1 यहोवा आपणे लोका खे बोलोआ, "ओ सारे त्याये लोको, पाणिए गे आओ ओर जिना गे पैसा नि ओ, तुसे बी आई की खाणा खरीदो ओर खाओ! शराब ओर दूद बिना पैसे ओर बिना दाम देई की आई की लई लो।* 2 जो खाणे रिया चीजा नि ए, तिजी खे तुसे कऊँ पैसा लगाओए ओर जेते कि पेट नि परदा तेतेखे कऊँ मईणत करोए, मेरी तरफा खे त्यान लगाई की सुणो, तेबे खरी चीजा खाई सकोए ओर तल़ी रिया चीजा खाई की सन्तुष्ट ऊई जाणे।" 3 ओ मेरे लोको, "जो कुछ आऊँ बोलूँआ त्यानो साथे सुणो ओर मांगे आओ, तेबे तुसे जिऊँदे रणे ओर मां तुसा साथे सदा री वाचा बानणी, मतलब दाऊदो पाँदली अटल़ करूणा री वाचा।* 4 सुणो, मैं दाऊद राज्य-राज्य रे लोका खे गवाह्, ओर परदान ओर आज्ञा देणे वाल़ा ठराई राखेया।* 5 सुण, तां एड़ी जाति जेसा खे तूँ नि जाणदा बुलाणी ओर एड़ी जातिया जो ताखे नि जाणदिया तांगे दौड़ी की आऊणियां, तिना तेरे परमेशर यहोवा ओर इस्राएलो रे पवित्र परमेशरो रिया खातर ये करना, कऊँकि तिने तूँ इज्जतदार करी राखेया।" 6 जदुओ तक यहोवा मिली सकोआ, तदुओ तक तेसरी टोल़ा रे रओ, जदुओ तक से तेरे नेड़े ए, तदुओ तक तेसखे आका पाओ;* 7 दुष्ट आपणा चाल-चलण ओर बुरे काम करने वाल़े आपणे सोच-बिचार छाडी की यहोवे रिया तरफा खे ई फिरो, तेस तिना पाँदे दया करनी, से म्हारे परमेशरो रिया तरफा खे फिरो ओर तेस तेसखे पूरी तरअ ते माफ करना। 8 कऊँकि यहोवा बोलोआ, "मेरे बिचार ओर तुसा रे बिचार एक जेड़े नि ए, ना तुसा री बाट ओर ना मेरी बाट एक जेड़ी ए।* 9 कऊँकि मेरी ओर तुसा री गतिया रे ओर मेरे ओर तुसा रे सोच-बिचारो दे सर्ग ओर तरतिया रा फर्क ए।" 10 यहोवा बोलोआ, "जिंयाँ सर्गो ते बर्खा ओर बर्फ पड़ोआ ओर बर्फा रा पाणी बणी जाओआ, ओर सर्गो खे वापस नि ऊँदा बल्कि तरतिया पाँदे जमीना खे सिंजी की बिऊ उपजाओ आ जेते कि बाणे वाल़े खे बेजा ओर खाणे वाल़े खे रोटी मिलोई,* 11 तेड़ा ई मेरा वादे रा वचन बी ऊणा जो मेरे मुंए ते निकल़ोआ; से बेकार ठईरी की मांगे वापस नि आऊणा, पर जो मेरी इच्छा ए से तेस पूरी करनी ओर जेस कामो खे से मैं पेजी राखेया तेस से पूरा करना। 12 कऊँकि तुसे बेबीलोनो ते खुशिया साथे निकल़ने ओर शान्तिया साथे पऊँछाए जाणे; तुसा ते आगे-आगे पाह्ड़ ओर पाह्ड़िया गल़ा खोली की जयजयकार करनी ओर मैदानो रे डाल़ा खुशिया रे मारे चाड़िया बजाणियां। 13 तेबे कांडे-चीटा रे बदले सनौबर ओर चींआ रे डाल़ो रे बदले मईंदी जमणी ओर इजी ते यहोवे रा नाओं ऊणा, जो सदा री नशाणी ऊणी ओर कदी नि मिटणी।"