परमेशर ओर माणूं
परमेशरो रा जन मूसे री प्रार्थना
1 ओ प्रभु, तूँ पीढ़िया ते पीढ़िया तक
आसा खे आसरा लणे री जगा बणी रा।
2 पाह्ड़ा रे पैदा ऊणे ते पईले, तेरे जरिए दुनिया री सृष्टि ऊणे ते पईले,
शुरूए ते अनन्तकालो तक तूँई परमेशर ए।
3 तूँ माणूंआ खे माट्टिया रे वापस लई जाएया,
ओर तूँ ये बोलेया, "ओ माणूंओ, वापस आओ!"
4 कऊँकि ह्जार साल तेरी नजरा रे एड़े ए,
जेड़ा काल का दिन जो बीती गा, या राती रा एक पईर।90:4 2 पत 3:8
5 तूँ माणूंआ खे हड़ाई की लई जाएया;
सेयो सुफने जेड़े ठईरोए, सेयो प्यागा खे बढ़ने वाल़े काओ जेड़े ओए।
6 जो प्यागा खे बड़ोई ओर फूलोई
ओर साँजा तक बाडी की मुरझाई जाओई।
7 कऊँकि आसे तेरे गुस्से साथे नाश ऊई रे
ओर तेरी जल़ना साथे कबराई गे रे।
8 ताखे म्हारे पापा रा पता ए,
जो काम आसे न्हेरे दे लूकी की कित्ते, सेयो बी ताखे दिशोए।
9 कऊँकि म्हारिया जिन्दगिया रे सारे दिन तेरे रोषो रे बीती जाओए,
आसे आपणी जिन्दगिया रे साल आह् परदे ऊए बिताऊँए।
10 म्हारी उम्रा रे साल सत्तर तो अए
ओर चाए तागती रिया बजा ते अस्सी बी ऊई जाओए,
तेबे बी तिना री अवधि दु:ख ओर पापो रे बितोई
कऊँकि से चटचारे बीती जाओई ओर आसे प्राण-पखेरू उडी जाओए।
11 तेरे गुस्से रिया शक्तिया खे
ओर तेरे डरने जोगे रोषो खे कुण समजोआ?
12 इजी खे आसा खे सखा कि म्हारा जीवन कितणा छोटा ए,
ताकि आसे समजदार ऊई जाऊँ।
13 ओ यहोवा, वापस आईजा! कदुओ तक तूँ आसा ते गुस्से रणा?
ओर आपणे दासा पाँदे तरस खा!
14 तूँ प्यागा आपणी करूणा साथे आसा खे रज्जा,
ताकि आसे पूरी जिन्दगी जयजयकार ओर खुशी मनांदे रईये।
15 जितणे दिन तूँ आसा खे दु:ख देंदा आया
ओर जितणे साल आसे क्ल़ेश सईन करदे आए तिथणे ई साल आसा खे खुशी दे।
16 तेरा काम तेरे दासा पाँदे
ओर तेरा प्रताप तिना री ल्वादा पाँदे प्रगट ओ।
17 म्हारे प्रभु परमेशरो री दया आसा पाँदे ओ,
जो काम आसे करूँए तिजी खे सफल कर,
जरूर प्रभु, तूँ म्हारे आथो रे काम सफल कर।