1 भविष्यबक्ता बोलोआ, "सुणो, यहोवे रा आथ इतना छोटा नि ऊईगा कि से ताखे बचाई नि सकदा, ना ई से एड़ा टऊणा ऊईगा रा कि मतादा रिया तँईं तेरी प्रार्थना खे सुणी नि सको; 2 पर तुसा रे पाप तुसा खे तुसा रे परमेशरो ते दूर करोए ओर इजी री खातर तुसा रे पापो रिया बजा ते तिने आपणा मूँ तुसा रिया प्रार्थना ते फेरी ला दा ए ताकि तेसखे सुणो नि।" 3 कऊँकि तुसा रे आथ अत्या रे खूनो साथे ओर तुसा री गूठिया पापो रे कामो साथे अपवित्र ऊई गी रिया, तुसा रे मुंए ते तो चूठ ओर तुसा री जीबा ते बुरिया गल्ला निकल़ोईया। 4 दूजे आदमिए रे बारे दे कोई बी आदमी सच्च नि बोलदा। लोक अदाल़ती दे एकी दूजे रे खलाफ मुकद्दमा करोए। सेयो चूठो पाँदे परोसा राखोए। सेओ एकी दूजे रे बारे दे चूठिया गल्ला बोलोए; तेसखे मानो चगड़ा करने री पीड़ ओई ओर सेयो बुराईया खे जन्म देओए। 5 सेयो बुरे लोक सापो रे अण्डे पाल़ोए ओर गल़ाऊआ रे जाल़ बणाओए; जो कोई तिना रे अण्डे खाओआ, से मरी जाओआ ओर जेबे कोई एकी खे फोड़ोआ, तेबे तेते बीचा ते साप निकल़ोआ। 6 गल़ाऊए रे जाल़ो रे पतल़े तागेया टाल्लेया रा काम नि करना, ना सेयो आपणे कामो साथे आपू खे टखी सकोए। कऊँकि तिना रे काम अनर्थ ई ओए ओर तिना रे आथो साथे उपद्रवो रा काम ओआ। 7 एड़े लोक बुराई करने खे दौड़ोए ओर ये लोक निर्दोषो री अत्या करने खे आगे रओए, तिना री योजना बेकार ए, उजाड़ ओर नाश ई तिना री बाटा रे ए। 8 एड़े लोक शान्तिया री बाट जाणदे ई नि ओर ना तिना रे बर्ताओ रे न्याय ए; तिना री बाट टेडी ए, जो कोई तिना पाँदे चलोगा, तेसखे शान्ति नि मिलणी।*

9 लोक बोलोए, "इजी बजा ते परमेशरो रा न्याय आसा ते बऊत दूर ए ओर तर्म आसा रे नेड़े नि आऊँदा; आसे प्रयासे री बाट तो देखूँए पर देखो, न्हेरा ई बणेया रा रओआ, आसे प्रयासे री उम्मीद तो लगाई राखूँए, पर अन्दकूप न्हेरे देई चलूँए।" 10 आसे अन्देया जेड़ी कांद तोपुंए, आ, आसे बिना आखी रे लोका जेड़े तोपुंए; आसे दिने-दपैरे राती जेड़ी ठोकर खाऊँए, तगड़ेया बीचे आसे मुड़देया जेड़े ए। 11 आसे सब बऊत दु:खी ए आसे सारे के सारे पूखे पालूए जेड़े चीगूँए ओर कूगिया जेड़े चीं-चीं करूँए, आसे न्याय री बाट तो देखूँए, पर से केथी नि ए; ओर आसे परमेशरो ते प्रार्थना करूँए कि से आसा खे अत्याचार ओर अन्याय ते बचाओ, पर से आसा ते दूर ई रओई। 12 कऊँकि ओ यहोवा, म्हारे पाप परमेशरो रे सामणे बऊत ऊई रे, म्हारे पाप म्हारे खलाफ गवाई देणे लगी रे; म्हारे पाप आसा साथे ए ओर आसे आपणे बुरे काम जाणूंए। 13 आसे यहोवे रा पाप करी राखेया, आसे तेसते मुकरी गे ओर आपणे परमेशरो पीछे चलणा छाडीता, आसे अन्देर करने लगे ओर उल्ट-फेरो रिया गल्ला बोलिया, आसे मनो दे चूठिया गल्ला बणाईया ओर बोली बी राखिया। 14 आसे न्याय तो पीछे टाईता ओर तर्म दूर खड़ा रईगा; कऊँकि सच्चाई बजारा दे नि मिलदी ओर ईमानदारी आऊँदी नि। 15 आ, सच्चाई राची गी ओर जो बुराईया ते नठोआ, से शिकार ऊई जाओआ।

प्रभुए ये देखी की बुरा मानेया, कऊँकि न्याय जांदा रया। 16 यहोवे देखेया कि कुचल़े दे लोका री मताद करने वाल़ा कोई नि ए ओर इजी ते हैरान ऊआ कि कोई प्रार्थना करने वाल़ा नि ए; तेबे तिने आपणी सामर्था साथे ई उद्धार कित्तेया ओर आपणे तर्मी ऊणे रिया बजा ते से सम्बल़ी गा।* 17 यहोवे तर्म झिलमा जेड़ा पईनी ला ओर तेसरे सिरो पाँदे उद्धारो रा टोप राखी राखेया; तिने बदला लणे रे टाल्ले पईनी ले ओर जल़न चोगे जेड़ी पईनी ली री।* 18 तेसरे दुश्मणा रे कामो रे मुताबिक यहोवे तिना खे फल़ देणा, तेस आपणे बिरोदिया पाँदे आपणा रोष पड़काणा ओर आपणे दुश्मणा खे तिना री कमाई देणी; तेस तिना लोका खे बी तिना री कमाई देई देणी जो द्वीपो रे रओए।* 19 तेबे पच्छमा रिया तरफा ते लोका यहोवे रे नाओं रा ओर पूर्बो रे लोका रिया तरफा ते यहोवे री महिमा रा डर मानणा; कऊँकि जेबे दुश्मणा समुद्रो जेड़ी चढ़ाई करनी, तेबे यहोवे रे आत्मा तेसरे खलाफ आपणा चण्डा खड़ा करना।* 20 यहोवा आपणे लोका ते बोलोआ, "याकूबो बीचे जो पापो ते मन फिराओए तिना रिया तँईं सिय्योनो रे एक छुड़ाणे वाल़ा आऊणा, यहोवे री येई बाणी ए।"* 21 यहोवा ईंयाँ बोलोआ, "जो वाचा मैं तेस साथे बानी राखी से ये ए कि मेरा आत्मा तां पाँदे ठईरी रा ओर आपणे वचन जो मैं तेरे मुंए रे पाई राखे आजो ते लई की सदा तक सेयो तेरे मुंए ते ओर तेरे पाऊ ओर पोतेया रे मुंए ते बी कदी नि आटणे।"*