1 आमोसो रे पाऊ यशायाहे परमेशरो ते मिले दे दर्शणो दे बाबेलो रे बारे दे पारी भविष्यबाणी देखी। 2 पाह्ड़ो री चूँडिया पाँदे एक चण्डा खड़ा करो, सिपाईया खे जोरे की आका पाई की बुलाओ ओर आपणा आथ ऊबे करी की तिना खे अमला करने ओर बेबीलोनो रे तागतबर शईरो रे बड़े द्वारो दे पीतरे जाणे खे साअरा करो। 3 यहोवे लड़ाईया रिया तँईं आपणे पवित्र ओर तागतबर सिपाईया खे आज्ञा देई राखी, मैं आपणे रोषो खे आपणे वीर बुलाए, सेयो मेरिया जीता ते खुश ओ ए। 4 पाह्ड़ा पाँदे लोका री एक बड़ी पीड़ा रा जा आल्ला ऊणे लगी रा, मानो लोका री एक बड़ी पीड़ा री आवाज ए। राज-राज री कट्ठी कित्ती री जातिया आल्ला-गोल्ला करने लगी रिया। सेना रा यहोवा युद्धो खे आपणी सेना कट्ठी करने लगी रा। 5 सेयो दूर देशो ते, सर्गो रे कूणे ते आई रे, आ, यहोवा आपणे रोषो रे अथियारो समेत सारे देशो खे नाश करने खे आई रा। 6 हाय-हाय करो, कऊँकि यहोवे रे न्याय रा दिन नेड़े ए, से सर्वशक्तिमानो रिया तरफा ते मानो सत्यानाश करने खे आओआ।* 7 इजी आऊणे वाल़े विनाशो ते सबी रे आथ टीले पड़ने ओर डरो रिया बजा ते सबी री इम्मता ज्वाब देई जाणा। 8 ओर सेयो लोक कबराई जाणे। तिना खे पीड़ ओर दु:ख ऊणा, तिना खे बच्चा पैदा करने री जी पीड़ ऊणी। तिना हैरान ऊई की एकी-दूजे खे ताकणा, तिना रे मूँ फूखी जाणे।*

9 देखो, यहोवे रा से खतरनाक दिन रोष ओर निर्दयता साथे आओआ, ताकि से तरतिया खे उजाड़ी देयो ओर पापिया खे तिजी बीचा ते नाश करो। 10 कऊँकि सर्गो रे तारेया ओर बड़े-बड़े नक्षत्रा आपणा प्रयासा नि देणा ओर सूरज निकल़दे-निकल़दे काल़ा ऊई जाणा ओर चाँदो आपणा प्रयासा नि देणा।*

11 यहोवे बोलेया, "मां दुनिया रे लोका खे तिना री बुराईया री बजा ते ओर दुष्टा खे तिना रे पापो रिया बजा ते सजा देणी, मां कमण्डिया रा कमण्ड नाश करना ओर उपद्रव करने वाल़ेया रा कमण्ड तोड़ना। 12 मां सेयो माणूं जो जिऊँदे बची रे कुन्दनो ते ओर ओपीरो रे शुद्ध सूईने ते बी मईंगे करी देणे। 13 इजी री खातर मां सर्ग ईलाणा ओर तरती आपणी जगा ते कनारे ऊई जाणी, ये सेना रे यहोवे रे रोषो रिया बजा ते ओर तेसरे पड़के रे गुस्से रे दिने ऊणा। 14 बेबीलोनो दे रणे वाल़े परदेशी नठाए रे ईरण या बिना गवाल़े री पेडा जेड़े आपणे-आपणे लोका रिया तरफा खे फिरने ओर आपणे-आपणे देशो खे नठी जाणे।"

15 जो कोई मिलणा, से काई देणा ओर जो कोई पकड़ेया जाणा से तलवारी साथे काया जाणा। 16 नठदे ऊए लोका रे बाल-बच्चे तिना सामणे जमीना पाँदे पटकी देणे ओर तिना रे कअर लूटी देणे ओर तिना रिया जवाणसा प्रष्ट करी देणियां। 17 यहोवे बोलेया, "देखो, मां बेबीलोनो रे खलाफ मादी लोक उकसाणे, जिना ना तो चाँदिए रे बारे दे सोचणा ओर ना सूईने रा लाल़च करना। 18 तिना तीरे की जवान काणे ओर बच्चेया पाँदे कोई दया नि करनी ना तरस खाणी।"

19 बाबेल जो सबी राजा ते ऊच्चा ए ओर जेसरी सुन्दरता पाँदे कसदी लोक फूलोए, से एड़ा ऊई जाणा जेड़ा सदोम ओर गमोरा शईर, जेबे परमेशरे सेयो उल्टी ते थे।* 20 बेबीलोन फेर कदी नि बसणा ओर युगो-युगो तक तिदे केसी नि रणा, अरबी लोका बी तिदे डेरा खड़ा नि करना ओर ना ग्वाल़ेया तिदे आपणे डांगर चराणे। 21 तेती जंगल़ी जानवर रणे ओर उल्लूआ तिना रे कअरा दे डेरा करना, तेती शुतुरमुर्ग बसणे ओर बणो रे बाकरे तेती नाचणे।* 22 बेबीलोनो रे किलेया दे जंगल़ी कुत्ते ओर तेसरे सुख-विलासो रे भवनो दे गीदड़ बोलेया करने, तेसरे नाश ऊणे रा बखत नेड़े आई गा रा ओर तेसरे दिन एबे थोड़े ई रयी गे रे।