1 जेबे आसे बेबीलोनो री नईरा रे कनारे बैठीगे

तेबे सिय्योनो खे याद करी की रोणे लगे!

2 तेती बिऊँसा रे डाल़ा पाँदे आसे आपणियां बीणा टाँगी तिया;

3 कऊँकि जो आसा खे बंदी बणाई की लईगे थे,

सेयो आसा खे तेती गीत गाणे खे बोलो थे कि आसा खे सिय्योनो रा कोई गीत सुणाओ

ओर आसा खे रुलाणे वाल़े आसा खे खुशी मनाणे खे बोलो थे।

4 पराये देशो रे आसे प्रभुए रा गाणा किंयाँ गाईये?

5 ओ यरूशलेम, जे आऊँ ताखे पूली जाऊँ,

तो आऊँ फेर बीणा नि बजाई सकूँ।

6 जे आऊँ ताखे याद नि राखूँ, तो आऊँ फेर कदी नि गायी सकणा,

जे आऊँ ताखे आपणी सबी ते बड़ी खुशी नि

7 ओ प्रभु, एदोमो रे वंशो रे खलाफ यरूशलेमो रे विनाशो रे तिना दिना खे याद कर कि सेयो किंयाँ बोलो थे,

"टाल़ो! इजी खे निऊँआ तेई टाल़ी देओ!"

8 ओ बेबीलोन, तूँ तो चट ई उजड़ने वाल़ी ए,

से माणूं तन्य ऊणा, जेस तां साथे एड़ा बर्ताव करना, जेड़ा तैं आसा साथे कित्तेया!*

9 से माणूं तन्य ऊणा,

जेस तेरे बच्चे पकड़ी की चट्टानी पाँदे पटकी देणे!*