यशायाह 28

एप्रैम ओर यरूशलेम शईरो पाँदे हाय

1 कमण्डो रे मुकुटो पाँदे लाणत ए!*28:1 ये शईर उत्तरी इस्राएलो रे राज्य री राजधानी सामरिया ए। ये पूरे देशो पाँदे राज करोआ। जो एप्रैमो रे नशेड़िये राए*28:1 इस्राएलो रे परदान जो जादातर नशे देई रओ थे ओर तिना री पड़काणे वाल़ी सुन्दरता पाँदे जो मुरझाणे वाल़ा फूल ए, जो बऊत उपजाऊ तराईया रे सिरे पाँदे शराबो साथे नशेड़िया री ए। 2 देखो, मेरे प्रभुए गे एक तागतबर ओर सामर्थी माणूं ए,*28:2 सामरिया जो ओल़ेया री बर्खा या उजाड़ने वाल़े तूफान बाढ़ा री प्रचण्ड नदिया जेड़ा ए, तेस तागतबर ऊई की तरती जमीना पाँदे रूड़ाई देणी। 3 एप्रैमो रे नशेड़िया लोका रा कमण्डो रा मुकुट*28:3 कमण्डो रा मुकुट इस्राएलो रा सुन्दर मुकुट पैरा साथे केसेया जाणा। 4 ओर तिना री पड़काणे वाल़ी सुन्दरता रा मुरझाणे वाल़ा फूल जो बऊत उपजाऊ तराईया रे सिरे पाँदे ए, से गर्मिया ते पईले पाक्के रे दाऊगल़े जेड़ा ऊणा, जेतेखे देखणे वाल़ा देखदे ई आथो दे लओ ओर खाई जाओ। 5 तेस बखते सेना रा यहोवा आपू आपणी प्रजा रे बचे रे लोका खे सुन्दर ओर प्रतापी मुकुट ठईरना। 6 ओर जो न्याय करने खे बैठोए तिना रिया तँईं न्याय करने वाल़ी आत्मा ओर जो अमला करदे ऊए दुश्मणा खे शईरो रे बड़े द्वारो ते टायी देओए, तिना खे से तागत ठईरनी। 7 ये पुरोईत ओर नबी बी शराबो रिया बजा ते रूड़ोए ओर शराबो रिया बजा ते लड़खड़ाओए। पुरोईत ओर नबी बी शराबो रिया बजा ते लड़खड़ाओए, शराबे सेयो पुलाई ते रे, सेयो शराबो रिया बजा ते लड़खड़ाओए ओर दर्शण पाँदे ऊए पटकी जाओए ओर न्याय करदे ऊए पूली जाओए। 8 कऊँकि सारी खाणा खाणे री जगा उल्टी ओर कूड़े साथे परी रिये, कोई शुद्ध जगा नि बची। 9 सेयो मांते शकाईत करोए ओर पूछोए, "तेस केसखे ज्ञान सिखाणा ओर केसखे आपणे सन्देशो रा मतलब समजयाणा? क्या तिना खे जो दूद छुड़ाए दे बच्चे ओर दुदुआ साथे बिना लगाए दे बच्चे ए। 10 कऊँकि आज्ञा पाँदे आज्ञा, आज्ञा पाँदे आज्ञा, नियमो पाँदे नियम, नियमो पाँदे नियम, थोड़ा एती, थोड़ा तेती।" 11 फेर एबे यहोवे खे आपणे लोका ते परदेशी जो दु:ख देओ ए तिना रे जरीये गल्ल करनी पड़नी, जो एक लग ई पाषा बोलोए। 12 यहोवे पईले तिना लोका ते बोलेया था, "राम एसते ई मिलणा, एसरे जरीये ई थके रेया खे राम देयो", पर लोके परमेशरो री सुणनी नि चाई। 13 इजी री खातर परमेशरो रा वचन तिना गे आज्ञा पाँदे आज्ञा, आज्ञा पाँदे आज्ञा, नियमो पाँदे नियम, नियमो पाँदे नियम, थोड़ा एती, थोड़ा तेती, जेते कि सेयो ठोकर खाई की बेओश ऊई की रूड़ो ओर कायल ऊई जाओ ओर फन्दे दे फसी की पकड़े जाओ।

सिय्योन देशो दे निऊँ

14 ओ, यरूशलेम शईरो रे आज्ञा ना मानणे वाल़े कमण्डी परदानो, यहोवे रा वचन सुणो! 15 तुसे लोक बोलोए, "आसे मौता साथे वाचा बानी ओर अधलोको ते प्रतिज्ञा कराई राखी, इजी बजा ते मुसीबत जेबे बाढ़ा जेड़ी बढ़ी की आओगी, तेबे आसा गे नि आऊणी, कऊँकि आसे चूठो री शरण लई ओर चूठो पीछे लूके रे रये।" 16 इजी री खातर परमेशर यहोवा ईंयाँ बोलोआ, "देखो, मैं सिय्योनो रे पाह्ड़ो पाँदे निऊँआ रा पात्थर राखी राखेया,*28:16 एक मजबूत निऊँआ रा पात्थर आपू यहोवे री एक नशाणी ए एक परखेया रा पात्थर, कूणे रा कीमती ओर बऊत मजबूत निऊँआ जोगा पात्थर ओर जो कोई परोसा राखोगा, तेस जल्दबाजी नि करनी।*28:16 रोम. 9:33, 1 कुरि. 3:11, इफि. 2:20, 1 पत. 2:4-6 17 ओर मां न्याय डोरी ओर तर्म साल़ ठराणा ओर तुसा रे चूठो री जगा ओल़ेया साथे बह्यी जाणी ओर तुसा रे लूकणे री जगा पाणिए दे डूबी जाणी।" 18 तेबे जो वाचा तुसे मौता साथे बानी राखी, से टूटी जाणी ओर जो प्रतिज्ञा तुसे अधलोको ते कराई से नि ठईरनी, जेबे मुसीबत बाढ़ा जेड़ी बढ़ी जाओगी, तेबे तुसे तिदे डूबी जाणे। 19 जेबे-जेबे से बाढ़ बढ़ी जाओगी, तेबे-तेबे तेसा तुसे लई जाणे, से रोज बल्कि दिन-रात बढ़ेया करनी ओर एस सन्देशो रा सुणना ई बेचैन ऊणे रिया बजा ते ऊणा। 20 कऊँकि बछौणा खुटिया फैलाणे खे छोटा ओर टखण टखणे खे कम ए। 21 कऊँकि यहोवा एड़ा उठ खड़ा ऊणा जेड़ा से पराजीम नाओं रे पाह्ड़ो पाँदे खड़ा ऊआ ओर जेड़ा गिबोनो री तराईया दे रोषे ऊआ था,*28:21 2 सेमु. 5:20, 1 कुरि. 14:11 तेस एबे फेर रोष दखाणा, जेते कि से आपणा काम करो, जो अचम्बे रे काम ए ओर एड़े काम करने जो नऊखे ए।*28:21 यहोशू 10:10-11 22 इजी री खातर एबे तुसे मजाक नि करो, नई तो तुसा रे बान गूड़े जाणे, कऊँकि मैं सेना रे यहोवे ते ये सुणी राखेया कि तेस सारे देशो रा सत्यानाश करना।

परमेशरो रा ज्ञान

23 जो सन्देश आऊँ तुसा खे सुनाणे लगी रा, तेसखे त्यान लगाई की सुणो। 24 क्या अल़ बाणे वाल़ा बेजा बाणे खे लगातार बांदा रओआ? क्या से सदा तरतिया खे चीरदा रओआ ओर मैड़ा फेरदा रओआ? 25 एड़ा नि आ, एक जिम्मीदार डोरूए खे पईले सीदा करी की तिदे संफ सेटोआ, जीरा बाओआ ओर कणका खे सरेद-सरेद करी की फल्याओआ ओर जौ बी लग जगा दे लगाओआ। ओर कई प्रकारा रा कणका रा बीज डोरूआ रे कनारे पाँदे बाओआ। 26 कऊँकि तेसरा परमेशर तेसखे ठीक-ठीक काम करना सिखाओआ ओर बताओआ। 27 दाणा काडणे वाल़ी मशीना दे संफ काडी नि जांदी ओर गडिया रा टईर जीरे पाँदे नि चलाया जांदा, पर संफ डण्डे साथे ओर जीरा सोठे साथे चाड़ेया जाओआ। 28 रोटिया रा नज्ज मशीना दे काडेया जाओआ, पर कोई तिजी खे सदा काडदा नि रंदा ओर ना ई कोई गडिया रे टईर या कोड़े तिजी पाँदे चलांदा, से तिजी रा चूरा नि करदा। 29 ये बी सेना रे यहोवे रिया तरफा ते नियुक्त ऊई रा, से अद्भुत योजना वाल़ा ओर बड़ा समजदार ए।