1 यहोवा बोलोआ, "ओ बाबेलो री कँवारी बेटी, आपणी जगा ते उतरी की थाले आओ ओर तूड़ा पाँदे बैठ; ओ कसदिया री बेटी तू बिना सिंहासनो ते जमीना पाँदे बैठ! कऊँकि तू एबे फेर नरम ओर नाजुक नि बोली जाणी। 2 चाक्की लई की आटा पीस, आपणा कुण्डा कनारे कर ओर नदिया खे पार करने खे आपणा कागरा कट्ठा करी की ऊबे चकी लो। 3 लोका तूँ नांगी करनी ओर तूँ बऊत शर्मिंदा ऊणी, मां बदला लणा ओर कोई माणूं नि छाडणा।" 4 म्हारा छुटकारा देणे वाल़े रा नाओं सेना रा यहोवा ओर इस्राएलो रा पवित्र परमेशर ए। 5 यहोवा बोलोआ, "ओ कसदिया री बेटी*, चुपचाप बैठी जा, ओर न्हेरे दे जा; कऊँकि ताखे दूजी बार केसी बी राज-राज री राणी नि बोलणा।"

6 मैं आपणे लोका पाँदे रोषे ऊई की आपणा इस्सा अपवित्र ठराया ओर तेरे वशो दे करी ता; तैं तिना पाँदे कोई दया नि कित्ती; तैं स्याणेया पाँदे आपणा बड़ा पारी जूँगड़ा राखी ता। 7 तैं बोलेया, "ओ बेबीलोनियो, मां सदा राणी बणी की रणा" इजी री खातर तैं आपणे मनो दे इना गल्ला रे बारे दे नि सोचेया ओर ये पनि सोचेया कि इना गल्ला रा क्या फल़ ऊणा। 8 इजी री खातर मेरी सुण, तूँ जो राग-रंगो दे फसी री बिना डरे बैठी री रएई ओर मनो दे बोलोई, "कि आऊँ ईए ओर माखे छाडी की दूजा कोई नि ए, मां बिदुआ जेड़े नि बैठणा ओर ना मेरे बाल-बच्चे मरने।"* 9 सुण, ये दोनो गल्ला, मतलब दु:ख ओर बच्चेया रा मरना ओर बिदुआ ऊणा, अचाणक एक ई दिने तां पाँदे पड़ना। तेरे बऊत सारे जादू-टोणे ओर तंत्र-मंत्र ऊँदे ऊए बी यो तां पाँदे आपणी पूरी तागती ते पड़ने।* 10 तैं आपणी बुराईया पाँदे परोसा राखेया, तैं बोलेया, "माखे कोई नि देखदा" तेरी बुद्धि ओर ज्ञाने तूँ बईकाईती ओर तैं आपणे मनो दे बोलेया, "आऊँ ईए ओर मांते अलावा कोई दूजा नि ए।" 11 पर तेरी एड़ी बुरी दशा ऊणी, जेतेरा मंत्र तूँ नि जाणदी ओर तां पाँदे एड़ी मुसीबत पड़नी कि तूँ तिजी रा प्राश्चित करी की निवारण नि करी सकदी, तां पाँदे अचाणक मुसीबत आऊणी, जेतेरा ताखे कोई बी पता नि ए।*

12 आपणे तंत्र-मंत्र ओर बऊत सारे जादू जो तैं बचपनो ते सीखी राखे, कामो दे ल्याओ, क्या पता ताखे तिना ते कुछ फायदा ऊई जाओ या तिना रे जरीये स्थिर रई सके। 13 तूँ तो योजना करदी-करदी थकी गी री; एबे तेरे ज्योतषी जो नक्षत्र त्यानो साथे देखोए ओर नये-नये चाँद देखी की ऊणे वाल़ी गल्ला बताओए, सेयो खड़े ऊई की ताखे तिना मुसीबता ते बचाओ जो तां पाँदे पड़नियां। 14 देख, बेबीलोनो रे ज्योतषी पूओ जेड़े ऊई की आगी दे फूखी जाऊणे; सेयो आपणे प्राणो खे आगी ते नि बचाई सकणे। से आग सेखणे खे नि, ना एड़ी ऊणी कि जेते सामणे कोई बैठी सको! 15 जिना रिया तँईं तूँ मईणत करदी आई री सेयो सारे तेरिया तँईं तेड़े ई ऊणे ओर जो तेरी जवानिया दे तां साथे बपार करदे आई रे, तिना बीचा ते हर एक आपणी-आपणी बाटा दे चली जाणा, ताखे बचाणे वाल़ा कोई नि रणा।