1 यहूदा प्रदेशो रे राजा हिजकिय्याह रे राजो रे चौदुए सालो दे, अश्शूरो रे राजे सन्हेरीबे यहूदा रे सारे गढ़वाल़े शईरा पाँदे अमला करी की सेयो लई ले। 2 ओर अश्शूरो रे राजे आपणी बड़ी सेना रबशाके* खे देई की लाकीश शईरो ते यरूशलेम शईरो रे राजा हिजकिय्याह गे पेजेया। रबशाके उत्तरो रे पूल़ो री नाल़िया गे तोबिया रे डोरूआ री सड़का पाँदे जाई की खड़ा ऊआ। 3 तेबे हिल्किय्याह रा पाऊ एल्याकीम, जो राजकराने रे कामो पाँदे नियुक्त था, ओर शेबना जो राजे रा मंत्री था ओर आसापो रा पाऊ योआह जो इतिआसो रा लिखणे वाल़ा था, राजे रे यो तीनो सबी ते बड़े अधिकारी अश्शूरो रे राजे रे दूतो ते मिलणे खे बारे निकल़ी गे। 4 अश्शूरो रे सेनापति रबशाके तिना खे बोलेया, "हिजकिय्याह खे बोलो कि अश्शूरो रा राजा ईंयाँ बोलोआ कि तू केसरा परोसा करी की बैठी रा? 5 मेरे बोलणे रा मतलब ए कि क्या मुंए ते गल्ला बोलणिया ई युद्ध करने खे पराक्रम ओर योजना ए? तू केस पाँदे परोसा राखेया, कि तैं मां साथे बगावत करी राखी? 6 सुण, तूँ तो तेस केसे रे नंगल़ो जेड़ा ए, मतलब मिस्रो पाँदे परोसा राखेया; तेस पाँदे जे कोई टेक लगाओ तो तेस तेसरे आथो दे चूबी की छेद करी देणा। मिस्रो रा राजा फिरौन तिना सबी साथे एड़ा ई करोआ जो तेस पाँदे परोसा राखोए।" 7 अश्शूरो रे राजे रे दूते आगे बोलेया, "फेर जे तूँ माखे बोले कि म्हारा परोसा आपणे परमेशर यहोवे पाँदे ए, ये हिजकिय्याह ई था जिने यहोवे री पवित्र जगा ओर बेदिया नाश कित्तिया थिया ओर फेर यहूदा रे लोका खे सिर्फ यरूशलेमो री बेदिया पाँदे ई आराधना करने री आज्ञा दित्ती थी। 8 इजी री खातर एबे मेरे मालक अश्शूरो रे राजे साथे वाचा बान, तेबे मां ताखे 2,000 कोड़े देणे, जे तूँ तिना पाँदे सवार चढ़ाई सके। 9 तेबे तूँ रथ ओर सवारा रिया तँईं मिस्रो पाँदे परोसा राखी की मेरे मालको रे छोटे ते छोटे काम करने वाल़े सेनापतिये खे बी किंयाँ अराई सकेया? 10 क्या मैं यहोवे ते बिना बोले एस देशो खे उजाड़ने रिया तँईं चढ़ाई करी राखी? यहोवे माखे बोली राखेया कि तेस देशो पाँदे अमला करी की तेसखे उजाड़ी दे।"

11 यरूशलेम शईरो रे तीनो आदमी, एल्याकीम, शेबना ओर योआहे रबशाके खे बोलेया, "आपणे दासा साथे अरामी पाषा दे गल्ला कर कऊँकि आसे तेसा पाषा खे समजूँए, आसा साथे यहूदी पाषा दे गल्ला नि कर कऊँकि शईरो री दवाला पाँदे लोक बैठी की सुणने लगी रे।" 12 रबशाके बोलेया, "क्या मेरे मालके आऊँ तुसा गेई यो गल्ला बोलणे खे पेजी राखेया? क्या तिने आऊँ इना लोका गे नि पेजी राखेया जो दवाला पाँदे बैठी रे, जिना खे तुसा साथे आपणा गू खाणा ओर आपणा पशाब पीणा पड़ना।" 13 तेबे रबशाके खड़े ऊई की यहूदी पाषा दे जोरे की बोलेया, "अश्शूरो रे राजा महाराजाधिराजो रिया गल्ला सुणो! 14 अश्शूरो रा राजा ईंयाँ बोलोआ कि, तुसा रा राजा हिजकिय्याह तुसा खे तोखा नि देयो, कऊँकि से तुसा खे बचाई नि सकदा। 15 एड़ा नि ओ कि हिजकिय्याह तुसा खे ये बोली की यहोवे रा परोसा दलाओ कि आसे यहोवे जरूर बचाणे ताकि ये यरूशलेम शईर अश्शूरो रे राजे रे वशो दे नि पड़ो।" 16 आपणे राजा हिजकिय्याह री नि सुणो; अश्शूरो रा राजा बोलोआ कि माखे पेंट पेजी की खुश करो ओर मांगे आओ; तेबे तुसे आपणे-आपणे अंगूर ओर दाऊगल़े खाई सकोए ओर आपणे-आपणे कुण्डो रा पाणी पी सकोए। 17 जदुओ तक आऊँ आई की तुसा खे एड़े देशो दे नि लई जाऊँ जो तुसा रे देशो जेड़ा नज्ज ओर नये शराबो रा देश ओर रोटी ओर अंगूरा रे बगीचे रा देश ए। 18 एड़ा नि ओ कि हिजकिय्याह ये बोली की तुसा खे बईकाओ कि आसे यहोवे बचाणे। क्या ओरी जातिया रे देवते आपणे-आपणे देश अश्शूरो रे राजे रे आथो ते बचायी राखे? 19 हमात ओर अर्पादो शईरो रे देवता केयी रये? सपवैंम राज रे देवता केयी रये? क्या तिने सामरिया रे लोक मेरे आथो ते बचाए?* 20 देशो-देशो रे सारे देवतेया बीचा ते एड़ा कुण ए जिने आपणा देश मेरे आथो ते बचाया ओ? तेबे क्या यहोवे यरूशलेम मेरे आथो ते बचाणा? 21 पर यरूशलेमो रे लोक शईरो री दवाला पाँदे खड़े दे रये* ओर तेसखे एक बी ज्वाब नि दित्तेया, कऊँकि हिजकियाह राजे री एड़ी आज्ञा थी कि सेनापतिये खे कोई ज्वाब नि देणा। 22 तेबे हिल्किय्याह रा पाऊ एल्याकीम, जो राजकराने पाँदे नियुक्त था ओर शेबना जो राजे रा मंत्री था ओर आसापो रा पाऊ योआह जो इतिआसो रा लिखणे वाल़ा था, इने हिजकिय्याह गे जाई की दु:खो दे आपणे टाल्ले फाड़े ओर सीरिया रे सेना रे बड़े अधिकारी रबशाके रिया गल्ला सुणाईयां।