1 Pakulekelesha, mwebo bawesu mulekutupepelako ukwebati amashiwi yakwa Shikulu yasalangane kangu kangu no kupokelelwa no mukinshi, nge fyo mwebo mwapokelele. 2 Mulekupepa no kwebati Lesa alekutupokololako ku bantu ababubi na bakintomfwa. Pantu te bonse basumina.

3 Lelo Shikulu wakishinka alekumikosha no ku mikingilila ku bubi. 4 Shikulu alalenga ati tulekumiketekela ati mulakonka ifyo tumyeba, kabili mwalekutwalilila ukukonka ifyo tukomyeba.

5 Shikulu alekumitungulula mu kwiluka ifyo Lesa amitemwa na mukushipikisha nga Klistu.

6 Mwebo bawesu, tukomikonkomesha mwi nshina lyakwa Shikulu Yesu Klistu ati, mulekutaluka kuli bawesu bonse aba bunang'ani, abakaana ukukonka amafunde twamifundile. 7 Mwebo mwe bene mulishibile bwino ati mufwile ukutupashanya. Fwebo tatwali ba nang'ani ulo twali na mwebo. 8 Fwebo tatwalikupoka ikyakulya ku muntu nangu umo ukwakubula ukulipila. Lelo twalikubombesha sana no kukyukyutika ubwakya no bwaila pakwebati twibika muntu nangu umo mu bwafya bwakutulisha. 9 Twalikubombesha, te mukwebati nikyo tutakwata nsambu shakusungwa, lelo twalikukite fyo pakwebati tube ikilangililo kuli mwebo ekyo mufwile ukukonka. 10 Kabili ulo twali na mwebo twalimipeele ifunde ilyakwebati, "Uwakaana ukubomba, elekulya."

11 Tukolanda ifi, pantu twalyumfwile ati bambi pali mwebo banang'ani. Tababomba nkito, baikalila fye umulomo. 12 Ku maka yakwa Shikulu Yesu Klistu, tukokonkobesha abo bantu no kubeba ati, balekwikala ifyo bafwile ukwikala, balekubomba pakwebati balekuilisha abene.

13 Lelo mwebo mwe bawesu, mwilekutendwa ukukita ifyabune. 14 Umo nga akaana ukubeela aya mashiwi twamilembela muli iyi inkalata, mumwishibe bwino uyo. Mulekumutalukako uyo muntu pakwebati ekatwe nsoni. 15 Nomba mwile kumubona kubati mulwani yii, lelo mulekumusokako pantu ni wenu.

16 Shikulu umwine wa mutende, angamupeela umutende mu nshita yonse na muli fyonse. Shikulu alekuba na mwebo bonse.

17 Nebo ne Paulo nkolemba no kuboko kwangi aya mashiwi yakumiposha. Pakupwisha ukulemba inkalata yonse, ifi efyo nemba na munkalata shimbi ukulanga ati ni nebo. 18 Ikikuuku kyakwa Shikulu Yesu Klistu kilekuba na mwebo mwense.