1 यहोवे बोलेया, "मेरे दासो खे देखो जेसखे आऊँ सम्बाल़ूँआ, मेरे चूणे दे खे, जेसते मेरा मन खुश ओआ; मैं तेस पाँदे आपणा आत्मा राखी राखेया, तेस जातिया-जातिया रे लोका खे न्याय दलाणा।* 2 ना यहोवे रा दास चींगणा ओर ना तेस जोरे की बोलणा, ना ई सड़का दे आपणा बोल सुनाणा। 3 यहोवे रे दासो केसे रे नंगल़ नि तोड़ने ओर ना बल़ी री बत्ती बजयाणी, तेस सच्चाईया साथे न्याय करना। 4 से कमजोर ओर केसेया रा तदुओ तक नि ऊणा, जदुओ तक से न्याय खे दुनिया दे नि लई आओ। दूर देशो रे लोका तेसरी शिक्षा पाँदे परोसा करना।"

5 परमेशर जो सर्गो खे बनाणे वाल़ा ओर तणने वाल़ा ए, जो फसला समेत तरतिया खे फैलाणे वाल़ा ओर तेते पाँदले लोका खे साआ ओर तेते पाँदे चलणे वाल़ेया खे आत्मा देणे वाल़ा यहोवा ए, से आपणे दासो खे ईंयाँ बोलोआ, 6 "मैं यहोवे तूँ तर्मो साथे बुलाई राखेया, मां तेरा आथ पकड़ी की तेरी रक्षा करनी; मां तूँ प्रजा खे वाचा ओर जातिया खे प्रयासा ठईराणा;* 7 ताकि तूँ अन्देया रिया आखी खोले, कैदिया खे जेला ते निकयाल़े ओर जो न्हेरे दे बैठी रे तिना खे जेला ते निकयाल़ो।* 8 आऊँ यहोवा ए, मेरा नाओं यहोवा ई ए, मां आपणी महिमा दूजे खे नि देणी ओर जो महिमा मां जोगी ए, से कअड़ी री मूर्तिया खे नि देणी। 9 देखो, पईलकिया गल्ला तो ऊई चुकिया, एबे आऊँ नईया गल्ला बताऊँआ; तिना रे ऊणे ते पईले आऊँ तुसा खे सुणाऊँआ।"

10 ओ समुद्रो दे चलणे वाल़ेयो, ओ समुद्रो दे सब रणे वाल़ेयो, ओ द्वीपो, तुसे सब आपणे रणेया वाल़ेया समेत यहोवे खे एक नवां गीत गाओ ओर तरतिया रे कूणे ते तेसरी स्तुति करो।* 11 उजाड़ जगा ओर तेथो रिया बस्तिया ओर केदारो रे लोक जो अराबो रे रेगिस्तानो दे रओ थे यहोवे री जयजयकार करो, सेला शईरो दे रणे वाल़े लोको जयजयकार करो, सेयो पाह्ड़ो री चूँडिया पाँदा ते जोरे की गाओ। 12 सेयो यहोवे री महिमा बताओ ओर द्वीपो दे तेसरे बारे दे बताओ। 13 यहोवा वीर सिपाईया जेड़ा बारे निकल़ना ओर सिपाईया जेड़ा आपणा रोष पड़काणा, तेस जोरे की ललकारना ओर आपणे दुश्मणा ते जितणा। 14 यहोवे बोलेया, "आऊँ बऊत बखतो ते तो चुप रया ओर मौन रयी की आपू खे रोकदा रया, पर एबे मां बच्चे खे जन्म देणे वाल़ी जवाणसा जेड़ा चींगणा ओर हाँफी-हाँफी की साआ परना। 15 मां पाह्ड़ ओर पाह्ड़िया सुकाई देणियां ओर तिना री सारी अरयाली सुकाई देणी; मां नदिया द्वीप करी देणे ओर तलाब सुकाई देणे।" 16 फेर मां अन्दे लोक एकी बाटा रिये लई जाणे, जेतेखे सेयो नि जाणदे ओर सेयो एड़ी बाटा दे चलाणे, जेतेखे सेयो नि जाणदे। तिना ते आगे मा राती दे प्रयासा करना ओर टेडिया बाटा सिदिया करनिया। मा एड़े-एड़े काम करने ओर सेओ नि छाडणे।* 17 जो लोक कअड़ी री मूर्तिया पाँदे परोसा राखोए ओर तिना खे बोलोए, "तुसे म्हारे ईश्वर ए" तिना खे पीछे आटणा पड़ना ओर बऊत शर्मिंदा ऊणा पड़ना।

18 यहोवा बोलोआ, "ओ टऊणेयो, सुणो; ओ अन्देयो, आखी खोलो ताकि तुसे देखी सको!* 19 मेरे दासो ते अलावा ओर कुण अन्दा ए? मेरे पेजे रे दूतो जेड़ा कुण टऊणा ए? मेरे दोस्तो जेड़ा कुण अन्दा या यहोवे रे दासो जेड़ा कुण अन्दा ए? 20 ओ इस्राएल, तूँ बऊत सारी गल्ला पाँदे नजर लगाएया, पर तिना खे देखदा नि; कान तो खुले ए, पर सुणदा नि। 21 यहोवे खे आपणे तर्मो रे मुताबिक ये अच्छा लगेया कि बिधानो री तारीफ जादा करो।* 22 पर यो इस्राएलो रे लोक लूटी गे रे ओर गड्डेया दे फसी रे ओर जेला दे बन्द करी राखे, यो पकड़े ओर इना खे कोई नि छुड़ांदा, यो लूटी गे ओर कोई आज्ञा नि देंदा कि वापस करी देयो। 23 तुसा बीचा ते केस एते पाँदे त्यान लगाणा? केस त्यान लगाई की मईणत करने वाल़े रिया तँईं सुणना? 24 याकूब किने लूटाया ओर इस्राएल लूटेरेया रे वशो दे करी ता? क्या यहोवे ये नि कित्तेया जेसरे खलाफ आसे पाप कित्तेया, जेसरी बाटा दे तिने चलणा नि चाया ओर ना तेसरा बिधान मानेया? 25 इजी बजा ते यहोवे इस्राएलिया पाँदे आपणे रोषो री आग पड़काई ओर युद्धो री तागत चलायी, तेबे बी आग तेसरे चऊँ कनारे लगी गी, तेबे बी से नि समजेया, से फूखी बी गया, तेबे पनि समजेया।"