1 ओ इस्राएलो रे चराणे वाल़े, सुण!

तूँ जो यूसुफो री अगुवाई पेडा जेड़ी करेया,

ओ करूबा पाँदे विराजमान ऊणे वाल़े, आपणा तेज दखा!

2 तूँ एप्रैम, बिन्यामीन ओर मनश्शे रे सामणे आईजा।

तूँ आसा खे आपणी तागत दखा; तूँ आईजा ओर आसा खे बचाई लो

3 ओ परमेशर, आसा खे जिंयाँ का तिंयाँ करी दे;

ओर आसा पाँदे दया कर, ताकि आसे आपणे दुश्मणा ते बची सकिए

4 ओ स्वर्गिय सेनाओं रे प्रभु परमेशर,

तां कदुओ तक आपणी प्रजा रिया प्रार्थना अणसुणी करदे रणा?

5 तैं तिना खे आसूआ री रोटी खुल़ाई,

ओर पीणे खे आसू ई आसू दित्ते।

6 तूँ आसा खे म्हारे पड़ोसिया साथे लड़ाई करने री बजा बणाई देया;

ओर म्हारे दुश्मण म्हारी बेज्जती करोए।

7 ओ स्वर्गिय सेनाओं रे परमेशर, आसा खे जिंयाँ का तिंयाँ करी दे;

ओर आपणी दया आसा पाँदे प्रकट कर, ताकि आसे बची जाईए।

8 तूँ मिस्र देशो ते एक दाखा री बेल लई आया;

ओर दूजिया जातिया* खे निकयाल़ी की से लगाईती।*

9 परमेशरे तेसा बेला खे जगा त्यार कित्ती;

ओर तेसे बेले जड़ पकड़ी ओर फैली की देश परीता।

10 पाह्ड़ तिजी री छाया ते

ओर बऊत बड़े देवदार तिजी रिया बेली ते टखीगे;

11 तिजी रिया पाँगटिया समुद्रो तक बढ़ी गिया,

ओर तिजी रे पलँगूर फरात नदिया तक फैली गे।

12 तेबे तैं तिजी रा बाड़ कऊँ टाईता,

एबे सारे बाटा चलदे तिजी रे फल़ तोड़ी देओए?

13 जंगल़ी सूंर तिजी खे नाश करी देओए

ओर बणो रे सारे डांगर तिजी खे चरी जाओए।

14 ओ स्वर्गिय सेनाओं रे परमेशर, वापस आईजा!

स्वर्गो ते त्यानो साथे देख, आओ ओर आपणियां प्रजा खे बचा,

15 ये बेल तैं आपणे दाँणे आथो साथे लगाई,

ओर जो पाँगटी तैं आपणियां तँईं मजबूत करी राखी,

16 से आगी दे फूखी गी, से बाडी ती;

दुश्मण तेरे थिड़कणे ते नाश ऊई जाओ।

17 पर तिना लोका री रखवाल़ी कर जो तैं आपणियां तँईं चूणी राखे

ओर से देश जेते खे तैं तागत देई राखी ए।

18 तेबे आसा लोका तांते मूँ नि मोड़ना:

तूँ आसा खे जिन्दगी दे ताकि आसे तांते प्रार्थना करी सकिए।

19 ओ स्वर्गिय सेनाओं रे प्रभु परमेशर, आसा खे जिंयाँ का तिंयाँ करी दे

ओर आसा पाँदे दया कर, ताकि आसे आपणे दुश्मणा ते बची जाईए,