1 यहोवा आपणे अभिषिक्त फारसो रे राजा कुस्रूए रे बारे दे ईंयाँ बोलोआ कि मैं तेसरा दाँणा आथ इजी खे पकड़ेया ताकि तेस सामणे जातिया खे दबाई देऊँ ओर दुश्मण राजेया री शक्ति कम करुँ, तेस सामणे शईरा रे बड़े द्वारा खे एड़ा खोली देऊँ कि सेयो बड़े द्वार बन्द नि ओ। ओर से तिना दे पीतरे जाई सको। 2 मां तांते आगे-आगे चलणा, ओर उची-उची जगा चौरस करनी, मां पीतल़ी रे द्वार तोड़ी देणे ओर लोए रे बेड़ेया रे टुकड़े-टुकड़े करी देणे। 3 मां ताखे न्हेरे दे लूकेया रा ओर गुप्त जगा रे दबाया रा तअन देणा, जेते कि ताखे पता लगी जाओ कि आऊँ इस्राएलो रा परमेशर यहोवा ए जो ताखे नाओं लई की बुलाओआ।* 4 आपणे दास याकूब ओर आपणे चूणे रे इस्राएलो रिया तँईं मैं तूँ नाओं लई की बुलाई राखेया, तेबे बी तूँ माखे नि जाणदा, पर मैं तेबे बी ताखे पदवी देई राखी। 5 आऊँ यहोवा ए ओर माखे छाडी की कोई दूजा परमेशर नि ए; तूँ माखे नि जाणदा, पर मां तेबे बी ताखे युद्ध करने खे शक्ति देणी, 6 आऊँ ये काम करूँआ ताकि सारे लोक जाणी जाओ कि आऊँ ई परमेशर ए। जेते कि पूर्बो ते लई की पच्छमा तक लोका खे पता लगी जाओ कि आऊँ यहोवा ए ओर दूजा कोई परमेशर नि ए। 7 आऊँ प्रयासे खे ओर न्हेरे खे बनाणे वाल़ा ए, आऊँ शान्तिया खे ओर मुसीबता खे बणाऊँआ, आऊँ यहोवा ई इना सबी खे बनाणे वाल़ा ए। 8 ओ सर्ग, ऊबा ते तर्म बरसा, सर्गो ते तर्मो री बर्खा ओ; तरती खुलो ताकि उद्धार पैदा ओ ओर तर्म बी तिजी साथे जमाओ, मैं यहोवे ई से पैदा करी राखेया।

9 ओ इस्राएल, लाणत ए तेस पाँदे जो आपणे बनाणे वाल़े परमेशरो साथे लड़ोआ! से तो माट्टिया रे ठीकरेया बीचे एकी ठीकरे जेड़ा ए, माट्टी कुम्हारो खे नि बोली सकदी कि तूँ ये क्या करने लगी रा? क्या कारीगरो रा बणाया रा काम तेसरे बारे दे बोलोआ, "एतेरे तो आथ ई नि ए?* 10 तेस पाँदे लाणत ए जो आपणे बाओ खे बोलो कि तूँ क्या जमाएया? ओर माया खे बोलो कि तूँ केसरी माये ए?" 11 यहोवा जो इस्राएलो रा पवित्र परमेशर ओर तिजी खे बनाणे वाल़ा ए, से ईंयाँ बोलोआ, "क्या तुसा ऊणे वाल़ी गल्ला मांते पूछणियां? क्या मेरे पाऊआ ओर मेरे कामो रे बारे दे तुसा माखे आज्ञा देणी? 12 मैं ई तरती बणाई ओर तिजी पाँदे माणूं बणाए; मैं आपणे आथो साथे ई सर्ग तणेया ओर सर्गो रे सारे तारेया खे आज्ञा देई राखी। 13 मैं ई से मर्द कुस्रू तार्मिकता साथे परेया ओर मां तेसरिया सारिया बाटा सीदिया करनिया; तेस मेरा शईर यरूशलेम फेर बसाणा ओर मेरे बन्दी बिना कीमत या बदला लई की छुड़ाणे सेना रे यहोवे रे यो ई वचन ए।"

14 यहोवा इस्राएलो ते ईंयाँ बोलोआ, "मिस्री लोका री कमाई ओर कूशी* लोका रे बपारो रा फाईदा ओर सबाई लोक जो मोटे-तगड़े ए, तांगे आऊणे ओर तेरे ई ऊई जाणे, सेयो तां पीछे-पीछे चलणे, सेयो साँगल़ा साथे बन्दे रे आऊणे ओर तां सामणे माथा टेकी की तांते प्रार्थना करी की बोलणा कि पक्का परमेशर तां साथे ए ओर दूजा कोई नि ए; तेसरे सिवाये कोई ओर परमेशर नि ए।"* 15 ओ इस्राएलो रे परमेशर, ओ उद्धार करने वाल़े! पक्का तूँ एड़ा परमेशर ए जो आपू खे गुप्त राखोआ।* 16 मूर्तिया खे कअड़ने वाल़े सारे के सारे कारीगर शर्मिंदा ओर हैरान ऊणे, सेयो सारे के सारे बेचैन ऊणे। 17 पर इस्राएलो रे लोका खे यहोवे रे जरीये उद्धार मिलणा आसे युगो-युगो तक बल्कि अनन्तकालो तक ना तो कदी शर्मिंदा ऊणे ओर ना कदी बेचैन ऊणे।* 18 कऊँकि यहोवा ई परमेशर ए। सेई सर्गो खे बनाणे वाल़ा ए, तिने ई तरती बणाई, ओर तिने ई से स्थिर बी कित्ती, तिने से सुनसाण रणे खे नि पर से बसणे खे बणाई राखी। से ईंयाँ बोलोआ, "आऊँ यहोवा ए, मांते सिवाये ओर कोई परमेशर नि ए। 19 मैं ना तो केसी गुप्त जगा रे, ना न्हेरे दे केसी देशो दे गल्ला कित्तिया, मैं याकूबो रे कुलो खे नि बोलेया कि माखे बेकारो दे टोल़ो। आऊँ यहोवा सच्च ई बोलूँआ, आऊँ खरिया गल्ला बताऊँआ।"

20 यहोवा बोलोआ, "ओ जातिया-जातिया बीचा ते बचे रे लोको, कट्ठे ऊई की आओ, एक साथे मिली की नेड़े आओ! सेयो जो आपणी बणाई री मूर्तिया लई की फिरोए ओर एड़े देवतेया ते जिना साथे उद्धार नि ऊई सकदा, प्रार्थना करोए, सेयो मूर्ख ए। 21 तुसे प्रचार करो ओर तिना खे मांगे ल्याओ; आ, सेयो आपू बीचे सला करो किने पुराणे बखतो दे ऊईया दिया गल्ला रे बारे दे बताया? जो ऊणे वाल़ा ए तेतेरे बारे दे पुराणे बखतो देई पईले ते ई किने बताया था? मैं यहोवे ई इजी रे बारे दे दशेया था। इजी री खातर माखे छाडी की कोई ओर दूजा परमेशर नि ए, तर्मी ओर उद्धार करने वाल़ा एती माखे छाडी की कोई ओर परमेशर नि ए, सिर्फ आऊँ कल्ला ई ए।" 22 ओ तरतिया रे दूर-दूर देशो रे रणे वाल़ेयो, तुसे मेरी तरफा खे फिरो ओर उद्धार पाओ! कऊँकि माखे छाडी की कोई ओर दूजा परमेशर नि ए। 23 मैं आपणी ई कसम खाई, तर्मो रे मुताबिक मेरे मुंए ते ये वचन निकल़ेया ओर से नि टल़ना, एक दिन हर एक माणूं मां सामणे नपणा ओर हर एकी रे मुंए ते मेरी ई कसम खाई जाणी।* 24 लोका मेरे बारे दे बोलणा, "बस यहोवे देई तर्म ओर शक्ति ए। तेसगे ई लोक आऊणे ओर जो तेसते नराज रणे, तिना खे शर्मिंदा ऊणा पड़ना। 25 पर इस्राएलो रे सारे वंशो रे लोका यहोवे दे जीत आसिल करनी ओर जो कुछ यहोवे करी राखेया तीजी रिया बजा ते खुश ऊणे।"