A volta de Jesus

2 Nenfa nompina rama’a hunaraginte nona me’ne, omne’neresina Nagra ko tamasmusine, Nagra, nonkuma tamia ome retro hunaku nevue. 3 Nagrama vu’na nonkumatmi ome retro hutesu’na, ete e’na eme tamavresugeta, Nagrama umanisure, tamagra Nagrane umanigahaze.

9 Ana naneke zamasmiteno, negageno hampompi ufrege’za onke’naze. 10 Monafi kete’za mani’nageno, ame' huno efeke kukena hu’na’a ne’tremoke anante oti’ne’ne, 11 anage hu’na’e, Galili vahe’mote na’a higetma amarera oti’netma monafinka negaze? Ama ana Jisasi tmatreno monafi negageno mareri’neaza huno, ete anahu kna huno egahie, huke zamasmi’na’e.

20 Amama ana naneke huama’ma nehimo’a huno, Izo Nagra ko ame hu’na egahue. Tamage. Ramoka Jisasiga eno.

12 Higeno Jisasi’a anage hu’ne, Antahiho, Nagra ame hu’na mizana eri’nena egahuankina, maka vahe’mo’zama nehanaza zamavu’zmavate mizana eme zamigahue.

Tro hutma maniho huno Jisasi hu’nea naneke

36 Hu’neanagi anama esia knane zagenena, mago nemo’a ontahi’tfaza hu’ne. Monafinka ankeromo’zane Nemofo’enena ontahine. Hagi Nenfake’za antahi’ne. 37 Na’ankure Noa knafi hu’nazankna avu’ava’za nehnageno Vahe’mofo Mofavrea egahie. (Jen-Agf 6:5-8) 38 Na’ankure tina ohage’nege’za, ana knafina, vahe’mo’za ne’zana nene’za, aka tina nene’za, a’nea e’neriza, ara masi omiami nehazage’no, Noa’a ventefina umareri’ne. 39 Zamagra mago zankura ontahi’za mani’nageno tinko’mo hageno eme zmaheno refite vagare’ne. Vahe’mofo mofavrema enaku’ma hanigeno’a, e’inahu’za fore hugahie. (Jen-Agf 7:6-24)

Jisasi’ma esia kna mago vahe’mo’e huno ontahine hu’nea naneke

32 Hianagi mago vahe’mo’e huno anazama fore’ma hania knane zagenena ontahi’ne. Monare nemaniza ankero vahe’mo’za ontahi’zageno, Mofavre’amo’a ontahi’ne. Nefa Agrake ana kna antahi’ne.

Ramo’ma ete esnigu tro huta manisnuna naneke

1 Nagra anazama efore’ma hania zamofonkea, e’i knarero, e’ina zupa fore hugahie hu’na nenafugta kreoramigahue. 2 Na’ankure tamagratmi antahi’naze, Ramo’ma esianknamo’a, kumazafa vahe kenage eankna huno egahie. 3 Vahe’mo’za hu’za knare huta mani’none nehu’za, tarimpa fru huta maniso’e hune hu’za hanaza knafi ame huno zamazeri haviza hu’zamo’a zamagritera, a’nemo’za mofavre antenaku’ma nehazageno zamata negriankna zamata negrina, zamagra ana knazampintira mani onkanegahaze.

42 E’ina hu’negu kavua ketenka manio, na’ankure kagri Ramo’a nanknare egahio, kagra ontahi’nane. 43 Hianagi ama’na kea antahi ankerenka antahio, nomofo nefa’ma musufa ne’mo’ma kenagepima ne-esia knama antahi ankere’nesuno’a, agra kvahu ankere’neno atresigeno noma’a tagana vazino uofregahie. 44 E’ina hu’negu tamagranena trotra hiho, na’ankure Vahe’mofo mofavremo’a tamagra egahie hutma antahi omisaza knazupa egahie.

Kasege rutagre ne’mofo naneke

1 Hagi nerefugata Ranti Jisas Kraisi’ma esigeta, Agranema tagrama ome atru hanuna zamofonkura, menina anage huta tagra tamantahinegone. 2 Mago’a vahe’mo’za tamasamiza Ramofo kna hago fore hu’ne hu’za tamasamisazo, mago vahe’mo huno Ruotge Avamumo e’inahu kasnampa kea nasamie huge, mago ke huama nehuno hanio, mago vahe’mo huno, e’inahukna avona hamprita keteta huama hunema hanageta, e’inahu kema antahisutma, antri nehutma ame hutma antahintahi tamifina antahigna osiho. 3 Atrenkeno mago kampintira vahe’mo’za reramatga osiho. Na’ankure ana kna fore osu’nenigeno, kote’zana rama’a vahe’mo’za Anumzamofona zamefi humitesageno, kasegema rutagre ne’mo’a efore nehina, ana ne’mofona azeri haviza hugahie. 4 Ana ne’mo’a agra’a maka’zama anumzane hu’za mono hunentaza’zane, mago’a mono hunentaza zantamina ha’renezmanteno, Nagra ra mani’noe huno Anumzamofo ra mono nompi trate nemanino, agra’a azeri ama huno Anumza mani’noe huno hugahie.

16 Ramo’a Agra’a monafinti eneramino, hanavege huno kezanke nehanigeno, ugota ankeromo’a ageru nerinkeno, Anumzamofo ufemo krafa nehanigeno, vahe’mo’za Kraisinte zamentinti hute’za frinesaza vahe’mo’za kote’za kerifintira otigahaze. 17 Anantera tagrama ofritama maninesuna vahe’mota, tavresigeta mrerita hampompi omeri mago huteta, magoka anagamu Ramofona ome tutagiha hunenteta, maka kna Agrane manivava hugahune.

Vahe’mofo Mofavremo ete esianknamofo naneke

24 Hianagi ana knafina tusi’a knazamo vagama resigeno’a, zagemo hani hanigeno, ikamo’a remsa osanigeno, 25 monafinti hanafi tamimo’za atafri neraminage’za, monafi me’nea hanave zantamimo’za tore hugahaze. (Ais 13:10, 34:4, Joel 2:31-32) 26 Anante Vahe’mofo Mofavremo’a hampompi, tusi’a hihamu’ane masa’afi ne-esigeta kegahaze. (Dan 7:13) 27 Anante ankero vahe’a huzmantena, Anumzamo huhampri zamante’nea vahera mona mopa ome tre emetre kazigatira ome zmavare eme zmavare hu’za zamazeri atru hugahaze.

Mika vahe refako hania naneke

31 Hagi Vahe’mofo Mofavremo ete hanave’afine masa zama’afima mika ankero zaga’anema esuno’a, Agra masa nentake tra’are emanigahie. 32 Mika kokankokati vea’mo’za Agri avure emeritru hanageno afu kva nemo, afu kevufinti memene sipisipi afutami refako hugantugma hiankna huno, zamazeri kantugma hugahie. 33 Sipisipi afu’tmina, Agra aza tamaga kaziga zmavrenenteno, meme afutamina aza hoga kaziga zamavarentegahie.

Kraisi’ma efeke hosimofo agumpi esia zamofo naneke

11 Hagi monamo’a anagige’na efeke hosi afu’mofo agumpi mago ne' mani’nege’na ke’noe. Ana ne’mofonkura, hugahue huno’ma hiaza nehimo’e hu’za nehu’za tamage nere hu’za nehazamo’e. Fatgo avu’avate refko huno hara nehie hu’ne. 12 Avurgamo’a teve anefakna nehigeno, asenirera rama’a kini vahe’mofo fetori megeno, Agrira mago agi avufarera krente’ne, mago vahe’mo’a ana agia ontahigahianki, Agrake antahine. 13 Ana ne’mo’a korampi re’nea zaza kukena hu’ne. Agi’ama henazana, Anumzamofo Naneke hu’naze. 14 Hanki monafi mani’naza sondia vahe’mo’za agru huno knarezantfa hu’nea efeke kukena hu’ne’za, amage ante’za efeke hosi afutamimofo agumpi vu’naze. 15 Ana ne’mofo agipintira tarekaziga asane kazi atirami’neankino, ana kazinuti maka kumapi vahera nezmaheno, aeni azompareti kini manino kegava hunezmante’na, hanavenentake Anumzamofo rimpahe knazamo’a, agareti waini regatiti nehiakna huno zmahegahie. 16 Hanki zaza kukena’are’ene amotera anage huno krentene, Mika kini vahe’mofo Kini manino, maka ra vahe’mokizmi Ra mani’ne huno krente’ne.

26 Iza’o nagriku’ene keniagu’ene agazema hunante’simofona, Vahe’mofo Mofavremo’ma Agra’a masa’afine, Nefa masa’afine ruotge ankero vahe zagamofo masafinema esuno’a agrira eme agaze huntegahie.

8 Hianagi navesi neramantoa ronenimota amazana tamagera okaniho, Ramofontera mago zage ferumo’a 1tauseni’a zagekfugna higeno, 1tauseni’a zagekafumo’a magoke zage ferukna hu’ne. 9 Ramo’a huvempama hu’nea kerera, mago’a vahe’mo’zama nentahizaza huno akoheno eri’zana e’norie. Hagi akoheno kavega anteno mani’neno, mago’a vahe’mo’za fanane osnaze huno mani’ne. Hianagi maka vahe’mo’za zamagu’a rukrehe hanazegu zamavega anteno mani’ne.

Monane mopane fanane hania naneke

10 Rantimo’ma esianknamo’a kumzafa vahe’mo’za ontasmi’za neazankna hanigeno, monafima me’neazamo’a ra ageru neruno fanane hanigeno, tusi’a amuhonentake tevemo maka’zama ama mopafi me’neazana tefanane hugahie.

11 E’inahu kante ana makazamo vagaregahianki, tamagra inankna hutma manigahze. Mani ruotge nehuta, Anumzamofo fatgo avu’avaza nehutma, mani’nenkeno anazana fore hino. 12 Ananknama esie hanutma eri’za enerinkeno, ame huno eno. Anankna zupa tevemo mona te fanane nehanigeno, maka’zana te maramra huno, te mekitrere hugahie. 13 Hianagi Anumzamo’a ko huvempa huranteno kasefa monane mopane tro hanugeno, fatgo avu’avazamoke megahie hu’ne. E’i anazama fore hanigu avega ante’none.

27 Hu’negu vahe’mofonku’ma hunteneana, magoke zupa fritesuno’a kegagarera otigahie huno huntene. 28 Hu’negu Kraisi’a magoke zupa frino rama’a vahe kumira eritrezamtene. Agrama henkama esu’no’a kumiti eritrerante’nakura omegahianki, Agriku’ma tusiza hu’za avegama ante’namokizmi zmahokeno zmavrenaku egahie.