पजन 44

इस्राएलो री शकाईत

बजाणे वाल़े परदानो रिया तँईं कोरह वंशिया रा मश्कील

1 ओ परमेशर, आसे आपणे काने की सुणेया, म्हारे बुजुर्ग आसा गे ये बताओ थे

कि तैं तिना रे बखतो दे ओर पुराणे बखतो दे क्या-क्या काम करी राखे।

2 तैं आपणे आथो साथे देशो रे लोक निकयाल़े ओर यो बसाए;

तैं देशो-देशो रे लोका खे दु:ख दित्तेया ओर यो चऊँ कनारे फैलाईते;

3 म्हारे बुजुर्ग ना तो आपणी तलवारी रे बलो ते एते देशो रे अक्कदार ऊए ओर ना ई आपणी बांई री तागती साथे;

बल्कि तेरे दाँणे आथ ओर तेरी बां ओर तेरे खुश मुंए रिया बजा ते जीती गे; कऊँकि तूँ तिना ते खुश था।

4 ओ परमेशर, तूँई म्हारा महाराजा ए; तूँई आपणी प्रजा इस्राएलो खे उद्धार दलाणे वाल़ा परमेशर ए।

5 आसा तेरिया तागती रे साअरे आपणे दुश्मण पीछे तकेली की रूड़ाई देणे; आसा तेरे नाओं रे प्रतापो साथे आपणे बरोदी केसी देणे।

6 माखे आपणे धनुषो पाँदे परोसा नि ए ओर ना ई मेरी तलवार माखे बचाई सकोई।

7 पर तैंई आसे म्हारे बरोदिया ते बचाए ओर म्हारे बैरी दु:खी ओर शर्मिंदा कित्ते।

8 आसे लगातार तां परमेशरो री तारीफ करदे रऊँए ओर सदा तेरे नाओं रा तन्यवाद करदे रणे। सेला

9 तेबे बी तैं एबे आसे छाडी ते रे ओर म्हारा बेज्जती करी राखेया

ओर म्हारिया सेना साथे आगे नि गया।

10 एबे आसा खे आपणे दुश्मणा रे सामणे ते नठणा पड़ी रा,

सेयो आसा रिया सबी चीजा खे लूटी की लई जाओए।

11 तैं आसे कसाईये री पेडा जेड़े करीते रे,

ओर आसे कईया देशा रे बखेरी ते।

12 तैं आपणी प्रजा रे लोक सस्ते रेई बेचीते,

जिंयाँ कि तिना री कुछ बी कीमत नि ए!

13 तैं आसे म्हारे पड़ोसिया बीचे मूर्ख बणाईते ओर म्हारे चऊँ कनारे रणे वाल़ेया रिया नजरा रे आसे आसिया जोगे करीते।

14 तैं आसे देशा बीचे एक मजाक बणाईते;*44:14 दूजिया जातिया रे लोक

सेयो आसा रा मजाक उडाओए।

15 कलंक लगाणे वाल़े ओर निंदा करने वाल़ेया रे बोलो ते

लगातार आसा खे तिरस्कार सईणा पड़ोआ,

16 दुश्मण ओर बदला लणे वाल़े रिया मौजुदगिया री बजा ते,

बुरा-पला बोलणे वाल़े ओर निंदा करने वाल़े रिया बजा ते।

17 ये सब कुछ आसा पाँदे बितेया तेबे बी आसे ताखे नि पूले,

ओर ना ई आसे से वाचा तोड़ी जो तैं आसा साथे करी राखी थी।

18 आसे तूँ हमेशा आपणे दिलो दे राखेया,

ओर तेरिया शिक्षा रा पाल़न कित्तेया;

19 पर तेबे बी तैं आसे दबाईते

ओर आसे अन्दकूप न्हेरे दे बेसारा करी की छाडी ते जेती जंगल़ी जानवर रओए।

20 आसे ताखे कदी नि पूले,

या केसी ओरी देवते ते प्रार्थना नि कित्ती,

21 जे आसे एड़ा कित्तेया ऊँदा तो परमेशरो खे पता लगी जाणा था,

कऊँकि तूँ सबी गुप्त गल्ला खे जाणोआ।

22 पर आसे तेरे लोक ऊणे रिया बजा ते म्हारे दुश्मण आसा खे लगातार काणे लगी रे।

तिना रिया नजरा दे आसे फाटणे वाल़िया पेडा जेड़े समजे जाऊँए।*44:22 रोमी 8:36

23 ओ प्रभु, जाग! तूँ कऊँ सऊणे लगी रा?

उठ! आसा खे सदा खे नि छाड!

24 तूँ आपणा मूँ कऊँ लकोई देया

ओर म्हारा दु:ख ओर कष्ट पूली जाएया?

25 म्हारे प्राण माट्टिया रे मिली गे;

म्हारा पेट जमीना साथे चिपकी गा।

26 उठ, ओर म्हारी मताद कर!

आपणी करूणा रे मुताबिक आसा खे छुड़ाई लओ।