जकर्याह 4

दिऊए ओर जैतूनो रा डाल़

1 तेबे जो दूत मां साथे गल्ला करो था, तिने आई की आऊँ एड़ा जगाया जेड़ा केसी खे नींजा रे जगाओए। 2 तिने मांते पूछेया, "ताखे क्या दिशणे लगी रा?" मैं बोलेया, "एक दीवट, जो पूरे सूईने राए ओर तिजी रा कटोरा तेसरे सिरो पाँदे ए ओर तिजी पाँदे तेसरे सात दिऊए ए, जिना री पाँदली बत्तिया खे राखणे खे सात-सात जगा ए। 3 दीवटो गे जैतूनो रे दो डाल़ ए, एक तेस कटोरे दाँणे कनारे ओर दूजा तेसरे खूँजे कनारे।" 4 तेबे मैं तेस दूतो ते जो मां साथे गल्ला करो था पूछेया, "ओ परमेशर यहोवा, ये क्या ए?" 5 स्वर्गदूते माखे ज्वाब दित्तेया, "क्या तूँ नि जाणदा कि ये क्या ए?" मैं बोलेया, "ओ मेरे परमेशर यहोवा आऊँ नि जाणदा।"

6 तेबे स्वर्गदूते मांते बोलेया, "परमेशरे जरूब्बाबेलो खे ये बोलेया, ताखे मेरी आत्मा री जरूरत ऊणी। तूँ आपू बऊत कमजोर ए। ओर तांगे पूरी तागत पनि ए। सर्वशक्तिमान यहोवे येई बोलोआ। 7 इजी री खातर जरूब्बाबेलो खे मन्दरो रा काम पूरा करने ते कोई नि रोकी सकदा। पाहड़ो समान समस्या रा बी तेसरे जरीये समाधान ऊई जाणा। जेबे मन्दर बणी की त्यार ऊई जाणा, तो तेस तेतेरा सबी ते खास पात्थर तेसरी जगा पाँदे राखी देणा। तेबे लोक जोरे-जोरे की रोणे, परमेशर एसखे आर्शीवाद दे! परमेशर एसखे आर्शीवाद दे।" 8 तेबे परमेशरो रा ये वचन मांगे पऊँचेया, 9 "जरूब्बाबेले आपणे आथो साथे एस मईलो री निऊँ पायी ओर तेस ई ये आपणे आथो साथे त्यार करना। तेबे ताखे पता लगी जाणा कि सेना रे यहोवे आऊँ तांगे पेजी राखेया।"

10 स्वर्गदूते मांते बोलेया, "सूईने रे सात दिऊए यहोवे रिया सात आखी ए, जो सारी तरतिया पाँदे नजर राखोईया। से नराज ए कऊँकि बऊत कम विकास ऊणे लगी रा। पर तिना जरूब्बाबेलो खे साल़ लई की मन्दरो रा काम करदे ऊए देखणा, ओर सेयो खुश ऊणिया।" 11 तेबे मैं तेसते फेर पूछेया, "दीवटा रे दोनो तरफा खे ये दो जैतूनो रे डाल़ क्या बताओए?" 12 तेती जैतूनो रिया दो पाँगटिया थिया। सेयो दोनो सूईने री नाल़िया रे नेड़े थिया जो सुनहरा तेल पाओ थिया। इजी री खातर, मैं स्वर्गदूतो ते पूछेया कि जैतूनो री दूई पाँगटिया रा क्या मतलब ए? 13 तिने माखे बोलेया, "क्या तूँ नि जाणदा कि ये क्या ए?" मैं बोलेया, "ओ मेरे परमेशर आऊँ नि जाणदा।" 14 तेबे स्वर्गदूते बोलेया, "यो दो पाँगटिया दूई तेलो ते परे दे मर्दा खे बताओई। तिने बोलेया कि ये सेयो लोक ए जिना खे सारी तरतिया रे परमेशरे आपणी सेवा कराणे खे राखी राखेया ए।"