यशायाह 22

यरूशलेम शईरो रिया तँईं परमेशरो रा सन्देश

1 परमेशरे ये वचन दर्शणो री तराईया रे बारे दे देई राखेया।*22:1 ये सन्देश माखे यरूशलेम, दर्शणो री काअटिया रे बारे दे मिली रा। शईरो रे सारे लोक खुशी मनाणे खे आपणे कअरा री छता पाँदे कऊँ जाणे लगी रे?*22:1 एक इस्राएली कअरो री छत सीदी ओ थी, ओर बारली कांदा साथे जमीना ते ऊबे जाणे खे पैड़िया ओ थिया। 2 ओ आल्ले-गोल्ले ते ओर हुड़दंगो ते परी रे यरूशलेम शईरो रे लोको, तुसा बीचे जो काई राखे, सेयो ना तो तलवारी साथे ओर ना युद्धो दे काई राखे। 3 तेरे सारे न्यायी कट्ठे नठीगे ओर बिना धनुषो ते बन्दी बणाईते रे। तेरे जितणे बाकी रईगे, सेयो सब कट्ठे बानी ते, तेबे बी सेयो दूर नठीगे थे। 4 इजी बजा ते आऊँ एड़ा बोलूँआ की मा कनारे नि देखो, बस माखे रोणे देओ यरूशलेम शईरो रे सत्यानाश ऊणे ते माखे शान्ति देणे री कोशिश नि करो। 5 सेना रे प्रभु यहोवे रा ठराया रा दिन ऊणा, जेबे दर्शणो री तराईया दे आल्ला-गोल्ला ओर केसेया जाणा ओर बेचैनी ऊणी। दवाला दे सुरंग लगाई जाणी ओर दुहाईया री आवाज पाह्ड़ो दे पऊँचणी। 6 एलाम देशो रे कोड़ेया रे सवार सिपाई आपणे-आपणे तर्कश बानी की लड़ाईया खे त्यार ए, ओर कीर शईरो रे सिपाईया ढाला दे बड़ी छेड़ करनी। 7 तेरी अच्छी-अच्छी तराईया रथो साथे परी रिया ऊणिया ओर सवार बड़े द्वारो सामणे अथियार बाने रे ऊणे। तिने यरूशलेम शईरो रा द्वार खोली ता रा। 8 तेस बखते यहूदा री रक्षा रा सारा काम बेकार ऊईगा दा ए। जेबे एड़ा ऊआ, तो तुसे जंगल़ो रे मईलो ते अथियार लई की आए। 9 ओर तैं दाऊदपुरो*22:9 दाऊदपुरो यरूशलेमो री दवाला री दरारा देखिया कि सेओ बऊत ए ओर तैं थालले खाल़ा रा पाणी कट्ठा कित्तेया। 10 तेबे तैं यरूशलेम शईरो दे कअर गिणी की दवाल मजबूत करने खे कअर टाल़ी ते। 11 तैं दुँईं कांदा बीचे पुराणे खाल़ा रे पाणिए खे एक कुण्ड खणेया। पर तैं तेसरा बनाणे वाल़ा याद नि कित्तेया, परमेशरे से पुराणे बखतो ते बणाई राखेया था ओर ना तैं तेसरी तरफा खे देखेया। 12 तेस बखते सेना रे प्रभु यहोवे रोणे-पीटणे, सिर गँजा करने ओर टाट पईनणे खे बोलेया था। 13 पर तिने क्या देखेया कि खुशी ओर मजे ऊणे लगी रे, गायी-बल़द ओर पेडा बाकरिया खे काणे लगी रे, तुसे तिना रे मासो पाँदे पाट्टी करोए, ओर बोलोए, "आओ, खाओ-पियो, कऊँकि काल तो आसे मरी सकूँए।"*22:13 1 कुरि. 15:32 14 सेना रे यहोवे ये गल्ला मा साथे बोलिया थिया ओर आपणे मनो री गल्ल बताई, "पक्का तुसा लोका रे एस पापो रा कोई प्राश्चित तुसा री मौता तक नि ऊई सकणा", सेना रे प्रभु यहोवे री येई बाणी ए।

शेबना खे चतौणी

15 सेना रे प्रभु यहोवे मांगे आई की ईंयाँ बोलेया, "शेबना नाओं रे तेस पण्डारिये गे जो राजकराने रे कामो पाँदे नियुक्त ए, जाई की बोल, 16 तेसते पूछणा, तूँ एती क्या करने लगी रा? एती तेरा कुण ए कि तैं आपणी कब्र एती खणायी? तूँ आपणी कब्र ऊच्ची जगा दे खणाएया ओर आपणे रणे री जगा चट्टानी दे खणाएया? 17 देख, यहोवे तूँ बड़ी सामर्था साथे पकड़ी की बऊत दूर करी देणा। 18 यहोवे तूँ मरोड़ी की गींदो जेड़ा लाम्बे-चौड़े देशो दे सेटी देणा। आपणे दुश्मण मालक जेसरी तुसे सेवा करोए तेसरे कराने खे बेज्जत करने वाल़े तेती तुँ मरना ओर तेरे वैभवो रे रथ तेथी ई रई जाणे। 19 मां तूँ तेरी जगा ते तकेली की बारे करी देणा ओर तूँ तेरे बड़े पदो ते उतारी देणा।" 20 यहोवे शेबना ते बोलेया, "जेस दिने ये ऊणा तेस बखते मां हिल्किय्याह रा पाऊ आपणा दास एल्याकीम बुलाई की, तेसखे तेरा चोगा पन्याणा। 21 तेसरे लको दे तेरा अधिकारो वाल़ा पटका गूड़ी की बानणा ओर तेरा सारा काम जो तूँ करेया तांते लई की तेसरे आथो दे देई देणा। से सेवक यरूशलेम शईरो रे लोका ओर यहूदा रे कराने रे लोका खे बाओ जेड़ा ठईरना।"

22 मां से राजे रे कब्जे दे, दाऊदो रे वंशो दे पूरा अधिकार देणा। ओर से केसी द्वारो खे खोलोगा तेबे से द्वार खुला ई रणा। कोई बी आदमी तेसखे बन्द नि करी सकणा; जे से केसी द्वारो खे बन्द करोगा तेबे से द्वार बंद ऊई जाणा। कोई बी आदमी तेसखे खोली नि सकदा से सेवक आपणे बाओ रे कअरो दे एक सिंहासनो जेड़ा ऊणा।*22:22 प्रका. 3:7 23 मां से मजबूत जगा दे किलेया जेड़ा दबाणा ओर से आपणे बाओ रे कराने खे महिमा वाल़े सिंहासनो जेड़ा ऊणा। 24 तेसरे बाओ ते बच्चे ओर रिश्तेदारा रा सारा वैभव, कुल ओर बच्चे, सारे छोटे-छोटे पांडे, क्या कटोरे, ओर बड़ी-बड़ी सुराहिया, सब तेते पाँदे टाँगिया जाणिया। 25 सेना रे यहोवे री येई बाणी ए, "जेस दिने एड़ा ऊणा तेस बखते से किल्ला जो मजबूत जगा दे लगाया था, से टीला ऊई जाणा ओर कटी की सेटी देणा ओर तेस पाँदला सारा पार छूटी जाणा, कऊँकि यहोवे ये बोली राखेया।"