A volta de Jesus

2 Na Nina yugumogl i, ene againo mogl pai eraiglkwa mere yogwa. Ta yekruma, ene di teigo. Na pi ene moraiglmara ere wakai eraglka. 3 Te, na pi ene moraiglmara ere wakai ere tebo, na aglke ede ikne u ene na moglmara akie moramnedi agre i ede enaglka.

Jisas ede ikne heven ibo ogwa

9 Ana Jisas ka yegl di kodugo, God ye agre i ede heven ibo ogwa. God ye agre i ede heven ibo ogo, ye dedugwa yoba ikra kan meglkwa. Kan meglko, ye ede kamun kua mina ede atne ogo, kamun kua si torua eruko, ye ta kankrikwa. 10 Ana ye Jisas kanamnedi ye omara i toro kan mina ibo ede meglko, yagl suo kugugl gagl kruo eribrika tabre u, ye meglmara plau dibriko, ye kandre, nagino keglkwa. Kandre, nagino keglko, yagl suo i adigl moglsre, 11 ye yegl di pribrika, Yagl wagle, ene distrik Galili nem meglkwa i, ene siragl pre adigl mogl, kan mina ibo ede meglme? dibrika. God ye Jisas agre i ede heven ibo ogo, ene kan meglkwa. Ege swara ta ye omere kuno yegl mere, Jisas aglke kor ikne unabiwe di, yegl dibrika.

20 Ana yoba ta ka i di narukwa yobamo i yegl dugwa, Na tabre unaluwe dugwa. I pra. Yagl Kade Jisas, ene ede wo.

12 Ana mokomugl i, Jisas yegl dugwa, Kanio! Na tabre unaglka. Te, na unaglka igne, na topo wakai ake idre, u yoba swara swarade mabuno wakai ta eraiglmere i, topo tenaluwe dugwa.

Jisas aunake ede ikne unabuka i, yoba ta pre kan erekrikwa

36 Jisas yegl didre, ama yegl dugwa, Na aunake ikne unaglka i, ade kwia mo ege i yoba ta pre kan erekrikwa. Yoba ta pre kan erekriko, angelo heven ibo meglkwa i pre kan erekriko, te na God Wam moglka i ama pre kan erekrika. Na Nina ege swara i pre kan erukwa. 37 Kuno yegl mere Na Yoba Wam unaglka i, Noa egemo yomere mere yegl yenan, yoba pre kan erekraiglkwa. 38 Noa egemo yoba gun yei, kaya mokna podo nedre, abu idre, abroma yagl tedre, ere meglkwa. Ye pra munedi ere meglko, Noa ede sip yugugl ogo, 39 yoba meda meglkwa i, pre kan erekre, meglko, nigl kamun podo sugwa igne, ye pre kan erikwa. Na Yoba Wam moglka i, unaglka igne, kuno yegl mere panabiwe dugwa.

Jisas ere mogl, Na aunake unaglka, yoba ta prikrime dugwa

32 Jisas yegl didre, ama yegl dugwa, Na aunake igne unaglka i, ade kwia mo ege i, yoba ta pre kan erekrikwa. Yoba ta pre kan erekriko, angelo heven ibo meglkwa i pre kan erekriko, te na God Wam moglka i ama pre kan erekrika. Na Nina swara ege i pre kan erukwa.

Ermine, abuglage sumara wan moramga paugwa

1 Ana agroma abaroma wagle, nono Yaglno Kade aunake ede ikne unabuka i pre no ka tau ene di tenamga i ta paikrukwa. 2 I siragl pre enene pre kan erikwa i, nono Yaglno Kade i, yoba ka tage tenabuka igne i yoba pre pogl sikre meglbi, tabre plau dinabuka. Kunogl gogl yoba ta eduer suna yoba kipamara ede yugugl ugo, yugu nem kandre, wai kuglmere yegl, yoba kankre meglbi, ege i plau dinan, ye wai kuraiglkwa. 3 Yoba yene ikne ikne di tedre, Yoba ta no sikriko, kiede mogl, ame wakai dumniwe di, yegl di meglbi, God tabre ye ere sinan, yoba swara kaima ta teke ede meda pikrabuka. Abu ta gak kuragledi erukwa igne, nagie giugl tabre kana prumere mere yegl, ege kide i, tabre plau dinabuka.

42 Ene Yaglno Kade aunake unabuka i, ene pre kan erekrikwa pre kwi ere molo. 43 Prio. Kunogl gogl yoba eduer suna unabuka i, yugu nem yagl aunake unabuka i, pre kan eruma, ye kwi ere moglsre, kunogl gogl yoba ede yugugl u dinabedi si kegl dugo. 44 Yegl paugwa pre ene aimadi kwi ere molo. I siragl pre na Yoba Wam moglka i, ege ta prikraiglkwa ege ikne unagliwe di, Jisas yegl dugwa.

Krais kudamo ikne yagl unabuka

1 Agroma abaroma wagle, nono Yaglno Kade Jisas Krais ede ikne unan, nono ye bogl makai sinamga i pre no ene ka tau di tomun, ene pre pogl sinaiglmedi prumga. 2 Yoba tau ene di tedre, Yagl Kade yoba ka tage tenabuka igne i u kodumiwe di, yegl ta dibi, ene nomane sidre, kide prikrio. I siragl pre ye ka kibi digwa. Yoba God Murubuglomo ka yegl di norume dinaiglkwa mo Jisas dedugwa yoba no yegl di norime dinaiglkwa mo ye pepa ta bogl norime dinaiglkwa i, ene ye ka kaima dimedi prikrio. Ye ka kibi digwa.

3 Yoba ene bakagl te dinaiglmiwa, ene kan kun erio. I siragl pre okna kana taragl tau plau dinan, mokomugl i Yaglno Kade yoba ka tage tenabuka ege i unabuka. Taragl ta komono kana plau dinabuka i, yoba mere kide God kamo sedidre, ye mokono tenaiglkwa. Tebi, yagl ta mabuno kide mina ede okna enabuka i, ede u nogugl enabuka. Yagl i, God ye ere kide ere tenabuka keme paugwa. 4 Yagl kide i, yoba taragl kane kane ta god meglmiwe didre, kagno kade teigwa i, ye mane didre, na swara kagna kade nario dinabuka. Ye yegl didre, God yugumo yenabara ede yugugl pi, ame di moglsre, Na nana God moluwe dinabuka.

16 I siragl mere plau dinabuka i, yegl mere paugwa, nono Yaglno Kade Jisas yene heven ibo kide kodo, ede atne udre, ka podo kide kaima ta dinabuka. Dinan, angelo swara ta angelo tau bitno moglkwa i ama ka podo dinan, God biugelmo borabuka. Boran, taragl komono kana plau dinabuka i, yoba ta Krais pre mediglsre, geglkwa i, ye ogono nagino mina adigl u kor enaiglkwa. 17 Adigl u kor ebi, nono pre medunga yoba tau goglkre, kor mogl pai moramga i, ye bogl u swara pidre, ede egli ibo pi, kamun kua mina suna pidre, Yaglno Kade kamun mitna unabara i, ye tegigl yenamga. Nono Yaglno Kade Jisas tegigl yedre, ye bogl aimadi kamin akie moramga.

Yoba Wam ede ikne unabuka

24 Ana Jisas yegl didre, ama yegl dugwa,

Yubun podo kide yegl unan, mokomugl i ade ake mim eran, ba ama abuglage sikrabiwa. 25 Kugl kuri paigwa i, yage makadigle sibi, taragl tau heven ibo giglede paigwa i, ama piga kar dinaiglmiwe*

dugwa.

26 Taragl yegl plau dinan, na Yoba Wam moglka i, kamun mitna ibo plau didre, na yobuglna ya abuglagena podo paugwa i nogugl edibo, na kanaiglmiwe dugwa. 27 U plau dibo, yoba na kanibi, na angelo dedibo, ye ede uglo koglo koglo pi, yoba God kere yugwa meglkwa i, yu makai sinaiglkwa. Ye ade umara ya ade beimara pidre, te nigl bre ya nigl beye pidre, na yobanama yu makai sinaiglmiwe di, yegl dugwa.

Jisas ye yoba kot ere tedre, i pere pere edenabuka pre dugwa

31 Ana Jisas yegl didre, ka ta ama yegl dugwa, Na Yoba Wam moglka i, abuglagena mina plau didre, angelonama bogl mudu akie umun, na abuglagena mina moglsre, sia king mina ame di moraglka. 32 Ame di moglbo, yoba yugobuno mudu meglkwa i, u na moraglmara makai sinaiglkwa. Makai sibi, sipsip sugl moglkwa yoba ta sipsip i pere edidre, meme i pere edumere yegl na yoba i pere pere edenaglka. 33 Yoba sipsip mere yegl ta moraiglkwa i, ogona wo kra adigl meglbi, te meme mere yegl ta moraiglkwa i, ogona koda kra adigl moraiglkwa.

Jisas ede ikne ugwa

11 Ana okuo na kaniga i, heven ibo ede u koglo koglo ogo, yagl ta hos kruo au si moglko, na kaniga. Yagl ta hos kruo au sugwa i, ye kagie suo ye teigwa. Kagie i, Ka Kaima Keme Dugwa te, Ka Dumara Adigl Moglkwa Yagle. Ye yoba ka tage tedre, kuda bogl togwa i, mabuno du keme ersre, ere togwa. 12 Ye gumuglo i, doga bauglo abuglage sumere mere yegl abuglage sugo, ye bre mina king bitno gagl tau mere edugwa. Te, ye ogo nagie mina kagie ta beglkwa paugwa ba ye kagie i, yoba mudu ta pre pogl sikrikwa. Yene swara pre pogl sugwa. 13 Ye gagl olto ta edugwa i, bormai mina was erikwa mere yegl edugwa, te ye kagie ta God Kamo we digwa.

14 Ana yagl i hos au si idre, ugo, na kandre, yoba heven ibo meglkwa i, ye ami mere yegl moglsre, hos kruo ama au si idre, ye mokomugl wigo, na kaniga. Yoba i, ye kugugl gagl kruo, pe kaima sugwa edigwa. 15 Ana yagl ta ye eimara ede okna ogwa ikra bainet nogwa ta dra mina ede meda ugwa. I siragl pre ye bainet i mina yoba yugobuno pere pere meglkwa i, si atne edenabuka. Ye si atne edidre, ain buglo muglbo ta ake mogl, ye suglno morabuka.* Te, God, ye yobuglomo pai kawa togwa moglkwa i dem podo kubrumara i mina yoba wain mogo egrimere mere yegl, yagl i God kudamo ikne yegl egre atne edenabuka. 16 Ye bikie mina atne kagie ta boglsre, te tebe kugugl gagl olto edumara i bikie mina ama kagie beglkwa paugwa. Ye kagie i, king mudu Kingno ya yoba kade mudu Yaglno Kade we di, yegl beglkwa.

26 Ana yoba swara ta na Yoba Wam moglka i, againa goglsre, na kana pre ama agai goran, okuo yobamo i ama agaimo goraglka. Na nana abuglagena mina ya Nina abuglagemo mina ya te, God angeloma abuglageno mina unaglka igne, na yoba i agaimo goraglka pre diwe dugwa.

8 Ana agrama abarama wagle, dena muduna suna meglkwa i, God okuo yoba kotno prisre, dumo makan ere kide erabuka ba ene ka swara ta pre moraiglkwa paugwa. Ka i yegl mere paugwa, Yagl Kade gumuglo mina ege swara ta yogwa i, bugla yugu 1,000 bogl kuno yogwa. Te, bugla yugu 1,000 i, ama ege swara bogl kuno yogwa. 9 Yagl Kade ye ede ikne unagledi ka kaima di te paduglkwa i, ye tau kanana moglsre, ede ikne ukrumedi yegl ta prikramga. Yoba tau yegl mere praiglkwa ba nono pre pogl sinamga i, Yagl Kade tabre ede ikne ukrukwa i, siragl pre ye yoba goraiglmedi prikrukwa. Ye yoba mudu nomano yake tenaiglmedi prisre, sugl moglkwa.

God ye kamun mitna ya dumo makan kor ere yenabuka

10 Ana Yagl Kade unabuka igne i tabre plau dinabuka. Yoba ugl paigwa igne, kunogl gogl yoba ede yugugl wimere yegl, yoba kankre meglbi, tabre plau dinabuka. Ege i plau dinan, ade ba ya kugl kuri bla didre, doga de, dudinaiglkwa. Te, dumo makan ya yoba taragl kane kane dumo makan mina erikwa i, doga de kodinabuka.

11 Ana taragl kane kane yegl mere u kide pi kodidre, dudunabuka pre ene siragl mere mogl pai eribi, kuno erabedi prime? Ene God we di pre wan moglsre, ye mabunomo duglo bogl moraiglkwa paugwa. 12 Te, God ege ta Yagl Kade unabedi di paduglkwa i, ene ege i tabre unabu ba di prisre, kie ere molo. Ege i unan, kamun mitna ibo ya taragl kane kane mitna ibo paigwa i, doga dedre, de kurdi ede u kide pi kodinaiglkwa. 13 Ba God ka kaima di noro paduglkwa i, ye kamun mitna ya dumo makan kor ere yenagle dugwa. Te, dumo makan kor i mina mabuno du keme panabuka. Yegl pre nono kamun mitna ya dumo makan kor i, unabedi kie ere munga.

27 God di paduglkwa i, yoba ege swara keme goglsre, okuo ye kotmo mina adraiglmedi di paduglkwa. 28 Kuno yegl mere, Krais ege swara keme yoba mere kide tadaglmeno idre, tawano tenagledi ye yene togwa. Te, ye okuo ege namba 2 unabuka i, yoba tadaglmeno gugl edenagledi pre ukrabuka ba yoba ye unabedi kie ere meglkwa i, ere inan, wakai kaima moraiglkwa i pre unabuka.