सर्वशक्तिमान परमेशरो री स्तुति
1 प्रभुए री स्तुति करो!
आपणे परमेशरो रा पजन गाणा अच्छा ए;
कऊँकि से मनो खे अच्छा लगणे वाल़ा ए,
तेसरी स्तुति करना मनो खे अच्छा लगोआ।
2 प्रभु यरूशलेमो खे फेर बसाणे लगी रा;
से इस्राएलिया खे गुलामिया ते वापस आपणे कअरे ल्याऊणे लगी रा।
3 यहोवा दु:खी दिलो वाल़ेया खे ठीक करोआ
ओर तिना रे जख्मा पाँदे पट्टी बानोआ।
4 से तारेया खे गिणोआ
ओर से सारेया तारेया खे तिना रे नाओं ते बुलाओआ।
5 म्हारा यहोवा महान् ओर बऊत सामर्थी ए;
तेसरी बुद्धि अपरम्पार ए।
6 प्रभु नम्र लोका खे सम्बाल़ोआ
ओर दुष्टा खे जमीना दे सेटी देओआ।
7 प्रभुए रा तन्यवाद करदे ऊए गीत गाओ;
म्हारे परमेशरो रा बीणा बजांदे ऊए पजन गाओ।
8 से सर्गो खे बादल़ा साथे टखी देओआ
ओर तरतिया खे बर्खा री त्यारी करोआ
ओर पाह्ड़ा पाँदे काआ जमाओआ।147:8 प्रेरित 14:17
9 से डांगरा खे ओर कावा रेया बच्चेया खे,
जो आका पाओए, खाणे खे देओआ।147:9 लूक 12:24
10 ना तो से कोड़ेया रिया सेना ते खुश ओआ
ओर ना तागतबर सेना ते खुश ओआ।
11 प्रभु आपणे पग्ता तेई खुश रओआ,
मतलब तिना ते जो तेसरी करूणा री उम्मीद लगाई राखोए।
12 ओ यरूशलेम, प्रभुए री तारीफ कर!
ओ सिय्योन, आपणे परमेशरो री स्तुति कर!
13 तेस तेरा शईर बचाई की राखणा,
ओर आपणियां प्रजा खे बच्चे देई की आशीष देओआ।
14 से तेरे बन्नेया पाँदे शान्ति राखोआ
ओर ताखे खरिया ते खरिया कणका साथे रजाओआ।
15 से तरतिया पाँदे आपणी आज्ञा रा प्रचार करोआ,
तेसरा वचन बऊत तेज दौड़ोआ।
16 से ऊना जेड़ी बर्फा री बरखा करोआ
ओर स्वाई जेड़ा पाल़ा बिखेरोआ।
17 से बर्फा खे छोटेया-छोटेया टुकड़ेया रे सेटोआ,
तेसरी कित्ती री ठण्ड कोई बी सईन नि करी सकोआ।
18 से आज्ञा देई की बर्फा खे पिगल़ाई देओआ;
से पऊण चलाओआ, तेबे पाणी बईणे लगोआ।
19 परमेशर याकूबो खे आपणा वचन
ओर इस्राएलो खे आपणी बिदिया ओर नियम बताओआ।
20 पर तिने आपणे नियम केसी ओर देशा खे नि दित्ते।
यहोवे री स्तुति करो!147:20 रोमी 3:2