जकर्याह 3

1 तेबे तिने यहोशू बड़ा पुरोईत परमेशरो रे दूतो सामणे खड़ेया दा दखाया। शैतान यहोशूए रे दाणी तरफा खे तेसरे खलाफ दोष लगाणे खे तेती खड़ी रा था। 2 तेबे परमेशरे शैतानो खे बोलेया, "ओ शैतान, परमेशर ताखे फटकारो! परमेशरो जो यरूशलेमो खे आपणा बणाई लओआ, सेई ताखे बको! तिने से शईर बचाया, तेसा बल़दी लकड़िया खे आगी ते बारे निकयाल़ी देयो।" 3 तेस बखते यहोशू तो दूतो सामणे मैले टाल्ले पईनी की खड़ी रा था। 4 तेबे दूते तिना ते जो सामणे खड़ी रे थे बोलेया, "एसरे यो मैले टाल्ले खोलो।" तेबे तिने तेसखे बोलेया, "देख, मैं तेरे पाप दूर करी राखे ओर आऊँ ताखे नवें टाल्ले बदल़ने खे देऊँआ।" 5 तेबे मैं बोलेया, "एसरे सिरो पाँदे एक शुद्ध पगड़ी राखो।" तेबे तिने तेसरे सिरो पाँदे पुरोईतो जोगी शुद्ध पगड़ी राखी ओर तेसखे टाल्ले पन्याए, तेस बखते परमेशरो रा दूत नेड़े खड़ेया दा रया।

आऊणे वाल़ी पाँगटी

6 तेबे परमेशरो रे दूते यहोशूए खे चेतावणी देई की बोलेया, 7 "सेना रा यहोवा ताखे ईंयाँ बोलोआ कि जे तूँ मेरी बाटा दे चलेगा ओर जो कुछ मैं तांगे सम्बाल़ी ता रा तिजी री रक्षा करेगा, तो तूँ मेरे मईलो रा न्यायी ओर मेरे आँगणो रा रक्षक ऊणा ओर मां तूँ इना बीचे आऊणे-जाणे देणा जो एती नेड़े खड़ी रे। 8 ओ यहोशू, परमेशरो रे बड़े पुरोईत। सुणो, तुसे पुरोईत जो यहोशूए साथे बैठोए। तुसे एकी नशाणो जेड़े ए। लोक तुसा खे देखी सकोए। ओर सेयो जाणी सकोए कि आऊणे वाल़े बखतो दे अच्छिया चीजा ऊणिया। देखो! मां आपणा सेवक तुसा गे ल्याऊणा जेसखे पाँगटी बोलेया जाओआ। 9 तेस खास पात्थरो खे देख, जो मैं यहोशूए ते आगे राखी राखेया, तेस एक ई खास पात्थरो पाँदे सात आखी बणी रिया, सेना रे यहोवे री ये बाणी ए कि देख, आऊँ तेस खास पात्थरो पाँदे खणी देऊँआ ओर तेस देशो रे पापो खे एक ई दिनो दे दूर करी देऊँगा। 10 तेस बखते तुसा बीचा ते हर एकी आपणा पड़ोसी आपू गे बुलाणा। सेयो तुसा री अंगूरा री बेली ओर दाऊगल़ेया रे डाल़ा निठे बैठणे, सेना रे यहोवे री येई बाणी ए।"