1 सुणो, परमेशरो रे न्याय रा दिन यरूशलेमो दे छोड़ ई आऊणे वाल़ा ए, तेबे यरूशलेम शईर लूटी लणा, ओर लूटा रा माल तुसा रिया आखी सामणे बांडी देणा। 2 कऊँकि मां सब जातिया यरूशलेम शईरो ते लड़ने खे कट्ठिया करनिया ओर तिना से शईर आपणे कब्जे दे करी लणा। तेसरे कअर लूटे जाणे। तेथो रिया जवाणसा साथे बलात्कार करेया जाणा। शईरो रे आदे लोक कैद करी की लई जाणे। पर प्रजा रे बाकी लोक शईरो देई रयी जाणे। 3 तेबे यहोवे आगे आई की तिना जातिया साथे तेड़ा ई लड़ना, जेड़ा से लड़ाईया रे दिने लड़ेया था। 4 तेस दिने परमेशरो रे पैर जैतूनो रे पाह्ड़ो पाँदे पड़ने। ये पाह्ड़ यरूशलेम शईरो रे पूर्बा दे आ। ये जैतूनो रा पाह्ड़ पूर्बो ते लई की पच्छमा तक दूई इस्सेया दे ऊई जाणा। ओर एक चौड़ी काअटी बणी जाणी। तेबे आदा पाह्ड़ उत्तरो रिया तरफा खे ओर आदा दक्खणा रिया तरफा खे चली जाणा। 5 लोक तेसा पाह्ड़िया रिये ऊई की नठी जाणे। ये आसेलो तक पऊँची जाणी। सेयो तिंयाँ ई नठी जाणे जेड़े सेयो यहूदा रे राजा उज्जियाह रे बखते आए तूफानो ते नठे थे। तेबे मेरा परमेशर यहोवा आऊणा। सब पवित्र स्वर्गदूत तेस साथे आऊणे। 6 तेस दिने कोई सूरजो रा प्रयासा नि ऊणा, ना ई कोई ठण्डा, बर्फा वाल़ा न्हेरा ऊणा। 7 तेस बखतो जेड़ा कोई दूजा बखत नि था, ओर सिर्फ यहोवा ई जाणोआ कि से कदी ऊणा। ना दिन ऊणा, ना रात; सदा प्रयासा ई रणा, एथो तक कि सांजा खे बी। 8 तेस बखते यरूशलेम शईरो ते बह्यींदा ऊआ जीवनो रा पाणी निकल़ना इजी रा आदा इस्सा पूर्बा दे मृत समुद्रो रिया तरफा खे ओर आदा इस्सा पच्छमा दे भूमध्य समुद्रो रिया तरफा खे, गर्मिया ओर सर्दिया दे। 9 तेबे परमेशर सारी तरतिया रा राजा ऊणा ओर तेस बखते एक ई परमेशर ओर तेसरा नाओं बी एक ई मानेया जाणा। 10 उत्तरा दे गेबा शईरो ते लई की दक्खणा रे कनारे रिम्मोन शईरो तक रा सारा प्रदेश सुनसाण मैदान करी देणा। यरूशलेम शईर आपणियां चऊँ कनारलिया जमीना ते ऊच्चा ऊई जाणा; शईर बिन्यामीनो रे बड़े द्वारो ते लई की कुणे वाल़े बड़े द्वारो तक, जेती पईले एक बड़ा द्वार था, ओर हननेलो रे गुम्मटो ते लई की राजे रे अंगूरा रे रसो रे कुण्डो तक पऊँचणा। 11 तेबे लोक तिदे बसणे, कऊँकि फेर कदी स्राप ओर नाश नि ऊणा ओर यरूशलेम शईर बिना डरे बसेया दा रणा। 12 यहोवे तिना सबी देशा खे सजा देणी जिने यरूशलेमो रे खलाफ लड़ाई कित्ती। तेस तिना पाँदे महामारी ल्याऊणी। तिना रे शरीर सड़ी जाणे, जेबे कि सेयो एबु बी आपणे पैरा पाँदे खड़ी रे। तिना रिया आखी तिना रे सिरो दे सड़ी जाणिया। तिना री जीब तिना रे मुंए दे सड़ी जाणी। 13 तेस बखते परमेशरो री तरफा ते तिना पाँदे बड़ा डर बैठी जाणा ओर तिना एकी-दूजे पाँदे अमला करना। 14 यहूदा बी यरूशलेम शईरो दे लड़ना ओर सूईना, चाँदी, टाल्ले बगैरा चऊँ कनारली सबी जातिया री तअन-सम्पत्ति तिदे कट्ठी करी जाणी। 15 कोड़े, खच्चर, ऊँट ओर गह्दे बल्कि तिना रे डेरे रे सारे डांगर, सेयो बी एड़ी बमारिया साथे मारे जाणे।

16 तेबे जितणे लोक यरूशलेम शईरो पाँदे अमला करने वाल़ी सबी जातिया बीचा ते बचे दे रणे, सेयो हर साल यरूशलेमो दे राजे खे, मतलब सेना रे यहोवे री आराधना करने खे आऊणे ओर चूँगड़िया रा त्योआर मनाणे खे यरूशलेमो खे जाया करने। 17 ओर जे तरतिया रे कुलो बीचा ते कोई बी माणूं यरूशलेमो दे राजा, मतलब सेना रे यहोवे री आराधना करने खे नि जाओगे, तो तिना रे तेती बर्खा नि ऊणी। 18 मिस्रो रे कराने रे लोक ऊई सकोआ कि तेती इस्सा लणे नि जाओ। फेर तेती बर्खा पनि ऊणी। येई से मुसीबत ए जो प्रभुए तिना रे देशो पाँदे पेजणी जो चूँगड़िया रा त्योआर मनाणे खे नि जाओगे। 19 ये मिस्रो रा ओर तिना सबी देशा रा पाप ठईरना, जो चूँगड़िया रा त्योआर मनाणे नि जाओगे। 20 तेस दिने, लोका कोड़ेया री कंटिया पाँदे लिखणा, "ये प्रभुए खे ए।" प्रभुए रे मन्दरो दे खाणा पकाणे खे जिना पांडेया रा इस्तेमाल कित्तेया जाणा, सेयो खास ऊणे। सेयो बेदिया रे सामणे राखे दे पांडेया जितणे खास ऊणे। 21 बल्कि यरूशलेम शईर ओर यहूदा देशो रे सब आँडिया परमेशर यहोवे खे पवित्र ठईरनियां, ओर जो लोक बलि चढ़ाणे आऊणे, तिना सेयो पांडे लणे ओर तिना दे मास पकाणा। तेस बखते यहोवे रे मन्दरो दे कोई बी कनानी माणूं नि ऊणा। से यहोवा ए जो सबी रा राजा ए।