पजन 75

न्याय रिया तँईं परमेशरो रा तन्यवाद

बजाणे वाल़े परदानो रिया तँईं : अलतशहेत*75:0 अलतशहेत अलतशहेतो रा मतलब नाश नि करो रागो दे आसापो रा पजन, गीत।

1 ओ परमेशर, आसे तेरा तन्यवाद करूँए,

आसा तेरिया महानता रे बारे दे,

ओर तैं केड़े-केड़े नौखे काम करी राखे,

सेयो बी सबी खे बताणे।

2 परमेशर बोलोआ, "जेबे ठीक बखत आऊणा

तेबे मां आपू ई ठीक-ठीक न्याय करना।"

3 जेबे तरती तिदे सब रणे वाल़ेया समेत ईलोई,

तेबे आऊँ तिजी रे खम्बे स्थिर करूँआ। सेला

4 आऊँ कमण्डी लोका खे बोलूँआ कि कमण्ड नि करो,

ओर दुष्ट लोका खे बोलूँआ कि आपणियां तागती पाँदे कमण्ड नि करो।

5 परमेशरो रे खलाफ कमण्ड नि करो।

एड़े कमण्डो ते मत बोलो।

6 कऊँकि बढ़ोतरी ना तो पूर्वो ते,

ना पच्छमा ते ओर ना ई सुनसाण जगा ते आओई;

7 पर परमेशर ई न्याय करने वाल़ा ए,

से एकी खे थाले करोआ ओर दूजे खे बढ़ाओआ।

8 यहोवे रे आथो रे एक कटोरा ए,

तिदे तेसरे गुस्से री प्रबल दाख-शराबो ते परी री ए।

से तिजी खे लटी देओआ,

ओर सारे दुष्ट तेस पीओ ए; सेयो तेस आखरी बूँदा तक पीओ ए।*75:8 यिर्मयाह 25:15, प्रकाशित 14:10, प्रकाशित 16:19

9 पर मां तो सदा प्रचार करदे रणा,

मां याकूबो रे परमेशरो रा पजन गाणा।

10 परमेशरो सारे दुष्टा रे निकल़े रे सींग बाडी देणे,

पर तर्मिया रे सींग ऊच्चे कित्ते जाणे।