2 ಮಾಜಾ ಬಾಚಾ ಗರ‍್ಹಾತ್ ಖುಬ್ ಖೊಲ್ಯಾ ಹಾತ್ತ ಆಸ ನಸ್‌ಲ್ಯಾವ ಮಿ ತುಮ್ಚಿ ಸಾಟಿ ಜಾ಼ಗಾ ತಯಾರ್ ಕರಾಯಾ ತಿಥ ಜಾ಼ತ್ಯೊ ಮನ್ಹುನ್ ಸಾಂಗಿತ್ ನವ್ಥೊ. 3 ಮಿ ತಮ್ಚಿ ಸಾಟಿ ಜಾ಼ಗಾ ತಯಾರ್ ಕರುನ್ ಜಾ಼ಲ್ಯಾವ, ಮಾಗಾರಾ ಯವುನ್ ಮಾಜಿ ಸಂಗ ತುಮಾನಾ ನೆಥೊ. ಆಸಿ ಮಿ ರಾಹಿನ್ ತಿಥ ತುಮಿಬಿ ರಾನ್ಹಾರ್.

9 ಯೇಸುನಿ ಹ್ಯಾ ಖನ್ಕತಿ ಅಪೊಸ್ತಲಾನಾ ಸಾಂಗ್‌ಲ್ಯಾ ನಂತರ್ ಅಪೊಸ್ತಲ್ ಬಗ್‌ತ್ಯಾಲ ಆಸ್ಥಾನಾಸ್ ಆಬ್ಳಾತ್ ಉಚ಼ಲುನ್. ಢಘಾನಿ ತ್ಯಲಾ ಜಾ಼ಖುನ್ ಗೆತಲ್ಯಾಲ್ಯಾನಿ ತ್ಯಂಚಾನಿ ತ್ಯಲಾ ಬಗಾಯಾ ಜಾ಼ಲ್ಹ ನಾಹಿ.

10 ಯೇಸು ಜಾ಼ತಾನಾ ಅಪೊಸ್ತಲ್ ಅಬ್ಳಾಕ್ಡಸ್ ಬಗಿತ್ ಹುತ್ತ. ತವಾ ಪಾಂಡ್ರ ಕಪ್ಡ ಗ್ಯಾತ್‌ಲ್ಯಾಲ ದೊಗ ಗಡಿ ಪಾಟ್ನ ತ್ಯಂಚಿಪ ಉಬ ರಾಯ್ಲ, 11 "ಗಲಿಲಾಯಾತಲ್ಯಾನು, ತುಮಿ ಕಾ ಆಬಾಳುಸ್‍ ಬಗಿತ್ ರಾಯ್‌ಲ್ಯಾಸಾ? ಯೇಸು ತುಮ್ಚಾ ಡೊಳ್ಯಾ ಮೊರ‍್ಹ ಸ್ವರ್ಗಾತ್ ಕಸಾ ಉಚ್ಲು಼ನ್ ಗೇಲಾ ತಸಾಸ್ ಪರ್ತುನ್ ಆನಿ ಯನಾರ್" ಮನ್ಹುನ್ ಸಾಂಗ್ಲ.

20 ಹ್ಯಾ ಸಗ್‌ಳ್ಯಾಲಾ ಸಾಕ್ಷಿ ಯೇಸುಸ್, ಆತಾ ತ್ಯೊ, "ವ್ಹಯ್, ಮೀಸ್ ಬಿಗಿನಿ ಯತೊ" ಮನ್ಹುನ್ ಸಾಂಗ್ತೊ.

ಪ್ರಭು ಯೇಸು, ಯೇ!

12 "ಬಗ್! ಮಿ ಬಿಗಿನಿ ಯತೊ! ಮಾಜಿ ಸಂಗ ಪ್ರತಿಫಳ್ ಆಂತೊ. ಪರತೇಕ್ ಮಾನ್ಸಾಲಾ ತ್ಯನಿ ಕೆಲ್ಯಾ ಶಾರ್ಕ ಪ್ರತಿ ಫಳ್ ದೇತೊ.

36 "ತ್ಯೊ ದೀಸ್ ನಾಹಿತ ತ್ಯೊ ಯೊಳ್ ಕವಾ ಯನಾರ್ ಮನ್ಹುನ್ ಕುನಾಲಾಸ್ ಸಮಾಜ್ನಾರ್ ನಾಹಿ. ದೇವಾಚಾ ಲೇಕಾಲಾಬಿ ಆನಿ ಸ್ವರ್ಗಾತ್ ಆಸ್‌ಲ್ಯಾಲ್ಯಾ ದೇವ್ದುತಾನಾಬಿ ಠಾವಾ ನಾಹಿ. ಬಾ ದೇವಾಲಾ ತ್ಯವ್ಡಾಸ್ ಠಾವಾ ಹಾ.

37 "ನೊಹಾಚಾ ದಿಸಾತ್ ಜಾ಼ಲ್ಯಾ ಶಾರ್ಕ ಮಾನ್ಸಾಚಾ಼ ಲ್ಯೊಕ್ ಯತಾನಾ ವ್ಹನಾರ್. 38 ಪಾನಿ ಯವುನ್ ಸಗಳ ಗಯಿಪ್ ಕರಾಚೆ ಆಂದಿ ಲೊಕ ಖಾಯಿತಿತ ಪಿಯಿತಿತ, ಲಗ್ನ ವ್ಹಯಿತಿತ ಆನಿ ಆಪ್‌ಲ್ಯಾ ಪೊರಾಂಚಿ ಲಗ್ನ ಕರಿತಿತ. ನೊಹಾ, ವ್ಹಡಿತ್ ಜಾ಼ಯಿ ಪರತ್ ಲೊಕ ತ್ಯ ಸಗ್ಳ ಕರೀತುಸ್ ಹುತ್ತಿತ. 39 ಕ್ಯಾ ವ್ಹತ್ಯಾ ಮನ್ಹುನ್ ತ್ಯನಾ ಸಮಾಜ಼್ಲ ನಾಹಿ. ಪಾನಿ ಯವುನ್ ಲೊಕಾನಾ ಸಗ್‌ಳ್ಯಾ ನಾಸ್ ಕಿಲಿತ

"ಮಾನ್ಸಾಚಾ಼ ಲ್ಯೊಕ್ ಯತಾನಾಬಿ ತಸಸ್ ವ್ಹನಾರ್.

32 ಆನಿ "ತ್ಯೊ ದಿಸ್ ನಾಹಿತ ತಿ ಗಟ್ಕಾ ಪರ್ಮೇಶ್ವರಾಲಾ ಸುಡುನ್ ದೇವ್ದುತಾನಾ ನಾಹಿತ, ಲೇಕಾಲಾ ಸಾಹಿತ್, ಸಮಾಜ಼ಲಿ ನಾಹಿ.

1 ಬನ್ಹಿ ಬಾವ್ಹಾನು ಹ್ಯಾ ಗುಶ್ಟಿ ಕವಾ ಚಾ಼ಲತ್ಯಾತಾ ಮನ್ಹುನ್ ದೀಸ್ ಆನಿ ಯೊಳ್ ತುಮಾನಾ ಲಿವಾಲಾ ವ್ಹಯಿ ಮನ್ಹುನ್ ನಾಹಿ.

2 ಕಾ ಮಂಜೆ ರ‍್ಯಾಚಾ಼ ಚೊ಼ರ್ ಕಸಾ ಯತೊ ತಸಸ್ ಪ್ರಭುಚ಼ ಯನ ತುಮಾನಾ ಚಾ಼ಂಗ್ಲ ಠಾವ ಹಾ. 3 ಸಗ್ಳ ಸಮಾದಾನಾನಿ ಭೆ ನಸ್ಥಾನಾ ರಾಥಾವ್ ಮನ್ಹುನ್ ಲೊಕ ಸಾಂಗ್‌ತ್ಯಾಲಿ ಆಸ್ಥಾನಾ ತ್ಯಂಚಿವ ನಾಸ್ ಬಾಳ್ತಿನಿಲಾ ಬಾಳತ್ಫನಾಚ಼ ಯಾಗ್ ತವಾಸ್ ಯತ್ಯಾಚೆಗತ್ ಯನಾರ್; ತಿ ಕಸಿಸ್ ಚು಼ಕ್ವುನ್ ಗಿಹಿತ್ನಾಹಿತ.

42 ತುಮಚಾ಼ ಪ್ರಭು ಯಯಾಚಾ಼ ದೀಸ್ ತುಮಾನಾ ಸಮಾಜ್ನಾ಼ರ್ ನಾಹಿ. ಮನ್ಹುನ್ ಕವಾಬಿ ತಯಾರ್ ರಾವ್ಹಾ. 43 ಹ್ಯ ಯದತ್ ಗೇವ್ಹಾ ಚೊ಼ರ್ ಕವ್ವಾ ಯನಾರ್ ಮನ್ಹುನ್ ಗರ‍್ಹಾಚಾ ದನ್ಯಾಲಾ ಸಮಾಜ಼ಲ್ಯಾವ ತ್ಯೊ ಜಾ಼ಗಾ ರಾಹುನ್ ಚೊ಼ರಾಲಾ ಘರ್ ಚು಼ರು ದಿಯಿತ್ ನವ್ಥಾ. 44 ಮನ್ಹುನ್ ತುಮಿಬಿ ತಯಾರ್ ರಾವ್ಹಾ ತುಮಿ ಯವಜ಼ಲ್ಯಾ ನಸ್‌ಲ್ಯಾಲ್ಯಾ ಯಳಾಲಾ ಮಾನ್ಸಾಚಾ಼ ಲ್ಯೊಕ್ ಯನಾರ್.

1 ಮಾಜಾ ಬನ್ಹಿ ಬಾವ್ಹಾನು, ಆಮಚಾ಼ ಪ್ರಭು ಜಾ಼ಲ್ಯಾಲ್ಯಾ ಯೇಸು ಕ್ರಿಸ್ತಾಚಾ ಯನ್ಯಾಚೆ ಗುಶ್ಟಿತ್ ಆಮಿ ತ್ಯಚಿ ಸಂಗ ಮಿಳಾಚೆ ಗುಶ್ಟಿತ್ ಮಿ ತುಮ್ಚಿಪ ಮಾಗಚ಼ ಕ್ಯಾ ಮಂಜೆ, 2 ಪ್ರಭುಚ಼ ದೀಸ್ ಆತಾಸ್ ಜ಼ವಳ್ ಆಲ್ಯಾತ ಮನ್ಹುನ್ ಕುನಿತರಿ ಸಾಂಗ್ಲತ ತುಮಿ ಆಂದಿ ಕಳ್ವಳುನಕೊಸಾ ತುಮಿ ಯವ್‍ಜಾ಼ ಗುಂದ್ಳು ನಕೊಸಾ ಕಾ ಮಂಜೆ ಸಾಂಗ್‌ನ್ಯಾನಿ ಪ್ರವಾದನೆನಿ ಆನಿ ಪತ್‌ರ‍್ಯಾನಿ ಆಮಿ ತುಮಾನಾ ಹ್ಯಚೆ ಗುಶ್ಟಿತ್ ಸಿಕಿವ್‌ಲ್ಯಾ. 3 ಕಚೆ ತರನಿ ಕುನಿ ತುಮಾನಾ ಫಸ್ವು ನಾಹಿ ಆಸ ಬಗಾ ಕಾ ಮಂಜೆ ಆಂದಿ ಇಸ್ವಾಸ್ ಹಾಳ್ ಕರುನ್ ನಾಶಾಡಿಚಾ಼ ಲ್ಯೊಕ್ ಜಾ಼ಲ್ಯಾಲಾ ಅದರ್ಮಿ ಮಾನುಸ್ ಮಾಳಾಸ್ ಯಯಾಚೆ ಆಂದಿ ಸೆವಟ್‍ಚಾ಼ ತ್ಯೊ ದೀಸ್ ಯನಾರ್ ನಾಹಿ. 4 ತ್ಯೊ ಆಪ್‌ಲ್ಯಾಲಾ ಸಗ್‌ಳ್ಯಾ ಸಾಮ್ನಾಂಚೆವರ್ ಮನ್ಹುನ್ ಗೆಥೊ. ಆನಿ ತ್ಯಂಚಾ಼ ಇರೊದ್ ಕರ್ತೊ ತಿ ಸಾಮ್ನ ದೇವಾಚಿ ಜಾ಼ಲ್ಯಾತ ನಾಹಿತ ವವ್ಯಾಳುನ್ ಗಿಹ್ಯಾ ಚಾ಼ಂಗ್ಲಿ ಜಾ಼ಲ್ಯಾತ, ಕುಟ್ಪರ‍್ಯಾತ್ ಮಂಜೆ ದೇವ್ಳಾತ್ ಜಾ಼ವುನ್ ಸಿಂಹಾಸನಾವ ಬಸುನ್ ಆಪ್ನುಸ್ ದೇವ್ ಮನ್ಹುನ್ ಗೆಥೊ.

16 ಪ್ರಭುಚಾ ದಿಸನ್ಯಾತ್ ಪ್ರಭುಚಾ ಪೈಲ್ಯಾ ದುತಾಚಾ಼ ಸಬ್ದ ಐಕುಯತೊ ತುತ್ತುರಿಚಾ಼ ಆವಾಜ಼್ ಐಕುಯತೊ ದೇವ್ ಆಪ್ನುಸ್ ಸ್ವರ್ಗಾತ್ನಿ ಉತ್ರುನ್ ಯನಾರ್; ತವಾ ಕ್ರಿಸ್ತಾಪ ಮೇಲ್ಯಾಲ ಆಂದಿ ಉಠುನ್ ಯನಾರ್. 17 ತ್ಯಾ ನಂತರ್ ಜಿತ್ತಿ ಆಸ್‌ಲ್ಯಾಲಿ ಆಮಿ ಆಬ್ಳಾತ್ ಪ್ರಭುಚೆ ಮೊರ‍್ಹ ಜಾ಼ಯಾ ತ್ಯಚೆ ಸಂಗ ಡಗಾತ್ನಿ ನೆನ್ಹಾರ್; ಆಸ ಆಮಿ ಕವಾಬಿ ಪ್ರಭು ಸಂಗ ರಾನ್ಹಾರ್.

24 "ಹೆ ತರಾಸಾಚ಼ ದಿಸ್ ಯವುನ್ ಗೆಲ್ಯಾ ನಂತರ್,

ದಿಸ್ ಅಂದಾರ್ ವ್ಹನಾರ್.

ಚಾ಼ಂದ್ ಚಾನ್ನ ದೆನಾರ್ ನಾಹಿ.

25 ಚಾನ್ಯಾ ಆಬ್ಳಾತ್ನಿ ಪಡ್ನಾರ್.

ಆನಿ ಆಬ್ಳಾತ್ಲ ಬಳ್ ಹಲ್ನಾರ್.

26 ತವಾ ಮಾನ್ಸಾಚಾ ಲ್ಯೊಕ್ ಮೊಟ್ಯಾ ಹುಕ್ಮಾನಿ ಆನಿ ಮಹಿಮೆನಿ ಡಘಾತ್ನಿ ಯತ್ಯಾಲಿ ಲೊಕ ಬಗ್ನಾರ್. 27 ಮಂಗ್ ಮಾನ್ಸಾಚಾ ಲೇಕಾನಿ ಆಪ್‍ಲ್ಯಾ ದೇವ್ದುತಾನಾ ದರ್ಥಿವ ಸಗ್ಳಿಕ್ಡ ಲಾವುನ್ ದಿವುನ್ ಆಪ್ನು ನಿವಡ್‌ಲ್ಯಾಲ್ಯಾನಾ ದರ್ತಿವ ಸಗ್ಳಿಕ್ಡ ಆನಿ ದೇವ್ಲೋಕಾತ್ನಿ ಸಗ್ಳಿಕ್ನಿ ಯಕಿಕ್ಡ ಜ಼ಮಾ ಕರ್ನಾರ್.

31 "ಮಾನ್ಸಾಚಾ಼ ಲ್ಯೊಕ್ ಆಪ್‌ಲೆ ಮೈಮೆನಿ ಸಗ್‌ಳ್ಯಾ ಧುತಾಂಚೆ ಸಂಗ ಆನಿ ಯತಾನಾ ರಾಜಾ಼ ವ್ಹವುನ್ ಮೊಟ್ಯಾ ಸಿಂಹಾಸನಾವ ಬಸ್ನಾರ್. 32 ಸಗ್ಳೆ ಭಾಶೆಂಚಿ ಲೊಕ ತ್ಯಚೆ ಮೊರ‍್ಹ ಜ಼ಮ್ನಾರ್ ಕುರುಬುರಾನಿ ಮೆಂಡ್ರ ಸೆರ್ಡಾತ್ನಿ ಯಗಳ್ಯಾ ಶಾರ್ಕಿ ತ್ಯೊ ತ್ಯನಾ ಯಗಳ್ನಾರ್; 33 ಮಾನ್ಸಾಚಾ಼ ಲ್ಯೊಕ್ ನಿಯತೀಚಾನಾ ಆಪ್‌ಲ್ಯಾ ಉಜ್‌ವ್ಯಾಂಗ್ನಿ ಆನಿ ನಿಯತ್ ನಸ್‌ಲ್ಯಾಲ್ಯಾನಾ ಆಪ್ಲೆ ಡಾವ್ಯಾಂಗ್ನಿ ಉಬಿ ಕರ್ನಾರ್.

11 ನಂತರ್ ಸ್ವರ್ಗ ಉಗಾಡ್‌ಲ್ಯಾಲ ಮೀ ಬಗ್ಲ ಮಾಜೆ ಮೊರ‍್ಹ ಯೊಕ್ ಪಾಂಡ್ರಾ ವಾರು ಹುತ್ತಾ ತ್ಯಚಿವ ಬಸ್‌ಲ್ಯಾಲ್ಯಾಚ಼ ನಾವ್ ಇಸ್ವಾಸಾಚ ಆನಿ ಖರ. ತ್ಯೊ ತೀರ್ಮಾನಾತ್ನಿ ಲಡಾಯಿತ್ನಿ ನೀಯತಿಚಾ಼ ಜಾ಼ಲ್ಥಾ. 12 ತ್ಯಚ಼ ಡೊಳ ಪೇಟ್ಯಾಲ್ಯಾ ಇಸ್‌ಥ್ಯಾಚೆಗತ್ ದಿಸತ. ತ್ಯಚೆ ಡುಯಿವ ಖುಬ್ ಕಿರಿಟ ಹುತ್ತಿತ. ತ್ಯಚಿವ ಯಾಕ್ ನಾವ್ ಲಿವ್ಲ ಹುತ್ತ, ಫನ್ ತ್ಯಾ ನಾವಾಚಾ಼ ಅರ್ಥ ತ್ಯಲಾ ಸುಡುನ್ ದುಸ್‌ರ‍್ಯಾನಾ ಕುನಾಲಾಸ್ ಸಮಾಜ಼್ಲ ನಾಹಿ. 13 ತ್ಯಚಾ ರಕ್ತಾತ್ ಬಿಜಿವ್‌ಲ್ಯಾಲಾ ಜ಼ಘಾ ಗ್ಯಾತ್ಲಾ. ತ್ಯಚ಼ ನಾವ್ "ದೇವಾಚಾ ವಾಕ್ಯಾ. " 14 ಸ್ವರ್ಗಾಚಾ ಸೈನ್ಯಾ ಪಾಂಡರ‍್ಯಾ ವಾರ್ವಾವ್ನಿ ತ್ಯಚೆ ಮಾಗ್ನಿ ಯಯಿತಿತ. ತೇ ಪಾಂಡ್ರ ಚಾ಼ಂಗ್ಲ ಆಸ್‌ಲ್ಯಾಲ ನಾರ್ಮಡಿಚ಼ ಕಿಮ್ತಚ಼ ಕಪ್ಡ ಗ್ಯಾತ್ಲ. 15 ವಾರ್ವಾವ ಬಸ್‌ಲ್ಯಾಲ್ಯಾಚಾ ತೊಂಡಾತ್ನಿ ಧಾರಚ಼ ಥಲ್ವಾರ್ ಯಾಕ್ ಬಾಹಿರ್ ಯಯಿತ. ತ್ಯೊ ಲೊಕಾನಾ ಪಾಡಾಯಾ ಹ್ಯ ಥಲ್ವಾರ್ ವಾಫರ್ತೊ. ತ್ಯೊ ಲೊಖಾಂಡಾಚೆ ಕಾಠಿನಿ ಲೊಕಾಂಚಿವ ರಾಜ಼್‌ಭಾರ್ ಕರ್ತೊ. ಸರ್ವಶಕ್ತ ದೇವಾಚಾ಼ ಖುಬ್ ರಾಗ್ ಮಂಥ್ಯಾಲ್ಯಾ ದರಾಕ್ಷಿಚಾ ಖಢ್ಯಾತ್ ದರಾಕ್ಷಿ ತುಡಿವ್ನಾರ್. 16 ತ್ಯಾ ಜ಼ಘ್ಯಾವ ತ್ಯಚೆ ಮಾಂಡಿವ. "ರಾಜಾಚಾ಼ ರಾಜಾ಼ ಪ್ರಭುಚಾ಼ ಪ್ರಭು"

ಮನ್ಹುನ್ ನಾವ್ ಲಿವ್ಲ ಹುತ್ತ.

26 ಕೊನ್ ಮನಾ ಆನಿ ಮಾಜಾ ಸಬ್ದಾನಾ ಲಾಜ಼ತೊ ತ್ಯಲಾ ಮಾನ್ಸಾಚಾ಼ ಲ್ಯೊಕ್ ಆಪಲ್ಯಾ ಬಾ ದೆವಾಚಾ಼, ಆನಿ ಸ್ವರ್ಗಾಚ಼ ಪವಿತ್ರ ದೇವ್‌ ಧುತಾಂಚಾ ಗೌರವಾನಿ ಯತಾನಾ ಲಾಜ಼ಲ್‌.

8 ಮಾಯೆಚಾನು, ಪ್ರಬುಚಾ ಲೆಖ್ಯಾತ್ ಯೊಕ್ ದಿಸ್ ಹಾಜಾ಼ರ್ ವರ್ಸಾಚೆಗತ್ ಹಾಜಾ಼ರ್ ವರ್ಸ ಯೆಕ್ ದಿಸಾಚೆಗತ್ ಹಾತ ಮನ್ಹುನ್ ಇಸ್ರು ನಕೊಸಾ. 9 ಪ್ರಭುನಿ ಆಪ್ನು ದಿಲ್ಯಾಲ್ಯಾ ಸಬ್ದ ಸಾರ ಕರಾಯಾ ಉಸಿರ್ ಕರ್ತೊ ಮನ್ಹುನ್ ಥೊಡ್ಯಾಚಾಂನಿ ಸಮಜು಼ನ್ ಗೆತಲ್ಯಾ ಶಾರ್ಕ ತ್ಯೊ ಉಸಿರ್ ಕರ್ತ್ಯಾಲಾ ನವ್ಹ. ಕೊನ್ ಯೊಕ್ ನಾಸ್ ವ್ಹಯಾಲಾ ತ್ಯಲಾ ಮನ್ ನಾಹಿ ಸಗ್‍ಳ್ಯಾನಾ ಪಶ್ಚಾತಾಪ್ ವ್ಹಯಾವ್ಹಯಿ ಮನ್ಹುನ್ ಮನ್ ಕರುನ್ ತುಮ್ಚೆ ಗುಸ್ಟಿತ್ ಖುಬ್ ಥಂಡ್ಪನಾನಿ ಹಾ.

10 ಫನ್ ಪ್ರಬುಚಾ಼ ದಿಸ್ ಚೊ಼ರಾಚೆಗತ್ ಯನಾರ್. ತಿಸಿ ಆಬ್ಳ ಮೊಟ್ಯಾನಿ ನಾಹಿವ್ಹನಾರ್. ಉತ್ಪನ್ ಜಾ಼ಲ್ಯಾಲ ಸಗ್ಳ ತಾಪುನ್ ನಾಹಿವ್ಹನಾರ್. ದರ್ತಿ ಆನಿ ತ್ಯಾತ್ ಆಸಲ್ಯಾಲಿ ಕಾಮ ಜ಼ಳುನ್ ಜಾ಼ನಾರ್.

11 ಹ್ಯಾ ಸಗಳ್ಯಾ ಗುಸ್ಟಿ ನಾಹಿ ವ್ಹನಾರ್ ಮನ್ಹುನ್ ತುಮಿ ಕಸ್ಲಿ ವ್ಹಯಾವ್ಹಯಿಸಾ? ನಿರ್ಮಳ್ ಆನಿ ಬಕ್ತಿ ಆಸ್ನಾರಿವ್ಹವುನ್ ರಾಹ್ಯಾ ವ್ಹಯಿಸಾ. 12 ದೇವ್ ಯತ್ಯಾಲ್ಯಾ ದಿಸಾಚಿ ವಾಟ್ ಬಗಿತ್ ಆಶೆನಿ ರಾತ್ಯಾಲ್ಯಾ ತ್ಯಾ ದಿಸಾತ್ ಆಬಾಳ್ ಇಸತ್ಯಾನಿ ನಾಸ್ ವ್ಹನಾರ್. ಲ ಉಬನಿ ಪೈಲ ಉತ್ಪನ್ ಜಾ಼ಲ್ಯಾಲ ಸಗ್ಳ ತಾಪುನ್ ಕಡುನ್ ಜಾ಼ನಾರ್. 13 ಫನ್ ಆಮಿ ದೇವಾಚಾ ಸಬ್ದಾ ಸಾರ ನವಿ ಆಬ್ಳ ಆನಿ ನವೆ ದರ್ತಿಚಿ ವಾಟ್ ಬಗತ್ಯಾವ್. ತ್ಯಾತ್ನಿ ದೇವಾಚಿ ನೀಯತ್ ಹಾ.

27 ಪರತೆಕ್ ಜಾ಼ನ್ ಯಗ್ದಾಸ್ ಮರ್ನಾರ್. ನಂತರ್ ತ್ಯನಾ ದೇವಾಪಸುನ್ ನ್ಯಾಯಿ ತೀರ್ಮಾನ್ ವ್ಹನರ್. 28 ತಸಾಸ್ ಕ್ರಿಸ್ಬಿತ ಖುಬ್ ಲೊಕಾಂಚಿ ಪಾಪ ಗಿಹ್ಯಾಸಾಟಿ ಯಗ್ದಾಸ್ ಸಮರ್ಪನ್ ಜಾ಼ಲಾ. ಕ್ರಿಸ್ತ ದೊನವ್ಯಾನಿ ದಿಸ್ನಾರ್ ತ್ಯೊ ಲೊಕಾನಾ ಪಾಪಾತ್ನಿ ಸುಟ್ಕಿ ಕರಾಯಾ ನವ್ಹ. ಆಪ್ಲಿ ವಾಟ್ ಬಗ್‌ತ್ಯಾಲ್ಯಾ ಲೊಕಾನಾ ರಕ್ಷನ್ ಕರಾಯಾಸ್.