1 आऊँ सब्रो साथे प्रभुए खे न्याल़दा रया;

ओर तिने मेरी तरफा खे त्यान दित्तेया ओर मेरी दुहाई सुणी।

2 तिने आऊँ चीकड़ ओर चीकड़ो ते परे गड्डे ते बारे खिंजी ता,

तिने मेरे पैर चट्टानी पाँदे मजबूत कित्ते। ताकि आऊँ ठीक टंगो दे चली सकूँ ओर खरीसड़ू नि।

3 यहोवे माखे एक नवां गाणा सिखाया, जो म्हारे परमेशरो री स्तुतिया रा गाणा ए।

बऊत लोक देखी की डरने ओर तिना प्रभुए पाँदे परोसा राखणा।*

4 से माणूं बऊत ई तन्य ए, जो प्रभुए पाँदे परोसा करोआ,

ओर मूर्तिया री तरफा खे नि मुड़दे या चूठे देवतेया री पूजा करने वाल़ेया बीचे शामल नि ऊँदे।

5 ओ मेरे प्रभु परमेशर, तैं आसा रिया तँईं बऊत सारे काम करी राखे!

जो अचम्बे रे काम ओर इच्छा तूँ म्हारिया तँईं करेया सेयो बऊत सारिया ए;

जे आँऊ तिजी रे बारे लोका खे बताऊँ तो आँऊ बतांदे-बतांदे थकी जाणा कऊँकि तिना री गिणती नि ऊई सकदी।

प्रभु, तां जेड़ा कोई नि ए!

6 तूँ मेलबलि ओर नज्जो री बलिया ते खुश नि ऊँदा,

तैं मेरे कान खोले ताकि आँऊ बिधानो रा पालण करुँ।

7 ओर इजी री खातर मैं ये ज्वाब दित्तेया, "हे परमेशर, देख आऊँ एथी आ,

कऊँकि कताबा रे मेरे बारे एड़ा ईए लिखेया रा।"

8 ओ मेरे परमेशर, आऊँ तेरी इच्छा पूरी करने ते खुश ए

ओर तेरा बिधान मेरे दिलो रे ए।*

9 जेबे बी तुसा रे लोक कट्ठा ओए, मैं तिना खे बताई राखेया कि तैं आसे किंयाँ बचाई राखे। यहोवा, तूँ जाणेआ कि आऊँ तिना तर्मिया लोका खे बताणे ते नि डरदा।*

10 मैं तेरी तार्मिकता आपणे दिलो रेई नि राखी; बल्कि तेरी सच्चाई

ओर तेरे उद्धारो री चर्चा करी राखी; मैं तेरी करूणा ओर सच्चाई बड़ी सभा ते गुप्त नि राखी।

11 ओ प्रभु, तूँ आपणी बड़ी दया मां पाँदा ते नि टाया,

तेरी करूणा ओर सच्चाईया ते लगातार मेरी रक्षा ऊँदी रओ!

12 मेरे जीवनो दे अणगिणत समस्या ए।

मेरे पाप मेरे चऊँ कनारे ए, ओर माखे आपणी बाट नि लगी री मिलणे।

मेरे पाप मेरे सिरो रे बाल़ा री गिणतिया ते जादा ए,

ओर इजी री बजा ते मेरा दिल दु:खी ए।

बुरे काम गिणतिया रे मेरे‍ सिरो रे बाल़ा ते बी जादा ए, तेबेई तो मेरा दिल दु:खी आ।

13 ओ प्रभु, मईरबानी करी की माखे छुड़ाई लओ!

ओ प्रभु, मेरी मताद करने रिया तँईं फुर्ती करी दे!

14 जो लोक माखे काणा चाओए, सब शर्मिंदा ओ ओर तिना री बेज्जती ओ;

जो मेरे नुकशाणो ते खुश ओए सेयो नठाए जाओ

ओर तिना रा नरादर कित्तेया जाओ।

15 मेरी इच्छा ए कि जो लोक मेरा मजाक उडाओए,

तेरे जरिए आरने ते बेज्जत ओ।

16 पर जितणे लोक तांगे आओए, सेयो सब तेरिया बजा ते खुश ओर आनंदित ओ;

जो तेरे कित्ते रे उद्धारो ते प्यार करोए, सेयो सदा बोलदे रओ, "प्रभुए री तारीफ ओ।"

17 आऊँ तो दु:खी ओर गरीब ए, तेबे बी प्रभु मेरी चिन्ता करोआ।

तूँ मेरा मतदगार ओर माखे छुड़ाणे वाल़ा ए; ओ मेरे परमेशर मेरी मताद कर।