1 ओ परमेशर, मां पाँदे बऊत मुसीबत पड़ी री, मेरी प्रार्थना सुण;

आऊँ आपणे दुश्मणा ते डरीगा रा ए, एबे तूँ ई मेरे जीवनो खे बचा!

2 बुरे काम करने वाल़ेया लोका रिया साजिशा ते

ओर अनर्थ काम करने वाल़ेया रिया योजना ते माखे लकोई दे।

3 तिने आपणी जीब तलवारी जेड़ी तेज करी राखी

ओर आपणे कऊड़े वचना जेड़े तीर चढ़ाई राखे,

4 ताकि लूकी की आपणे तीर बेकसूर लोका पाँदे चलाओ;

सेयो तिना पाँदे तीर बाई की डरदे पनि।

5 सेयो बुरे काम करने खे ईम्मत करोए;

सेयो तिना रे खलाफ जाल़ बछाणे रिया तँईं लूकी की योजना बणाओए

ओर आपणे आपू ते बोलोए, "आसा खे कोई नि देखी सकदा?"

6 सेयो सारे बुरे काम करने री योजना बणाओए

ओर एकी दूजे ते बोलोए, "आसे सोची समजी की पक्की योजना बणाई राखी।

कऊँकि माणूंआ रे मन ओर दिलो रे बचार बऊत गईरे ए।"

7 पर परमेशरो तिना पाँदे आपणे तीर चलाणे;

सेयो अचाणक कायल ऊई जाणे।

8 परमेशरो तिना री जीब तिना रेई खलाफ बदली देणी

ताकि सेयो ठोकर खाई की नाश ऊई जाओ;

तिना खे देखणे वाल़ेया सारेया लोका आपणा-आपणा सिर ईलांदे ऊए तिना रा मजाक ड्वाणा।

9 तेबे सारे लोक डरी जाणे

ओर परमेशरो रे कित्ते रे महान कामो रा बखान करना

ओर तेसरे कित्ते रे महान कामा रे बारे दे सोचदे रणे।

10 यहोवा आपणे तर्मी लोका खे शान्ति ओर खुशिया ते आशीष देयो।

ओर तेसरिया शरणा दे रणे वाल़े तेसरी जयजयकार करो।