1 Nebo ne Yakobo, umusha wakwa Lesa na Shikulu Yesu Klistu, nkomiposha bonse mwe mitundu ikumi limo na shibili isha bantu bakwa Lesa abasalangana inko shonse.

2 Mwe bawesu, amakyushi ya misango ne misango nga yakomishila, mulekubona ati mulishukile sana! 3 Pantu mulishibile ati ulo ikisumino kyenu kikoeshiwa ku makyushi, kilalenga ukushipikisha. 4 Ukushipikisha kwenu kukaboneka sana mufyo mukobomba, epakwebati mulekuba abakupwililika lonse, abatabulisha nangu kimo. 5 Umo pali mwebo nga takwete mano, alombe kuli Lesa pakwebati amupeele. Lesa naye alapeela ne nsansa onse uukomulomba, akamipeela. 6 Lelo uyu wine ulo akopepa, alilingile ukukwata ikisumino, ukwakubula ukutwishika. Pantu umuntu nga kotwishika, alapala ibimbi lya pa nika ilikotumpauka no kusendwa konse uko umwela ukopuungila. 7 Umuntu wakubefi, tafwile kutontonkanya ati Shikulu akamupeela ikyo akolomba. 8 Aliba fye uwakubula ukushininkisha ifyo akomfwaya ukukita, imikitile yakwe yakwaluka aluka fye.

9 Wenu umupina alilingile ukumfwa ubune pakyo Lesa amukindamika. 10 Umukankala wesu naye alilingele ukumfwa ubune pali ikyo Lesa alimupelako ubukindami. Pantu umukankala akalukuta nge luba lya kyani. 11 Akasuba nga kakotula, katampa no kukuuma, ukukaba kwakako kulalenga ikyani ukuma. Amaluba ya kyani yalalukuta no kuyemba kwakiko kulaapwa. Mu musango umo wine efyo umukankala akonaulwa pa nshita alikupamfiwa na makwebo yakwe.

12 Alishukile umuntu uukoshipikisha mu makyushi. Pantu nga akimfya amakyushi, akapokelela ikilambu kya mweo ikyo Lesa alaya aba mutemwa. 13 Umo nga kotunkwa elekutontonkanya ati ni Lesa eukomutunka. Pantu Lesa tekuti atunkwe ne fyabipa, elo umwine wine tatunka muntu. 14 Lelo muntu atunkwa ulo ulunkumbwa lwakwe lwa musembeleka no ku mwikata. 15 Ulunkumbwa nga lwakula, lulakuta ububifi. Ububifi nga bwakula, bulakuta imfwa. 16 Ala mwilekubepwa mwe bawesu! 17 Ifya bupe fyonse ifyabune efyo tupokelela ne fyawamisha umupwilapo filafuma kwiulu. Filafuma kuli Lesa Tata uwabumbile ifya mwiulu ifipeela ulubuuto. Muli ena tamwaba mfinshi, kabili taaluka nge kinshingwa. 18 Lesa umwine ku kufwaya kwakwe ewatufyele kwishiwi lyakwe ilyakinshinka. Alikitile ifi pantu alikufwaya ati tube abantanshi pa fibumbwa fyakwe fyonse.

19 Ishibeni iki mwe bawesu, umuntu onse alilingile ukumfwa kangu, lelo uwakutekanya pakulanda, kabili uutafulwa kangu. 20 Pantu ikifukushi kya muntu takileta bololoke ubo Lesa afwaya. 21 Kanshi talukeni ku fyakukowela fyonse ne misango ibi yonse mukili nayo. Mulekunakila Lesa no kupokelela amashiwi yakwe ayo abyala mu mitima yenu ayakuba na maka yakumipususha. 22 Mwilekuibepa mukupelela fye pakumfwa amashiwi yakwe, lelo mulekukita nefyo yakomyeba. 23 Umuntu uumfwa fye amashiwi lelo takita ifyo yakomweba, aba kubati muntu uukoilolesha pa menso mu kilolani. 24 Kilya apwa ukuilolesha afumapo, pekapo alaba nefyo aboneka. 25 Lelo umuntu uukololesha mu mafunde ya kupwililika ilitulenga ukuba abantungwa, kabili akokonkanyapo ukuyanakila, tapelela fye mukumfwa alaba nako lelo akokita ifyo omfwa, ninshi Lesa akamipaala muli fyonse ifyo akokita. 26 Bushe ulalanda ati ndi mwina Lesa? Nga waba kilandelande ninshi ukoibepa fye no bwina Lesa bobe nabo bwa fye fye. 27 Ubwina Lesa ubo Lesa Shikulu abona ati bwalipwililika ku bune, kwafwa bakashiwa na ba mukamfwilwa mufyo bakokabila no kuitalusha ku fyakukowela fya pano kyalo.