1 Mwe bawesu, epo mwalisumina mu Shikulu Yesu Klistu, Shikulu wa bukindami, mwilekuba na kapatulula. 2 Nga kyakwebati umukankala alifwele ingalaminwe ya golide ne nsalu shamutengo, nga aisa mu ng'anda mulongene, elo no mupina uwasapula naye aisamo. 3 Nga mwapokelela bwino uufwele ifyabusaka, mwa mweba ati, "Ikaleni apa pa kipuna apabune." Umupina naye mwamweba ati, "Kemakane uko nangu ikala panshi mupepi na nebo." 4 Bushe ninshi tali kapatulula mwakita? Bushe ninshi tali mano yabubi mwabomfya mukupingula? 5 Umfweni mwebo bawesu mwe batemwikwa bangi! Lesa alasala abantu, abo bantu ba pano kyalo babakuuta abapina ukuba abakankala mu kisumino. Alabasala ukupyana Ubufumu ubo Lesa alaya abamutemwa. 6 Lelo mwebo mukosausha abapina! Ni bani bakomi fyengelesha no ku mipatikisha ukuya ku kilye? Bushe tali bakankala? 7 Bushe tali bakankala basaalula ishina ilikindami lyakwa Klistu ilyo mwainikwako? 8 Nga mulalungika, amunakila ikyebo ikikuulu ikyalembwa mu malembo ya Mushilo ikilanda ati, "Ulekutemwa umunobe nge fyo waitemwa we mwine." 9 Lelo nga mukokita akapatulula ninshi mukobifya, kabili ukulingana na mafunde, ninshi namutoba amafunde. 10 Uyo onse uukosunga amafunde yakwa Lesa yonse, nga pula fye muli limo, ninshi alikwete umulandu kubati apulafye muli yonse. 11 Lesa alipeele ikyebo kyakwebati, "Wile kukita bukende" ne kyakwebati, "Wilaipaya." Kanshi nangu taubemwike, lelo ukoipaya abantu, ninshi nishi namutoba amafunde. 12 Imilandile ne mikitile yenu ilekuba nge ya bantu abakopingulwa ne funde ilikolenga tulekuba abantungwa. 13 Pantu Lesa takakwate luse pakupingula umuntu uutali na luse ku mu nankwe. Uluse lwalikindama pa bupingushi.

14 Mwe bawesu, umo nga kolanda ati ndikwete kisumino nomba takobomba nangu kimo, bushe iki kisumino kuti kya muwamina ndo? Bushe iki kisumino kyakwe kuti kya mupususha? 15 Nomba nga kyakwebati wenu, alisapwile, elo ne fyakulya takwete, 16 bushe kikabawamina shani nga umo pali mwebo abeba ati, "Mwende umutende, mulekufwala mulekukaba, mulekulya mulekwikuta," nga tamubapeele ifi fintu bakokabila mu bumi bwabo? 17 Kanshi efyo ne kisumino kyaba, nga takikobomba imilimo ninshi kyalifwa. 18 Limo umo kuti alanda ati, "Webo ulikweete ikisumino, na nebo ndabomba imilimo yabune." Pakwasuka kuti na mweba ati, "Kisuma, webo nanga ikisumino kyobe ukwakubula imilimo yabune, na nebo nkokulanga ikisumino kyandi mu milimo iyo moomba!" 19 Bushe uukosumina ati kwaliba fye Lesa umo? Kisuma! Ne mipashi yakukowela nayo yalisumina, kabili ilatutuma no kututuma ku mwenso. 20 We kyungwa kya muntu we, bushe ukofwaya nkulange ati ikisumino ikyakubula imilimo yabune kya fye fye? 21 Bushe kindo kyalengele ati Ablahamu ikikolwe kyesu abe uwakaele pa kinso kyakwa Lesa? Ala ni pa milimo yakwe yabune, ulo atuulile umwana Isaki pakipailo pakwebati apeele ilambo. 22 Wabona ati ikisumino ne milimo yakwe iyabune fyalibombele pamo. Ne milimo yakwe yabune yalengele ati ikisumino kyakwe kibe ikyakupwililika. 23 Ne fyalembwa mu Malembo ya Mushilo fyalifikilishe ifyakwebati, "Ablahamu alisumine mu Lesa, na pa mulandu wa kisumino kyakwe, Lesa alimubwene ukuba uwakaele pa kinso kyakwe." Kabili ekyo Ablahamu alikukutilwa ati ni kibusa wakwa Lesa. 24 Mwabona nomba ati, Lesa tabona muntu ati wakaele pa kinso kyakwe pa mulandu wa kisumino fye kyeka, lelo na pa mulandu wa milimo yabune. 25 Epamo na ku mwanakashi Lahabu kilende. Lesa alimubwene ati wakaele pa kinso kyakwe pafyo akitile. Alipokelele inengu sha bena Islaeli shibili, alishafwilisheko no kufyuka mukubomfya inshila imbi. 26 Nga filya umubili wa muntu ufwa ulo umupashi wafumamo, efyo ne kisumino kiba ikyafwa nga takikobomba imilimo yabune.