1 लाणत ए तिना पाँदे जो लोक मतादा रिया तँईं मिस्र देशो खे जाओए ओर कोड़ेया रा आसरा करोए; जो रथा पाँदे परोसा राखोए, कऊँकि सेयो बऊत ए ओर सवारा पाँदे, कऊँकि सेयो बऊत तागतबर ए, पर इस्राएलो रे पवित्र परमेशरो रिया तरफा खे नि देखदे ओर ना ई यहोवे खे टोल़दे!* 2 पर यहोवा ई अक्लमंद ए ओर से यहोवा ई ए जेस तिना खे दु:ख देणा, तेस आपणे वचन नि टाल़ने, पर उठी की कुकर्मिया रे करानेया पाँदे ओर बुरे काम करने वाल़ेया री मताद करने वाल़ेया पाँदे बी अमला करना। 3 मिस्र देशो रे लोक परमेशर नि ए, माणूं ई ए; ओर तिना रे कोड़े आत्मा नि मास ई ए। जेबे यहोवे आथ बढ़ाणा, तेबे मताद करने वाल़े ओर मताद चाणे वाल़े दोनो ठोकर खाई की रूड़ने ओर सेयो सारे के सारे कट्ठे ई नाश ऊई जाणे।

4 फेर यहोवे माखे ईंयाँ बोलेया, "जिंयाँ शेर या जवान शेर जेबे आपणे शिकारो पाँदे गुर्राओआ ओर गवाल़े कट्ठे ऊई की तेसरे खलाफ बड़ी पीड़ लगाओगे, तेबे बी से तिना रे आल्ले ते नि डरदा ओर ना तिना रे आल्ले रिया बजा ते नठदा, तिंयाँ ई सर्वशक्तिमान यहोवा, सिय्योन पाह्ड़ ओर यरूशलेम शईरो री पाह्ड़िया री रक्षा करने खे ऊँदे उतरना। 5 यहोवे तीईया ई यरूशलेम शईरो री रक्षा करनी जिया आपणे कोअले पाँदे उडदी ऊई चिड़िया आपणे बच्चेया री रक्षा करोई। यहोवे से बचाणा ओर तेसरी रक्षा करनी। यहोवा पाँदिए ऊई की निकल़ी जाणा और यरूशलेम शईरो री रक्षा करनी।"

6 ओ इस्राएलो रे लोको, तुसे यहोवे ते पूरी तरआ ते अटी गे दे ओ, तुसे परमेशरो री तरफा खेई फिरो। 7 तेस बखते तुसा लोका सूईने ओर चाँदिए रिया आपणी-आपणी मूर्तिया साथे जिना खे बणाई की तुसे पापी ऊईगे रे, नफरत करनी। 8 तेबे अश्शूर तेसा तलवारी साथे लड़ाईया दे टाल़ेया जाणा जो माणूंआ री नि ए; से तेसा तलवारी रा ग्रा ऊई जाणा जो माणूंआ री नि ए; ओर से तलवारी सामणे ते नठणा ओर तेसरे जवान सिपाई पकड़ी की दास बणाई देणे। 9 से डरो रे मारे आपणे सुन्दर मईलो ते चली जाणा ओर तेसरे परदान कबराई की लड़ाईया रा चण्डा छाडी की नठी जाणे। यहोवा जेसरी आग सिय्योनो दे ओर जेसरा पट्ठा यरूशलेम शईरो दे ए, तेसरी येई बाणी ए।