Salmos 118

जीतणे रिया तँईं तन्यवाद

1 प्रभुए रा तन्यवाद करो, कऊँकि से पला ए

ओर तेसरी करूणा सदा री ए!

2 इस्राएली लोक बोलो, "प्रभुए री करूणा सदा री ए।"

3 हारूणो रे वंशो रे पुरोईत ये बोलो, "प्रभुए री करूणा सदा री ए।"

4 प्रभुए री पग्ती करने वाल़े ये बोलो, "प्रभुए री करूणा सदा री ए।"

5 मैं मुसीबता दे परमेशरो खे आका पाईया,

यहोवे माखे उत्तर दित्तेया ओर आऊँ मुसीबता ते छुड़ाया।

6 प्रभु मेरे पक्षो रे ए, मां नि डरना।

माणूं मेरा कुछ नि करी सकदा।*118:6 रोमी 8:31, इब्रानी 13:6

7 प्रभु मेरे पक्षो रे ए, से मेरी मताद करने वाल़ा ए;

माखे आपणियां आखी ते दिशणा कि मेरे दुश्मण आरी गे।

8 प्रभुए री शरणा रे जाणा,

माणूंआ पाँदे परोसा राखणे ते खरा ए।

9 प्रभुए री शरणा रे जाणा,

परदाना पाँदे परोसा राखणे ते खरा ए।

10 सबी जातिये आऊँ केरी ला रा;

पर प्रभुए रे नाओं ते मां सेयो पक्का नाश करी देणे।

11 तिने आऊँ केरी ला रा, पक्का तिने आऊँ केरी ला रा;

पर प्रभुए रे नाओं ते मां सेयो पक्का नाश करी देणे।

12 तिने आऊँ पँऊरी जेड़ा केरी ता रा, सेयो कांडेया री आगी जेड़े चट बीजी गे;

पर प्रभुए रे नाओं ते मां सेयो पक्का नाश करी देणे।

13 माखे रूड़ाणे रिया तँईं तैं माखे जोरे की ताक्का तो दित्तेया था,

पर यहोवे मेरी मताद कित्ती।

14 यहोवा मेरी तागत ओर पजनो रा विषय ए;

तिने आँऊ दुश्मणा ते बचाई राखेया।

15 परमेशरो रे तर्मी लोका रे तम्बूए दे जयजयकार ओर उद्धारो री आवाज ऊणे लगी री,

यहोवे रिये पराक्रमी तागती ये करी राखेया ए।

16 यहोवे रा दाँणा आथ महान् ऊईरा,

यहोवे रे दाँणे आथो ते पराक्रमो रा काम ओआ!

17 आऊँ नि मरना, बल्कि जिऊँदा रणा

ओर मां यहोवे रे कामा रा बखाण करदे रणा।

18 परमेशरे माखे बऊत कष्ट तो दित्तेया,

पर आऊँ मौता रे वशो रे नि कित्तेया।*118:18 2 कुरिन्थ 6:9, इब्रानी 12:10,11

19 माखे न्याय रे मन्दरो रे द्वार खोलो,

मां तिदे जाई की यहोवे रा तन्यवाद करना।

20 प्रभुए रा द्वार येईए,

इदे तर्मिया प्रवेश करना।*118:20 यूह. 10:9

21 ओ प्रभु, मां तेरा तन्यवाद करना,

कऊँकि तैं मेरी प्रार्थना सुणी की माखे उत्तर देई राखेया,

तैं आऊँ मेरेया दुश्मणा ते बचाई राखेया।

22 जो पात्थर राजमिस्त्रिए नबाग ठराया था,

सेई कुणे री निऊँआ रा पात्थर बणीगा।*118:22 1 पत 2:4, लूक 20:17

23 ये काम प्रभुए राए

ओर ये म्हारी नजरा रे अद्भुत ए।

24 आजका दिन प्रभुए बणाई राखेया;

आसे इदे मगन ओर खुश ओईये।

25 ओ प्रभु, आसे तांते बिनती करूँए, आसा खे बचा!

ओ प्रभु, आसे तांते बिनती करूँए, आसा खे कामयाबी दे!

26 तन्य ए से माणूं, जो प्रभुए रे नाओं ते आओआ!

आसे ताखे प्रभुए रे मन्दरो ते आशीर्वाद देई राखेया।*118:26 मत्ती 23:39, लूक 13:35, मरक 11:9,10, लूक 19:38

27 परमेशर यहोवा ए ओर तिने आसा खे प्रयासा देई राखेया।

यज्ञो रे डांगरो खे बेदिया रे सींगो ते रस्सिया साथे बानो!

28 ओ प्रभु, तूँई मेरा परमेशर ए, मां तेरा तन्यवाद करना;

तूँ मेरा परमेशर ए, मां तेरा गुणगाण करना।

29 प्रभुए रा तन्यवाद करो, कऊँकि से पला ए;

ओर तेसरी करूणा सदा बणी री रणी!