हाग्गै 2

परमेशरो रे मन्दरो री आऊणे वाल़ी महिमा

1 दारा राजे रे दूजे सालो रे सातवे मीन्ने रे इक्खिये दिने यहोवे रा वचन हाग्गै भविष्यबक्ते रे जरीये आया, 2 "यहूदा रे राज्यपाल ओर शालतीएलो रा पाऊ जरूब्बाबेल ओर यहोसादाक रे पाऊ यहोशू बड़े पुरोईतो ते बी गल्ल कर, ओर मेरे सबी लोका ते जो एबुए तक जिऊँदे बची गे दे ए, गल्ला कर। तिना खे पूछ, 3 तुसा बीचा ते कुणे, जिने एस मन्दरो री सुन्दरता देखी थी? एबे तुसे इजी खे केड़ी दशा दे देखोए? क्या ये सच्च नि ए कि ये मन्दर तेस पईलके प्रतापो वाल़े मन्दरो री तुलना दे बिलकुल पनि ए।" 4 पर एबे, जरूब्बाबेल, तूँ मजबूत ओर ईम्मती बण! ओ यहोसादाको रे पाऊ बड़ा पुरोईत यहोशू, ओर तुसे सब लोक जो एती यहूदा प्रदेशो दे रओए, मजबूत ओर ईम्मती बणो! एबे काम शुरू करो, कऊँकि आऊँ तुसा री मताद करने खे तुसा साथे आ। आऊँ सर्वशक्तिमान यहोवा, तुसा ते एई बोलूँआ। 5 तुसा रे मिस्रो ते निकल़ने रे बखते जो वाचा मैं तुसा साथे बानी थी, तेसा ई वाचा रे मुताबिक मेरा आत्मा तुसा बीचे बणी रा, इजी री खातर तुसे नि डरो।

6 कऊँकि सेना रा यहोवा ईंयाँ बोलोआ, "मां फेर सर्ग ओर तरती ईलाई देणे। मां समुद्र ओर सूकी तरती बी ईलाई देणे। 7 मां सारे देश डराणे ओर सारी दूजी जातिया रे लोक कीमती चीजा लई की आऊणे ओर मां ये मन्दर आपणे तेजो साथे परी देणा," सेना रे यहोवे री येई बाणी ए। 8 चाँदी ओर सूईना मेरे ए, सेना रे परमेशरो री येई बाणी ए। 9 एस मन्दरो री जो महिमा एबे ऊणी से पईलकी महिमा ते बड़ी ऊणी, सेना रे परमेशरो री येई बाणी ए ओर मां एसा जगा दे शान्ति देणी, सेना रे यहोवे री येई बाणी ए।

10 ये राजा दारा रे राज्य रे दूजे सालो रे नऊए मीन्ने रे चौबिये दिने ऊआ। तेस दिने यहोवे आपणी बाणी हाग्गै भविष्यबक्ते खे बताई, 11 "सेना रा यहोवा ईंयाँ बोलोआ कि पुरोईता ते एसा गल्ला रा बिधान पूछ, 12 जे कोई आपणे टाल्लेया रे गोदड़ूए दे पवित्र मास बानी की राखो, जो मास बलिया रा इस्सा ए, इजी री खातर ए पवित्र ए। पर तेस ई गोदड़ूए ते रोटी, खाणे री चीज, अंगूरा रा रस, तेल या कोई बी खाणे री चीज छूँओ, तो क्या से रोटी पवित्र ठईरनी?" पुरोईते ज्वाब दित्तेया, "ना।" 13 तेबे हाग्गै पूछेया, "अगर कोई माणूं लाशा खे छुँईं की अशुद्ध ऊई जाओ, ओर से इना बीचा ते कोई बी चीज छूँओ, तो क्या से अशुद्ध ठईरनी?" पुरोईते ज्वाब दित्तेया, "आ, अशुद्ध ठईरनी।" 14 फेर हाग्गै तिना खे बोलेया, "परमेशर ईंयाँ बोलोआ कि मेरी नजरा दे ये प्रजा ओर ये जाति तेड़ी ईए ओर इना रे सारे काम बी तेड़े ईए ओर जो कुछ सेयो तेती चढ़ाओए, से बी अशुद्ध ए।"

प्रतिज्ञा कित्ती री आशीष

15 एबे सोच-बिचार करो कि आजो ते पईले, मतलब जेबे यहोवे रे मन्दरो खे बनाणे रा काम शुरू नि करी राखेया था, 16 तिना दिना दे, तुसा खे आपणे डोरूआ ते बी बोरिया नज्जो रिया मिलणे री उम्मीद थी। पर तुसा खे सिर्फ दस बोरिया ई मिलिया। तुसा खे आपणे अंगूरा ते पंजा पांडे अंगूरा रे रसो रे मिलणे री उम्मीद थी, पर तुसा खे सिर्फ अंगूरा रे रसो रे बी पांडे ई मिले। 17 तुसे तिना सबी चीजा खे बनाणे दे बऊत मईणत करी राखी। पर मैं से पाल़े, काई ओर ओल़ेया की नाश करिती। पर तुसे फेर बी मांगे वापस नि आए, परमेशरो री येई बाणी ए। 18 एबे सोच-बिचार करो कि आजो ते पईले, मतलब जेस दिने परमेशरो रे नवें मन्दरो री निऊँ राखी, तेस दिनो ते लई की नऊए मीन्ने रे एस चौबिये दिनो तक क्या दशा थी? इजी रे बारे दे सोच-बिचार करो। 19 क्या एबुए तक बिऊ खल्याणो दे ए? एबुए तक अंगूरा री बेल, दाऊगल़े, अनार ओर जैतूनो रे डाल़ नि फल़े, पर आजके दिनो ते आऊँ तुसा खे आशीष देंदा रऊँगा। 20 तेस मीन्ने रेई चौबिये दिने दूजी बार परमेशरो रा वचन हाग्गै गे पऊँचेया, 21 "यहूदा रे राज्यपाल जरूब्बाबेलो खे ईंयाँ बोल कि मां सर्ग ओर तरती दोनो डराणे। 22 मां राज्य-राज्य री गद्दी उल्टी देणी, मां दूजी जातिया रे राज्य री तागत नाश करनी ओर रथ तिना रे सवारा समेत मूँदे करी देणे ओर कोड़ेया समेत सवार एकी-दूजे री तलवारी साथे नाश ऊई जाणे। 23 सेना रे यहोवे री ये बाणी ए, तेस दिने ओ शालतीएलो रे पाऊ मेरे दास जरूब्बाबेल, तूँ मेरी तेसा छापा जेड़े ऊणा जेते पाँदे मेरी शाही नशाणी ए, यहोवे री ये बाणी ए। कऊँकि मैं तूँ चूणी राखेया ए, सेना रे यहोवे री ये बाणी ए।"