जकर्याह 2

नापणे री डोरी

1 तेबे मैं फेर देखेया कि एक मर्द आथो दे नापणे री डोरी लई की आऊणे लगी रा। 2 मैं तेसते पूछेया, "तूँ केयी चली रा"? तिने बोलेया, "आऊँ यरूशलेमो खे नापणे चली रा ताकि देखूँ तो तेतेरी लम्बाई-चौड़ाई कितणी ए।" 3 तेबे मैं क्या देखेया कि जो दूत मां साथे गल्ला करो था से चली गा ओर दूजा दूत तेसखे मिलणे खे आई की तेसखे बोलणे लगेया, 4 दूजे स्वर्गदूते बोलेया, "छोड़ करो ओर तेस जवानो खे बोलो, एक दिन यरूशलेम माणूं ओर जादा करेलू डांगरा ते इतणा परी जाणा कि सबी खे रणे खे जगा नि बचणी! बऊत जे लोक शईरो री दवाला ते बारे रणे। 5 परमेशरो री ये बाणी ए कि आऊँ आपू यरूशलेमो रे चऊँ कनारे आगी जेड़ी दवाल ठईरना ओर आऊँ शईरो रे पीतरे गौरव बणना।"

6 यहोवा बोलोआ, "दूर ऊई जाओ! उत्तरो रे देशो दे बेबीलोनो ते नठी जाओ, कऊँकि मैं तुसे चऊँ दिशा दे तित्तर-बित्तर करी राखे। 7 एबे ओ सिय्योनो रे लोको नठी जाओ! बेबीलोन ते आपणे कअरो खे चली जाओ, जेती तुसे रओ थे। 8 कऊँकि सेना रा यहोवा ईंयाँ बोलोआ कि तेस तेजो रे आऊणे ते बाद तिने आऊँ तिना जातिया गे पेजी राखेया जो तुसा खे लूटो थिया। जो कोई बी तुसा खे नुकशाण पऊँचाओआ, से मेरी सबी ते किमती सम्पतिया खे नुकशाण पऊँचाओआ। 9 यहोवा आपू तुसा रे खलाफ लड़ना, ओर तुसे तिना लोका रे जरीये लूटे जाणे जो कदी तुसा रे नौकर थे। जेब एड़ा ऊणा, तो सबी लोका जाणी लणा कि सर्वशक्तिमान यहोवे आऊँ पेजी राखेया ए।"

10 ओ यरूशलेमो रे लोको, जोरे की गाओ ओर खुशी मनाओ। कऊँकि आऊँ आऊणे लगी रा। ओर मां तुसा बीचे वास करना, यहोवे री येई बाणी ए। 11 तेस बखते बऊत सारिया जातिया यहोवा साथे मिली जाणिया ओर मेरी प्रजा ऊई जाणी ओर मां तुसा बीचे वास करना। 12 तेबे ताखे पता लगी जाणा कि सेना रे यहोवे आऊँ तांगे पेजी राखेया, तेबे यहोवे यहूदा प्रदेशो खे पवित्र देशो दे आपणा इस्सा करी लणा ओर यरूशलेम शईर फेर आपणा ठराणा। 13 ओ सब प्राणियो! परमेशरो सामणे चुप रओ, कऊँकि से आपणी पवित्र रणे री जगा ते आऊणे लगी रा।