जकर्याह 1

1 यहोवे रिया तरफा रे एक सन्देश जकर्याह भविष्यबक्ते गे पऊँचेया। जकर्याह बेरेक्याह रा पाऊ ओर इद्दो रा पोता था। ये सन्देश फारसो रे राजा दारे रे राजो रे दूजे सालो रे आठुए मीन्ने दे जकर्याह खे मिलेया, 2 "परमेशर तुसा रे बुजुर्गा ते बऊत ई जादा रोषे ऊआ था।" 3 इजी री खातर तूँ इना लोका खे बोल, "सेना रा यहोवा ईंयाँ बोलोआ, तुसे मेरिया तरफा खे फिरो" तेबे मां तुसा रिया तरफा खे फिरना, सेना रे परमेशरो रा येई वचन ए। 4 आपणे बुजुर्गा जेड़े नि बणो, कई साल पईले भविष्यबक्तेया तिना खे मेरिया तरफा ते एक सन्देश दित्तेया था। से ईंयाँ था, "बुरे ओर दुष्टता रे काम करना बन्द करो।" पर तिने मेरी गल्ल नि सुणी। मेरी तरफा खे त्यान नि दित्तेया, यहोवे री येई बाणी ए। 5 तुसा रे बुजुर्ग मरी चूकी रे ओर एबे कब्रा दे ए। ओर भविष्यबक्ता बी सदा खे जिऊँदे नि रंदे। 6 पर मेरे वचन ओर मेरी आज्ञा जो मैं आपणे दास नबीए खे दित्तिया थिया, सेयो तुसा रे बुजुर्गा पाँदे सच्चो खे पुरिया ऊईया। तेबे तिने मन फिराया ओर बोलेया, "सेना रे यहोवे म्हारे चालचलण ओर कामो रे मुताबिक आसा साथे जेड़ा बर्ताओ करने खे बोलेया था, तेड़ा ई तिने आसा साथे कित्तेया बी ए।"

लाल कोड़े पाँदे सवार माणूं

7 राजा दारा रे दूजे सालो दे शबात नाओं रे ग्यारुए मीन्ने रे चौबिये दिने जकर्याह नबीए गे जो बेरेक्याह रा पाऊ ओर इद्दो रा पोता था, परमेशरो रा ये वचन ईंयाँ पऊँचेया: 8 "मैं राती सुफने दे क्या देखेया कि एक मर्द लाल कोड़े पाँदे चढ़ी की तिना मईंदिया रे डाल़ा बीचे खड़ी रा जो थालली जगा दे ए ओर तेस पीछे लाल, भूरा ओर सफेद कोड़े बी खड़ी रे।" 9 तेबे मैं बोलेया, "ओ मेरे परमेशर यहोवा ये कुणे?" तेबे जो दूत मां साथे गल्ला करने लगी रा था, तिने माखे बोलेया, "मां तांगे बताणा कि ये कुणे।" 10 तेबे जो मर्द मईंदिया रे डाल़ा बीचे खड़ी रा था, तिने बोलेया, "यो सेयो कोड़े ए जो परमेशरे तरतिया पाँदे ओरे-पोरे कूमणे पेजी राखे।" 11 तेबे तिने परमेशरो रे तेस दूतो ते जो मईंदिया रे डाल़ा बीचे खड़ी रा था, बोलेया, "आसे तरतिया पाँदे कूमे ओर क्या देखेया कि सारी तरतिया दे शान्ति ओर चैन ए।"

12 तेबे परमेशरो रे दूते बोलेया, "ओ सेना रे यहोवा, तूँ जो यरूशलेम ओर यहूदा रे शईरो पाँदे सत्तर साला ते रोषे ए, तो तां तिना पाँदे कदुओ तक दया नि करनी?" 13 परमेशरे तेस दूतो साथे जो मां साथे गल्ला करो था अच्छिया-अच्छिया ओर शान्तिया रिया गल्ला बोलिया। 14 तेबे जो दूत मां साथे गल्ला करने लगी रा था, तिने माखे बोलेया, "तूँ आका पायी कि ये सन्देश बोल कि सेना रा यहोवा ईंयाँ बोलोआ कि माखे यरूशलेम शईर ओर सिय्योनो खे बऊत फिकर ए। 15 जो जातिया सुखो साथे रओईया, तिना ते आऊँ रोषे ए, कऊँकि माखे तो थोड़ा जा रोष आया था, पर तिने मुसीबत बढ़ाईती। 16 इजी बजा ते परमेशर ईंयाँ बोलोआ कि एबे आऊँ दया करी की यरूशलेमो खे वापस ली आई रा, मेरा मन्दर दुबारा बणना ओर यरूशलेमो रे नापणे री डोरी लगाई जाणी, सेना रे यहोवे री येई बाणी ए।" 17 तेबे ये बी आका पायी की ये बी बोल कि सेना रा परमेशर ईंयाँ बोलोआ, "इस्राएलो रे शईर फेर खरी चीजा साथे परी जाणे, ओर यहोवे फेर सिय्योनो खे शान्ति देणी ओर यरूशलेम फेर आपणा चुणना।"

चार सींग ओर चार ल्वार

18 तेबे मैं जो देखेया, तो क्या देखेया कि चार सींग ए। 19 तेबे जो दूत मां साथे गल्ला करो था, मैं तेसते पूछेया, "ये क्या ए"? तिने बोलेया, "यो सेयो सींग ए, जिने यहूदा, इस्राएल ओर यरूशलेम तित्तर-बित्तर कित्ते।" 20 तेबे परमेशरे माखे चार ल्वार दखाए। 21 तेबे मैं पूछेया, "यो क्या करने खे आऊणे लगी रे?" तिने ज्वाब दित्तेया, "सींग शक्तिशाली देश ए जिने यहूदा रे लोक तित्तर-बित्तर कित्ते। इजी ते यहूदा कमजोर ऊईगा। पर चार अच्छे कारीगर सींगो खे डराणे आई रे। कारीगरा तिना देशा री शक्ति नाश करी देणी। तिने देशे यहूदा रे लोका खे तित्तर-बित्तर करने खे आपणी शक्तिया रा इस्तेमाल कित्तेया था।"