ी पुराणी ऊई जाणी, ओर तिदे रणे वाल़े माच्छरा जेड़े ईंयाँ ई जांदे रणे; पर जो उद्धार मां करना से सदा रणा ओर मेरे तर्मो रा अन्त नि ऊणा।" 7 ओ तर्मो खे जाणने वाल़ेयो, "जिना रे मनो दे मेरे बिधान ए, तुसे कान लगाई की मेरी सुणो; माणूंआ री बेज्जतिया ते नि डरो ओर ना तिना री निन्दा करने ते तंग ओ। 8 कऊँकि तिना रे बरोदी पुराणे टाल्लेया जेड़े ऊणे, ओर कीड़ा टाल्लेया खे ओर ऊना खे खाई जाओआ; पर मेरा तर्म अनन्तकालो तक ओर मेरा उद्धार पीढ़िया ते पीढ़ी बणेया रा रणा।"

9 ओ यहोवे री बां जाग! जाग ओर तागतबर ओ, जेड़ा पुराणे बखतो दे ओर बीती री पीढ़िया दे, तेड़ा ई एबे बी जागो। क्या तूँ से ई नि ए जिने रहबो रे टुकड़े-टुकड़े कित्ते ओर अजगर छेदेया? 10 क्या तूँ सेई नि ए, जिने गईरा समुद्र सुकाईता ओर तेतेरी गईराईया रे आपणे छुड़ाए रे लोका खे पार जाणे खे बाट निकयाल़ी थी? 11 यहोवे रे छुड़ाए रे लोक वापस ऊई की जयजयकार करदे ऊए सिय्योनो रे आऊणे ओर तिना रे सिरो पाँदे बऊत खुशी ऊणी; सेयो खुश ओर मगन ऊणे ओर दु:ख ओर रोणे रा अन्त ऊई जाणा। 12 यहोवा बोलोआ, "आऊँ ई ताखे शान्ति देणे वाल़ा ए; तूँ कुण ए जो मरने वाल़े माणूंआ ते ओर काओ जेड़े मुरझाणे वाल़े माणूंआ ते डरेया, 13 ओर सर्गो खे बनाणे वाल़े ओर तरतिया री निऊँ पाणे वाल़े, आपू खे बनाणे वाल़े यहोवे खे पूली गा रा, ओर जेबे बिरोदी नाश करने खे त्यार ओआ, तेबे तेसरे रोषो ते पूरा दिन लगातार थरथराओआ? पर बिरोदिये रा रोष केई रया? 14 बन्दी चट ई आजाद करे जाणे; सेयो गड्डे रे नि मरने ओर ना तिना खे रोटिया री कमी ऊणी। 15 जो समुद्रो खे उथल-पुथल करोआ, जेते साथे तिना री लईरा गरजोईया, से आऊँ ई तेरा परमेशर यहोवा ए, मेरा नाओ सेना रा यहोवा ए। 16 मैं तेरे मुंए रे आपणे वचन पाए ओर तूँ आपणे आथो पीछे लकोई राखेया; आऊँ सर्गो खे ताणूँ ओर तरतिया री निऊँ पाऊँ ओर सिय्योनो खे बोलूँ कि तुसे मेरी‍ प्रजा ए।"*

17 ओ यरूशलेम जाग, जागी की उठ, खड़े ऊई जाओ, तुसे यहोवे रे आथो ते तेसरे रोषो रे कटोरे ते पी राखेया, तुसे कटोरे रा नशा करने वाल़ा शराब पूरा ई पी ला रा।* 18 जितणे बच्चेया तेसते जन्म लया, तिना बीचा ते कोई नि रया जो तिना री अगुवाई करी की लई चलो ओर जितणे तेसरे बच्चे पाल़े-पोषे तिना बीचा ते कोई नि रया जो तेसरे आथो खे पकड़ो।* 19 यो दो मुसीबता तां पाँदे आई की पड़ी रिया, तां साथे कुण दु:खी ऊणा? उजाड़ ओर विनाश ओर काल़ ओर तलवार आई की पड़ी री; ताखे शान्ति केस देणी? 20 तेरे बच्चे बेओश ऊई की हर एक सड़का रे मोड़ो पाँदे, महा जाल़ो दे फसे रे ईरणो जेड़े पड़ी रे; यहोवे रे रोष ओर तेरे परमेशरो रिया तमकिया री बजा ते सेयो बेओश पड़ी रे।

21 इजी बजा ते ओ यरूशलेमो रे दु:खी लोको, तुसे मेरी सुणो, तुसे केसी नशे दे तो आए, पर शराब पी की नि; 22 तेरा प्रभु यहोवा जो आपणी प्रजा रा मुकद्दमा लड़ने वाल़ा तेरा परमेशर ए, से ईंयाँ बोलोआ, "सुण, आऊँ लड़खड़ाणे वाल़े शराबो रे कटोरे ते, मतलब आपणे रोषो रा कटोरा तेरे आथो ते लई लऊँआ; ताखे तिजी बीचा ते फेर कदी नि पीणा पड़ना; 23 ओर मां से तिना कष्टा दे तिना रे आथो रे देणा जो ताखे दु:ख देओए, जिने ताखे बोलेया कि सयी जा, ताकि आसे तां पाँदे पैर राखी की आगे चलूँ; ओर तैं मूँदे पड़ी की आपणी पीठ जमीना दे ओर आगे चलणे वाल़ेया रिया तँईं बाट बणाई ती।"