Reino dos céus

Umulumbe wa kipao kyafishilwe

44 "Kabili Ubufumu bwa mwiulu bwakuba nge kipao kyafishilwe mu kisonso, umuntu pa kukisanga akifisa, elo aya kushitisha fyonse akwete mpaka ayakushita kilya kisonso.

Umulumbe wa lubwe lwa mutengo

45 "Kabili Ubufumu bwa mwiulu bwaliba kubati musulwishi uwali kufwaya ulubwe lwa mutengo ulwakubeeka sana. 46 Pa kulusanga, aya kushitisha fyonse ifyo akwete, epakushitamo na lulya lubwe.

Umulumbe wa luseke lwa lubanga

31 Kabili Yesu epakubebapo mulumbe na umbi ati, "Ubufumu bwa mwiulu bwakubati luseke lwa lubanga ulo muntu abyele mwibala lyakwe. 32 Nangula e luseke lwa kukepeshapo panseke shonse, nomba kilabe kimpukusa, elo kyakula, kisakuba ikimuti ikya kwebati no toni twaisa kubikako ifiinsa mu mitano yakiko."

Umulumbe wa kitutumushi

33 Yesu alibebele umulumbe naumbi ati, "Ubufumu bwa mwiulu bwakubati kitutumushi ikyo mwanakashi asankenye ifipimo fitatu ifyabunga mpaka apangamo no mufuba, watutuluka onse."

Umulumbe wa nsaku

24 Yesu ali bebelepo umulumbe na umbi ati, "Ubufumu bwa mwiulu kuti twabupalakanyako ku muntu umo uwaile kukusa imbuto mwibala lyakwe. 25 Ulo abantu bonse balilele mutulo ubushuku, elo umulwani aisa kukusamo insaku no kuya aya. 26 Ulo Ing’ano pa kukula no kusakamuna, insaku nasho shalibonekele." 27 Ababomfi ba ulya muntu balimwebele ati, "Bushe tali ni mbuto shabune sheka twakushile mwibala? Nomba ishinsaku shafumapi?" 28 Naye alibasukile ati, "Mulwani akitile fi." Elo ababomfi balyebele ati, "Bushe tuye kushitupula?" 29 Naye alibebele ati, "Mwikite fyo epali mwatupwila kumo ne ng’ano. 30 Lekeni fikulile pamo mpakapo tukesa kusombwela. Elo nkesa kweba ababomfi ukubalishapo ukutupula insaku, ukushikaka imipo no kushokya mu mulilo elo ukukonkeshapo ing’ano no kushitutila mubutala bwangi."

Yesu ashimbulo mulumbe wa nsaku

36 Yesu pa kusha mabumba, elo aingile mung’anda. Abasambi bakwe epakumwipusha ati, "Bushe umulumbe wa nsaku wapilibwila mwisa?"

37 Yesu naye alibasukile ati, "Uwabyele imbuto Mwana wa Muntu. 38 Ibala nalyo ni pesonde ne mbuto shabune bana ba mu Bufumu. Elo insaku bana bamubifi. 39 Umulwani akushilemo insaku ni Kiwa. Ubusomboshi ni mpela ye sonde. Abakusombola nabo ni bamalaika. 40 Nga filya bakolonganika insaku no kushokya mu mulilo, efyo kikesa kuba pa kupwa kwe sonde. 41 Umwana wa Muntu akatuma bamalaika bakwe ukwisa ku kolonganika imbifi ukubafumya mu Bufumu bwakwe, bonse abali kulenga abanabo ukukita ifyabubi na batomfwa, 42 bakapooswa mu mulilo emo bale kulila no kusumanya ameno. 43 Elo abololoke bena bakabalika kubati kasuba mu Bufumu bwakwa wishibo. Uuli na matwi ya kumfwa nga omfwe.

Umulumbe wa mukwau

47 "Kabili Ubufumu bwa mwiulu bwaliba kubati mukwau wapooselwe pali bemba no kwikata isabi ilya kupusana pusana. 48 Ulo umukwau waiswilemo isabi, abantu epakuufumisha ku mulundu, baikala panshi no kwabanye sabi. Ilya bune balibika mu miseke, nomba ilyabubi balilipoosele. 49 Efyo kikesa kuba pa kumpwa kwa kyalo. Bamalaika bakesa kupatulula imbifi ku bololoke, 50 no kubapoosa mwilungu lya mulilo emukesa kuba ukulila no kusumanya meno."

Ishuko line nene

3 "Bakushuka abalanda mu mitima pantu,

ebene ba Bufumu bwa mwiulu. 4 Bakushuka abaloosha pantu,

bakesa kutalalikwa.

5 "Bakushuka abakuikefya pantu,

bakapyana isonde. 6 Bakushuka abomfwe nsala ne kilaka kya bololoke pantu,

bakesa kwikuta.

7 "Bakushuka aba luse pantu,

nabo bakesa kulangwa uluse.

8 "Bakushuka abasanguluke mitima pantu,

bakabona Lesa. 9 Bakushuka abakita umutende pantu,

bakakuutwa abana bakwa Lesa. 10 Bakushuka abo bonse abapakaswa pa mulandu wa bololoke pantu,

ebene ba Bufumu bwa mwiulu."

11 "Muli shukile ulo bamituka, ukumipakasa no kule kumibepesha ifyabufi pa mulandu we shina lyangi. 12 Sekeleleni no kwanga pantu ikilambu kyenu mwiulu kilikulile, efyo bapakese na bakasesema abaliko kale."

Umukulupo ni nani?

1 Pali ilya nshita, abasambi balishile kuli Yesu ne kipusho ati, "Bushe ni nani umukulupo mu Bufumu bwa mwiulu?"

2 Yesu alikuutile umwaike no kumwimanika pakati kabo. 3 Epakubeba ati, "Nkomweba ikine kine ati, umfwa tamupindulukile no kubati baike, tamwakengilemo mu Bufumu bwa mwiulu. 4 Ekyo, onse ukaikefya kubati mwaike, e mukulu mu Bufumu bwa mwiulu.

14 Yesu alibebele ati, "Lekeni abaike bese kuli nebo, mwibalesha pantu ebene ba Bufumu bwa mwiulu bakuba nga baike."

23 Yesu aebele abasambi bakwe ati, "Nkomyebe kine kine ati, kyakwafya kuwa fyuma pa kwingila mu Bufumu bwa mwiulu. 24 Nkobwekeshapo na kambi ati, kyakwangukapo ingamali ukupita mulinso lya nshindano ukukila umukankala ukwingila mu Bufumu bwakwa Lesa."

25 Abasambi pa kumfwa ifyo, kyalibapapwishe sana epakwipusha ati, "Nga ni nani angapusuka?"

26 Yesu naye pakubalolesha ali basukile ati, "Ku bantu kintu kya yafya, nomba kuli Lesa fyonse kuti fyakitwa."

5 Umfweni mwebo bawesu mwe batemwikwa bangi! Lesa alasala abantu, abo bantu ba pano kyalo babakuuta abapina ukuba abakankala mu kisumino. Alabasala ukupyana Ubufumu ubo Lesa alaya abamutemwa.

Ntakwishibilepo

21 "Teonse ungangebati, ‘Shikulu, Shikulu’ akengila mu Bufumu bwa mwiulu, kano fye abakita ifyo Tata wa mwiulu afwaya.

19 Ekyo onse uwasuulapo limo pa mafunde no kufunda bambi ifyo fine, akakuutwa uwakupelekeshako mu Bufumu bwa mwiulu. Nomba uyo uleyakonka no kufundako bambi akakuutwa umukindami mu Bufumu bwa mwiulu. 20 Ekyo nkomyeba, kano fye ubololoke bwenu bwakishapo pa Bafalise na bakafundisha bamafunde, nga tefyo tamwakengilemo mu Bufumu bwa mwiulu."

9 Fyeke fi efyo mulingile ukule kupepa;

We Tata we waba mwiulu,

Likindikwe shina lyobe.

10 Ubufumu bobe bwise,

ubufwayo bobe bukitikwe pesonde nge fyo kyaba mwiulu.

Yowane kabatisha

1 Muli sho nshiku Yowane kabatisha alishile mu kiswebebe kya mu Yudea akobila ati, 2 "Lapileni pantu Bufumu bwa mwiulu bulipalamine"

17 Ukufumapo Yesu alitampile ukubila ati, "Lapileni pantu Ubufumu bwa mwiulu bulipalamine."

7 Ulo mukoya, mule kushimika ati, ‘Ubufumu bwa mwiulu buli palamine.’

11 Nkomyeba, abengi baka fumina ku kabanga na ku mbonshi, no kwikala na Ablahamu, Isaki na Yakobo pa mutebeto wa mu Bufumu bwa mwiulu.

11 Mukine kine nkomweba ati, Yowane kabatisha mukulupo pali bonse abana ba bantu abafyalwa ku banakashi. Nomba uwakupelekeshapo mu Bufumu bwa mwiulu ena alikililepo pali Yowane. 12 Ukufuma apo Yowane kabatisha ali kubila ukushinta pali nomba, Ubufumu bwa mwiulu bwa kulwila na babulwila ebabupoka ku maka.