1 Rìgh 9

1 Agus nuair a chuir Solamh crìoch air taigh an Tighearna, agus taigh an rìgh a thogail, agus uile mhiann Sholaimh a bu taitneach leis a dhèanamh,

2 Dh’fhoillsich an Tighearna e fhèin do Sholamh an dara uair, mar a dh’fhoillsich e e fhèin dha ann an Gibeon.

3 Agus thubhairt an Tighearna ris, Chuala mi d’ùrnaigh agus d’athchuinge a chuir thu suas am fhianais: naomhaich mi an taigh seo a thog thu, a chur m’ainme an sin gu bràth; agus bidh mo shùilean agus mo chridhe an sin gach là.

4 Agus ma ghluaiseas tusa ann am fhianais, mar a ghluais Daibhidh d’athair, ann an iomlanachd cridhe, ann an ionracas, a dhèanamh a rèir nan uile nithean a dh’àithn mise dhut, agus gun glèidh thu mo reachdan agus mo bhreitheanais;

5 An sin daingnichidh mise cathair do rìoghachd air Israel gu bràth, mar a labhair mi ri Daibhidh d’athair, ag ràdh, Cha bhi thu gun duine air rìgh-chathair Israeil.

6 Ach ma thionndaidheas sibh da-rìribh om leantainn-sa, sibh fhèin agus ur clann, agus nach glèidh sibh m’àitheantan agus mo reachdan a chuir mi romhaibh, ach gum falbh sibh agus gun dèan sibh seirbhis do dhiathan eile, agus gun sleuchd sibh dhaibh;

7 An sin gearraidh mise Israel as bhàrr aghaidh an fhearainn a thug mi dhaibh: agus an taigh seo a naomhaich mi dom ainm fhèin, tilgidh mi as mo shealladh, agus bidh Israel na ghnàth-fhacal agus na leth-fhacal am measg nan uile shluagh:

8 Agus an taigh seo a bha cho àrd, gach neach a ghabhas seachad air, bidh ioghnadh air, agus nì e sgeig; agus their iad, Carson a rinn an Tighearna mar seo ris an tìr seo, agus ris an taigh seo?

9 Agus freagraidh iad, A chionn gun do thrèig iad an Tighearna an Dia, a thug a-mach an athraichean à tìr na h-Eiphit, agus gun do ghabh iad dan ionnsaigh diathan eile, agus gun do shleuchd iad dhaibh, agus gun do rinn iad seirbhis dhaibh; uime sin thug an Tighearna orra an t-olc seo uile.

10 Agus an ceann fichead bliadhna, anns an do thog Solamh an dà thaigh, taigh an Tighearna agus taigh an rìgh,

11 A chionn gun tug Hiram rìgh Thìruis seachad do Sholamh fiodh seudair agus fiodh giuthais, agus òr gu a uile thoil, an sin thug rìgh Solamh do Hiram fichead baile ann an tìr Ghalile.

12 Agus thàinig Hiram a-mach à Tìrus a dh’fhaicinn nam bailtean a thug Solamh dha; ach cha do thaitinn iad ris.

13 Agus thubhairt e, Ciod iad na bailtean sin a thug thu dhomh, a bhràthair? Agus thugadh fearann Chabuil mar ainm orra gus an là-an-diugh.

14 Agus chuir Hiram a dh’ionnsaigh an rìgh sia fichead tàlann òir.

15 Agus is e seo adhbhar na cìse a thog rìgh Solamh a thogail taigh an Tighearna, agus a thaighe fhèin, agus Mhilo, agus balla Ierusaleim, agus Hasoir, agus Mhegido, agus Ghèseir.

16 Chaidh Phàraoh rìgh na h-Eiphit suas, agus ghlac e Gèser, agus loisg e e le teine, agus mharbh e na Canàanaich a bha a chòmhnaidh anns a’ bhaile, agus thug e e mar thìodhlac da nighinn, bean Sholaimh.

17 Agus thog Solamh Gèser, agus Bet-horon ìochdarach,

18 Agus Bàalat, agus Tadmor anns an fhàsach, anns an tìr,

19 Agus na h-uile bhailtean ionmhais a bha aig Solamh, agus bailtean a charbad, agus bailtean a mharc-shluaigh, agus miann Sholaimh a mhiannaich e a thogail ann an Ierusalem, agus ann an Lebanon, agus ann an tìr a thighearnais uile.

20 Agus an sluagh uile a dh’fhàgadh beò de na h-Amoraich, de na Hitich, de na Peridsich, de na Hibhich, agus de na h-Iebusaich, nach robh de chloinn Israeil;

21 An clann a dh’fhàgadh nan dèidh anns an tìr, nach b’urrainn clann Israeil a sgrios gu tur, dhiùbhsan thog Solamh daor-chìs gus an là-an-diugh.

22 Ach de chloinn Israeil, cha do rinn Solamh tràill sam bith: ach bha iad nam fir-chogaidh, agus nan seirbhisich aige, agus nan uachdarain, agus nan ceannardan, agus nan riaghlairean a charbad, agus a mharc-shluaigh.

23 B’iad seo uachdarain an luchd-dreuchd a bha os cionn obair Sholaimh, còig ceud agus lethcheud, a riaghail os cionn an t-sluaigh a dh’obraich anns an obair.

24 Ach chaidh nighean Phàraoh suas à baile Dhaibhidh da taigh fhèin, a thog Solamh dhi: an sin thog e Milo.

25 Agus dh’ìobair Solamh trì uairean anns a’ bhliadhna ìobairtean-loisgte, agus ìobairtean-sìthe air an altair a thog e don Tighearna, agus loisg e tùis air an altair a bha am fianais an Tighearna: agus chrìochnaich e an taigh.

26 Agus rinn rìgh Solamh luingeas ann an Esion-geber, a tha làimh ri Elot, air tràigh na mara ruaidhe, ann an tìr Edoim.

27 Agus chuir Hiram anns an luingeas a òglaich fhèin, maraichean aig an robh eòlas na fairge, maille ri òglaich Sholaimh.

28 Agus thàinig iad gu Ophir, agus thug iad as a sin òr, ceithir cheud agus fichead tàlann, agus thug iad gu rìgh Solamh e.